LAORAR CHI … (second tòch)
di Paola Carlin
Ghe son de nòf … ho savest che tuti sti “anèdoti” che me capita sul laoro (ciamantele scemade) le diverte! Sicome qualcos de strano e che fa rider me capita pù o men tuti i dì ho pensà de continuar a scriver ancor qualcos.
‘Na siora de 87 ani l’era così carina e spontanea che la m’ha proprio ralegrà la giornada; quando g’aven domandà se la gavéva avù malattie o operazion fra le altre robe l’ha n’ha dit che l’era stada “operada ale carote” e che l’aveva avù “l’ictus islamico”. La n’aveva po’ contà che el cardiologo l’era en po’ strano perché el seitàva a farghe fotografie … Per fortuna la steva benòt e per eser pù precisi: “me sento en pochetin storna, ma no storna storna ma sol en pòc storna”! Cara la me veciòta, l’averia adotada subìt come nona!
La zènt comunque l’ei propri strana …
En dì aven vist en tipo che l’era pien de tatuagi dal còl ala ponta dei pèi (giuro che no ho controllà se l’era proprio tatuà dapertut); gò dit che dovevo farghe en prelievo de sangue e elo el m’ha rispondù che el gaveva paura dei aghi! Mi con molto tato alora (si credéghe!) g’ho domandà se tuti quei tatuaggi i ghe l’aveva fati col penèl! Alor elo el m’ha dit che ghe feva impression el sangue che veniva ciucià fora! VampironPaola no l’ha s’è fata empietosir e ZAC!!!
Sempre parlando de tatuagi na volta m’è capità en tipo che sula panza el gaveva tatuà bel grant “SALA GIOCHI” e soto ghèra na frecia che neva en zo! Che coragio! Po’ magari no ghe va mai nisun a zugar!!! Volevo domandarghe se la sala zoghi l’era serada per “asenza del titolare” ma son stàda brava e profesionale a tàser.
Se sa che, anca se problemi ghe n’aven tuti, viven comunque en den periodo en do che se sta abbastanza ben. E tuti magnan, magnan e magnan e po’ no c …!!! A ‘na siora gaven domandà se l’aveva tolt na purga per la so costipaziòn. Ela l’ha n’ha dit de no “ma me son fata na cèla de crauti che i me fa nar”! Mi no ho capì se i crauti su de ela i g’ha n’efetto “cori cori” o se i “ghe fa cagar” perché no i ghe pias. Me son desmentegàda de domandàrghel !
Se sa ben che noi veden en po’ de tut chi, anca quel poro matel che “a deglutinare g’ho mal de gola”… Ma parla come t’ha ensegnà to mama: a engiotir te g’hai mal de gola! No serve far i sapienti.
Trenta ani fa quando ho fat la scola de infermiera avevo studià anatomia … Ma se sa che le robe le continua a cambiar, soratut en medicina, ma: se tanti no i gà la testa sule spale … en do dovente zercàrla? Nele mudande? El so zà quel che pensé e alor me fermo! E perché s’è spostà anca el còl? Tanti i gà mal al “col del pè”… no saven mai se mandarli a far i raggi ala cervicale o ala caviglia ! Saral storzicòl o na storta ala caviglia?
A un ghe “scrinchegnàva” l’anca così forte che el disturbava anca la zent che ghe stéva entorno. No l’è che la ghe feva tant mal, ma ogni tant ghe partiva dele “sfrizonàde” che nol riusìva gnanca a star en pè.
Ogni tant vèn zent che gà avù dele “assenze”… Ma no bastavel farghe na giustificazion?
Uno poreto el s’è spaventà perché na volta gh’è vignù for “en sbròc” dapertut; nol capiva se l’era n’attaco de “pseriosi” o se l’era na reazion alergica. Va’ a capir cosa che l’era sta!
No se pòl darghe la colpa al calt che me par che quest’an ne sen desmentegadi de ordinarlo ma qualcos deve eser suzest a sta pòra putela che è vegnù a dirne che “uno sciame elettromagnetico mi ha fratturato la testa” (l’era ‘na ‘taliana): ma mi ghe domando ai nossi contadini … che combinè? Na volta usave le af per empollinar le piante, sciami e sciami de af. Adès ve dé a ste robe moderne per far vegnir la fruta pù grossa? Vardè che se i rote le teste figureve i pomi!
Tanti veciòti i tòl el “comodìn”, quela medizina che serve per tegnir scoagulà el sangue; de solit i ghe dis de tòrlo ale quatro de dopodisnar, lontan dal magnar… ma no saresel mèio lasàrghe el “comodin” sul comodin e fàrghel tor prima de dormir? O sbaglierai comodin ???
