LA CANZOM DE LA SERA

La canzóm de la séra

 

di Cornelio Galas

Te capìssi sùbit el tài del prà,
quando ‘l sól ‘l và drìo i monti,
quando s’empìza tuti i lampioni,
e tì, nè fodrà nè ‘mbastì …
te pensi zamài sol al paióm.

 

Anca se nesùni parla ‘ntorno,
te pàr che ghe sia ciaceramenti,
qualcós, ma chìe? Che zavària,
che mòmola parole che no se capìs,
e’ntant ‘mpienìs tut mal l’aria.

 

Lezéri come lugherìni tut sgóla
squasi per scapar via co la luce,
prima che devènta màssa stròf
per zernìr le pónte dele montagne,
semper pù tacàe al babao de sóra.

 

L’è en quei momenti lì che la sera,
come na candela che sta per finir,
la tàca via la so solita canzom,
na nenia trista, che par stofegàr
oltra a la luce anca quei che scólta.

 

E se cónta, co sta musica lontana,
fati de zent che demò no gh’è pù,
òmeni, dòne, ma anca putelòti …
… drio quel zél, semper pù scur
che tut tegn al cuèrt, anca la verità.

 

Alora ‘mpìzo en zigarét, e vardo sù,
per veder se col fum butà ne l’aria
qualchedùni se mete magari a tosìr,
per zercar de sentir na vòze che diga:
“Tèi, varda che da noi no se pòl fumar”.

 

Po’, ciapà la sgarìa, smorzo su tut,
e par de vederli en qualche maniera
tuta sta specie de fantasmi scondùi,
che ride come mati, da pisàrse ‘ndòs:
barèa, eco da dove vèi ‘sta piovesìna.

 

Ma ‘ntant el còr l’è pù ‘n pàze,
la canzóm l’è zamài drìo a finir,
vòi veder se anca domàm la canta
‘sta sera che me tòl per ‘n dùgo,
senza che te pòdi dirghe vergòt …

Questa voce è stata pubblicata in Senza categoria. Contrassegna il permalink.

Lascia un commento