EN VIAZO

El bel, i dìs, no l’è ‘l partir, l’arivàr,
ma tut quel che gh’è ‘n mèz.
El viàzo el conta sol entànt
che te viàzi, te vai envanti.
Pénseghe ‘n po’ su: l’è vera,
e làssa star, te prego, la reclàm
de que l’auto che va, va e va:
i vol sol véndertela …
La vita, envéze, i te l’ha regalàda.
L’è tua: senza mutui, senza rate.
La va envanti anca senza benzina,
e l’è quel ‘l bel: semper robe nove,
Te me dìsi: no l’è propri cosita,
tanta zent l’ gualiva, fin ala fin.
E de sto viàzo, scuseme neh,
i vede semper le stesse robe,
che ala fin te ris’ci de stufarte.
Ah te gai resón, ecome te gài resón,
ma scólteme mi, sol n’atimin:
entant che te vivi, che te viàzi,
qualcos te farai, te dirai, te …
te laserài chi, ‘n sta val de lagrime.
E alora scominzia ti, malmostós,
a molarte fora, a rider ai altri,
a sfogarte, se l’è quel che te voi.
Entant te viàzi, te vedi altri òmeni,
altre done, altri boci, altro …
che no ‘l sia sol, e sol quel
che te par de veder tuti i dì.
Po’ dai che ne troven na volta,
a parlar de sti paesagi novi:
te verai che sten lì, mi e ti,
davanti a na birèta,
fin quando i séra el bar.