El me cine en stràa

di Cornelio Galas

El me cine en stràa

Pòl suzéder che t’encontri zènt che te la te piàs, così, subit, a pèl. Che la ride quando la te vede. Ma se capìs che no l’è per torte per giro. E manco te la conósi neh. Oh, no la te domanda gnent. La te saluda, la và envanti. Po’ la sparìs drìo la reséga de la zità. E no te la desmenteghi però pù. Perché è bastà quel moment per volerghe bem. Per rider anca ti alzando la mam. Come dir: “Grazie, bona giornada anca a tì”.

Altre volte envéze te càpita d’encrosàr quei che forsi (bisognerìa vardar meio demò) sul copìm i deve averghe na sòrt de foséta. Perché l’è lì che i dovrìa far perno per tegnir su tut el so mondo. I và via squasi gòbi, con tut sto peso su ‘l còl. E par che i te dìga (senza saludar, senza parlar se sa): “Varda che se no ghe fùssa mi a tegnirme endós tute ste responsabilità … ah no ghe sarìa tant da rider neh”.

Po’ gh’è quei, da qualche am, che i gà semper el telefonìm (o i fili tacài a quel) nele récie. Quei i và en giro coi òci che no varda -così par – da nesuna banda. Squasi come cavazìni che finìs a l’àm senza saver quel che i ha magnà soto aqua. Squasi come quei che -poréti – parla per so cont. E ancora t’encontri en stràa quei te domanda en zigarét (“Gat el vizio? Mantégnetel oscia”), come na volta i tòseghi i domandéva zento lire per farse.

Pu envanti se trova sentài en d’en bar, i “comisionati”, quei ensoma che và en giro a vender qualcos. Semper ciapài a spiegar dove nar, cosa far, quant se pol guadagnar da ste bande. Ogni tant en todesch che domanda “Wo ist Casinò?”. E spièghela ti che lì gh’è sol el bar, che no se pol zugar soldi. Pol suzéder anca d’encontrar um che gà i to stési ani: “Cramento, perché ti te sei en pensióm e mi no? Te par giusto?”.

Opura na vecia morosa. Che la te varda e la slarga i brazi. Come dir: “Zerto che na volta t’eri meio neh …che cròlo”. En stràa, dove som nàt, dove ho vivèst fim adés, dove ho lavorà, l’è come veder quel che te eri da bocia e quel che te sei adés ensèma. En cine che và drìo mam, capì come? Ala fìm te vèi en gróp: “Vot veder che sém vizini ala fìm?”.

Questa voce è stata pubblicata in Senza categoria. Contrassegna il permalink.

Lascia un commento