DRIO MAM…

di Cornelio Galas

S’è semper drio a nar envanti

da picoi no se vede l’ora…

de deventar subit pu grandi

E po’ de colp, ma zamai tardi

te vorési che i ani i nés piam

de pù: te zerchi come fermarli.

 

Gh’è dei dì che te ricordi màsa

quando no gh’era mai penséri,

quando te pensévi sol a corer

senza fermarse, gnanca a bever.

Te arivévi a cà zamai senza fià

bastéva poch per tornar a ùm.

 

Col temp t’hai capì meio l’anda

de sto mondo strano e malfàt.

La colpa no la gà el creator…

o quel che dai l’ha mes ensèma,

Forsi gnanca Adamo e la so Eva:

sem stai noi a farne sti gazèri.

 

Vei da domandàrse, e dalbòm

perché se ne piàs tant star bèm

fém de tut, en sto condomìni…

per no nàr d’acordi con i altri.

Perché se ne piàs tant le dòne

l’è lore quele che pù ghe rimete.

 

L’è come se tut nés drìo mam

che no ghe sia lègi che tegna

Bestie sem denter e anca fòra

magnar, bever, tut te se deve

che ‘l rest se ciava, così fa tuti

tanto del dopo no se sa gnent.

 

E alora meio sbararle ste capéte,

tute de colp, o ‘n po’ ala volta

Fà zito ti, no te capìsi gnente

sol mi so quel che se pol far

quel che è giust che me tegna

e quel che te poderà vanzàr…

 

En zél le stéle le ride ogni not,

po’ le ghe lassa al sol, ala luna

far tut el rest per farne capir…

Ma no gh’envegnim mai fora

gnanca dopo tute quele poesie

E seitèm contarne tante bosìe.

 

Fim quando vedém vizina la fim

e capim che anca a noi ne tocherà

domam, posdomam, st’am che vei

esser mèsi zò, dopo ‘n funeral…

Eco che alora ne vegnirà en ment

che forsi se podeva viver, pu bem.