di Cornelio Galas
Prima gh’era ‘l porzèllum (forsi l’unico nome giust per ‘sta lège), po’ è vegnù el mattarellum (bòm a spianar le taiadèle dei partiti), nei ultimi mesi è saltà fòra l’italicum, el rosatellum (ma no l’è ‘n vìm), el tedescum (ma a la ‘taliàna, se sa). No l’è dita che sia la vòlta bòna perché – anca se i dìs che Renzi e Grillo i parerìa nàr d’acordi su sta ultima soluzióm – zà gh’è quei che fa la pònta ai bìgoi anca su questa.
Se parla, se no l’avé capì, de la nòva lege per le elezióm de onorevoli e senadori.
Perché senza quela no se pòl nar a votar. Anca se squasi tuti, a parole, i volerìa nar a votar domam matina. Ma perché i s’è ‘ncagnài su sta lege da far? Oh, entant, no l’è na novità, neh. Né a vardarme i giornai veci (se no i gavè i trové su televignole). E vedré che de far na nova lege eletorale s’en parla da ani anorum. E da semper i bega sul sistema de farne votar.
Zà, perché a seconda de la lège pòl cambiar anca quei che, coi stessi voti, vinze.
Ensóma no l’è come quando se và a votar el diretivo de quei de le bòce. Che se ‘l Gino ‘l ciàpa i pu tanti voti el deventa presidente e quei drìo i va’ a darghe na mam nel diretivo. No, per nar a Roma no basta ciapàr anca dese volte de pù, méti,del Gino (che tut mal i só novanta e passa voti su zento e quìndese ‘l li tira semper). No, no, putèi. En cont, per esempi, l’è quel che i ghe ciama el proporzionale. Quel che se dropéva prima che ‘l Marioto Segni l’enventés el magioritario.
E n’alter, capì come?, l’è el magioritario. Dove, come spiegarvela?, a ‘n zerto punto i méte tut en d’èn scatolóm chde se ciama coalizióm. Dove gh’è denter diàòl e aqua santa misciài. Che però i vinze e i va dopo a comandar l’Italia. Magari scortelàndose quando no i è ‘n televisióm.
Ma perché i bèga su sta lege? Disénte che a qualchedum el fato de restar fòr da la porta se no l’ariva a ‘n tot per zento, propri no ‘l ghe và zò. Altri i volerìa ciapàr tut quant se i ariva envéze a n’altra percentuale (alta). E altri ancora i è lì, tuti i dì, che i varda i sondagi: “Osc’ia ne convegnirìa far na lege così e cosìta se volém vegnirgh’en fòra”.
Dàmela tòmela l’è come se st’istà, prima che scominzia el campionato del balóm, zugadóri, alenadóri e paróni de tute le squadre che zuga, i se trovèsa per cambiar le regole. No so, per esempi, na squadra dove tuti i è picoi la podrìa dir: “Putèi e se féssen che no se pòl pu darghe de testa?”. O quei che gà zugadóri che córe: “Basta co sta storia del fuorigioco dai …”. E ancora, na squadra de tamàzi: “Se se ciàpa el balóm bòm, se se ciàpa i stinchi bom lo stess no?”.
E po’ magari scortar le porte per quei che zuga fòra e slargarle per quei che zuga en casa. Poder cambiarne òndese su òndese se propri no i va. Punizioni senza zènt che stà en mez tra ti e ‘l portier. Tut a seconda dei propri enterési, se sa. De sicur vegnirìa ora de scominziar el campionato che i sarìa lì ancora a begàr. Propri come i nossi politizi.
Del rest no l’è miga sol sta roba che se bèga e ‘ntant no se combina na madona. Prima i vòleva tirar via (non del tut, se no …) el senato. E ‘l referendum l’ha fat cascar zò Renzi da la tor. Dopo i ha fat i vàucìèr e quando i nèva via come ‘l pàm a mezdì, i ha dìt che i scherzéva. Dopo, ancora, i ha fat la lege per quei che ghe ariva i ladri en casa … quela che se pol farghe qualcos sol de not.
E ades salta fòra che la finanziaria, cioé la lege pu importante, quela che decide se e quante tàsse dovrèm pagar, la podrìa sbrisìàr a … dopo le elezióm. Zà perché no se sa gnancora quando se narà a votar: prima bisogna meterse d’acordi su la lege che disévo prima.
Quei che gh’è su adès de zerto no i vòl miga taiarse i zebedei con tasse e sacrifizi per i taliani neh. Che no vegna fòra ensoma che la colpa, come semper, l’è de quei … de prima. E po’ n’altra roba: gh’è de mèz anca i vitalizi, en setember. Se se nès a votar prima, osc’ia, qualchedùm riscerìa de morir de fam cramento. Ensoma, ala fim fim vot veder che la nova lege la se ciamerà magnatuttum?
