di Cornelio Galas
-Dai, cónteme quela del Palazét …
“Ma l’è vècia, dai, no la fa pu rider”.
-No, dai cóntemela l’istéss che me fago do ghignàe.
“Se no te vòi alter …”
-Dai, dai, che zerti tòchi no me i ricordo zamai pù.
“Alóra … l’è da sti ani che tra Riva e Arco i néva d’acordi come cagn e gat e che la “Busa” la néva envanti come en car a tre ròe. I beghéva su tut. L’ospedal nòf? A Riva. No, a Arco. No ‘n mèz. Le fére, i congresi? Perché sol a Riva? Alora a noi de Arco dové darne almem qualcos per empienir el Casinò”.
-Sì, sì me ricordo de ste robe, và envanti …
“Bom. Fato sta che, dàmela tòmela, vist che quei de Riva a ‘n zerto punto i gavéva na bèla squadrèta de palacanestro, i ha scominzià a butàr per averghe anca en Palazèt per zugar al cuèrt …”.
-Sì, dai, me ricordo anca ste robe chi. Che gh’era el Bruno Santi presidente, la Cartèra de Riva che tirèva fora i soldi, che i è arivài en serie B, che squasi i nèva anca pù sora …
“Ma alora contela ti no ?
-Scusa, scusa … l’era tant per dir.
“Ensoma, dai e dai, sto palazét i l’ha anca trovà, propri a metà stràa, dove gh’era quel che binèva sù le robe de fer vecie, quele de plastica … al Rigoti. En tendóm però. Tipo quel dei circhi. E difati i gà fàt denter anca tanti spetàcoi co le tigri i lifanti …”.
-Dai, tàia …
“Tuti però che i voléva en palazèt del sport vero, osc’ia. No quel tendóm che se tiréva ‘n pel de vent en pù o fiochéva … En palazèt coi muri. I so posti per cambiarse, per pisàr, ensoma per star comodi”.
-Eco, adès ariva el toch che me pias de pù.
“Tasi demò. Se no la mòco chi. Alora, tura buta e mòla ale tante i se mete d’acordi. Tra Riva e Arco. Perché gh’era en bàl anca i progieti del cine e del teater neh. Nesuni voleva lasàrghe qualcos de pu a l’alter. E cosìta a Arco i s’è contentai del teater e del cine. E a Riva i gà dat i soldi per el Palazèt”.
-Tuti propri contenti?
“Se te sai come la va a finir còntela ti la fim, mona …”.
-No, l’era tant per dir.
“Quei de Arco, per el teater e ‘l cine a l’ex Quisisana, i gàveva dat i laóri a l’impresa Azolini, oh, miga na dita dal pit neh, sol che dopo l’è nada nei gazèri. E l’ha piantà lì tut, anca la gru che dopo i è vegnui a torsela de volta…Tut mal ala fim i è riusidi a far sto cine e sto teater”.
-E quei de Riva?
“I ha raspà anca lori i soldi e ‘n qualche maniera i ha fat sto Palazet su a la Baltera, ensèma ai capanoni en pù per la féra”.
-Tut bem no?
“Dai, no stà far quel che è vegnù zo co l’ultima nef”.
-Te gài resom, ma sto toch chi dela barzeleta l’è quel che me fa nar semper en tera dal rider. Varda me stàgo zà pisàndo endòs…
“Va bem, ma stame lontam che no volerìa mai sporcarme… Ensoma, adés en quel cine, en quel teater de Arco, va fàra pu soldi per la luce, per el riscaldamento de quel che vei denter coi biliéti. L’altra sera i era en trei al cineforum. Ma se sa, se te voi vederte en cine nof, comot, bever e fumar entant che te ‘l vardi, adès basta empizar la televisiom tacàda al compiuter no. El teater? I và zo tuti pu volentera en quel de l’oratorio de via dei Pomeri. I fa ancora le vecie comedie en dialet. E te paghi de mem”.
-E al palazèt de Riva?
“Varda, lì l’è nada, se posibil, anca pezo”
-Perché?
“Dai, osc’ia, i è anca bravi, zoveni, pieni de bona volontà quei de la Virtus, ma se a Trent zuga l’Aquila en serie A, dove vot che vàga la zent? Gh’è da dir tut mal che l’alter dì, quando propri l’Aquila l’è vegnua a Riva a far n’amichevole el palazèt l’era squasi tut piem neh …”
-Basta, fermete … no ghe la fago pu.
