di Cornelio Galas
‘Cramento Mimmo, nàr via cosìta, senza gnanca saludàr i amìzi, anzi, scrivendo su Fèsbuch, pochi dì prima de nàr a l’ospedal de Arco de spetàr en pòch prima de vegnir a trovarte … E po’ quela canzóm dei Nomadi (“Mi vòi vìver”) che t’hai lassà sul to sìto … No, no se fà cosìta.
Dai che scherzo, ma tut mal som istéss ‘nrabià. No con tì, co ‘sto diaolporco de destìm (che prima o dopo tòca a tuti neh) che de colp te fà restàr come ‘n deficiente. Nel senso che te vèi a mancar qualchedum che te voleréssi no ‘l fùs nà via per semper. Magari ‘n ferie, a curarse a le terme, ma no per semper …
T’avevo scrìt, quando te eri a l’ospedal per le prime cure: “Dài, dài, Giacomim, fòr dal lèt dai”. E s’era tornài a parlar (te ricordit?) de far qualcos al Circolo del Rióm su … vecie storie, tradiziom, comedie, en dialèt. Robe da rider ma anca da pensar.
Po’, come se dìs, no gh’era mai el temp giust per trovarse a ‘mbastìr tut quant, po’ t’hai scominzià a averghe quei dolori, quei fastidi (“Vago a far el tagliando e torno – te me disévi – basta cambiar filtro, candéle, na netàda al motor e vegno a cà”), a mandarme foto da tuti i ospedài dove no te avévi pers però el viziét de far rider anca le enfermiere.
E stamatina lézo che no te ghe sei pù. Sacramentaifel … te pàr el modo? Tut mal se dove te sei adés no i fà polenta e lumàzi come te i févi tì mandeme na mèil che ghe scrivo mì al cògo.
