Ciacere, ciacere …

di Milena Pisoni

Son nada en zità; ve parerà strano ma me pareva che quasi tute le done le fussa encinte. Saral en segn premonitor ? Sarònti encinta?  A me marì ghe vegniria en sciópon! … Te prego! Ghe n’ho zà trei e me par de gavérghen zà assà!

M’è vegnù en ment de quand’ero encinta mi …

Tuti che i te toca la panza, che fastidi! Ma i no pòl tegnir le man a so casa? La panza pòrtela fortuna come la gòba? O l’è en gest come da tocarse soto per dir “per fortuna la t’è tocada a ti e no a mi?”.

Quando vegnivo  da dreo n’angol, arivava  prima la panza e po’… po’… po’ mi!  Na panza grossa che su de mi, ciuciada fòr dale strie, la pareva en mapamondo.  Zerta zènt la te dis tante monàde en quei periodi.

Gh’era i ‘ndovini  che vardandote la panza i te diseva se l’era mascio o femina; en ponta en mascìo e tonda se l’era ‘na femina. Per lori  avrìa sempre gavù mascì, ma envezi ghe no sol uno, le altre le è femine … Me saronti sbagliada mi o se sarai sbaglià tuti i altri?  O gavrònte femine finte ? …

Altra zènt  la me diseva che no se podeva lavar i vedri perché alzando i brazi se podeva perder el fiol. E mi che me enmaginevo la scena “mani en alto” e … zo en tera el bocia, come se per tut el temp se stés lì a tegnirlo su con le man. Che rider! Ste atente done  a  saludar con en braz per aria, che no ve scampa for na gamba del bocia.

No se podeva encuciarse se no se el sghiciava, e quando avrìa dovù tòr su qualcos da tera dovevo star atenta a piegar sol la schena e no le gambe. E pensar che a mi i m’ha sempre dit che se dovria , per no g’aver mal de schena, piegar soratut  le gambe.

Po’ ghera quele che me consigliéva de usar, per prevenir le ragadi, el spazolin da denti da gratar su per i capezoli. Oh! Che mal! Le è mate, no el farìa gnanca soto tortura. No m’è ancora vegnù i denti lì… e gnanca el ghe l’ha lasadi  qualcun’ alter! Entendevo i altri fiòi … sa pensè!

N’ altra la m’ha dit che avrìa dovù meter su limon e sal. Come quando se beve la techila. Che zènt strana  che gh’è en giro! Sto misciòt no bruseralo? Po’ en giro col cagn no podevo nar, perché se no me sarìa vegnù fora el bocia malfat, gualif a en cagn. Giuro che no l’è sta elo a meterme encinta. Me ricordo ben … no l’è sta elo!

Ho sempre patì de mal de stómech e i m’ha dit che l’era perché i boci i gavéva tanti cavèi. Mi tuta contenta pensevo  che quando i vegniva for se i mé aves fat masa mal i  avìa ciapadi per i cavei e tiradi for cola forza. Envezi gnent, i era peladi come i zuchi! Peladi dapertut! Mah!

En papà a na lezìon de quele che se fa prima de partorir el g’ha domandà a l’ostetrica se el podeva nar con la so dona, ensoma … spero che aveghe capì. L’ ostetrica la l’ha vardà mal e la g’ha dit  che el podeva far quel che el voleva se la so dona l’era d’acordo. E elo stragnà l’ha domandà “No l’è che ghe fago mal al popo? “… Dent de mi ho pensà che el doveva eser en superdotato !!! Che rider, ero piegada en doi! Ah no che no se pòl se no sghizo el bocia!

Ensoma tut na risada! E anca se ho portà a spas el cagn, netà vedri, tolest su da tera roba o en braz boci, i mé fioi i è  sani e bei, tut la mama! L’è propri vera “mama bela popi bei” …