di Cornelio Galas
Giacomo Floriani nella sua baita sopra il Rifugio S.Pietro
Chi l’avrìa mai dìt, quela vòlta a Zéole
che t’eri propri tì, quel con ‘l fràte
mi ero en bocia, nei òci tante le pétole
e ti envéze n’om, ‘l me còr ancor bàte…
Te stévi parlando, vóze alta,’n convènt
al frà Silvio, ‘l scultór, nel so sìto
e mi che scoltèvo, ma senza capìr gnènt
te vardévo embambolà, semper stà zìto.
Ero ‘l fiòl de l’Italo, sì ‘l marangóm
no èrem lì per scoltàr quele to poesie
se dovéva laoràr, col legnàm, dalbòm,
e quel che te lezévi le ne parèva strìe.
Gh’era de tut, en quele parole ‘n dialèt
da la montagna, al làch, fim a na grèsta
storie enventàe, ma che t’arivéva scièt
ala fim te metèvi però tut nela to zésta.
T’eri lì, tut ciapà, l’anima e ‘l zervèl
squasi che fussa en sòign, fat da per tì
e de colp anca noi, tra seghe e ‘l martèl
sém vegnùi vizìm, per scoltarte meio, sì.
Ah che maravéa, quela matìna de primavera
pensàr a dàse de pìm, granzóni e scoiàtoi
tocàr làresi, cavriòi, come i fùs davéra
butàr via i penséri bruti, come coriàndoi.
Ti te parlévi, Giàcom, me ricordo ancóra
come parla n’ennamorà dela so bela dòna
qualchedùm t’avrìa ciapà del mat alóra…
fim quando ‘l Maroni, t’ha dat la corona.
Pensando a quel dì, passà con ti da pìcol
senza saver chi te èri e cosa te févi…
me domando, ades che ne capìsso ‘n mìgol
perché per ani bèm la néva ‘n do te stévi.
Ne la to bàita, co la to pipa, a Sàm Péro
vardando ‘n zò, vers ‘l Garda, e la Busa
t’hai capì dele robe, che val pù de zèro
basta voler bem, che ‘l rèst no ‘l sbrùsa.
Ti t’avevi aiutà, prima de la gran guèra
i taliàni trentini a scampar da sti paési
col Cesare Batisti, quel copà zo ne l’èra
t’eri nà anca ti, via, da quei demò tési.
Po’ ale tante, i t’ha dàt premi e medàie
te sei deventà ‘l poeta del nòs Trentìm
Se te fùssi vif, ah quante poche le pàie
per farte dormir ‘n pàze, nel to letìm.
Te dovrési spiegar, ti che te èri de Riva
perché da lì i ha portà via que l’ospedàl
perché lì dove te abitévi adés i arìva …
co le bici eletriche, anca senza ‘l pedàl.
E no l’è finìa, caro Giàcom, scusa se digo
robe che no volerìa che te dés dei fastìdi
chì ghè de la zent che da temp mi ‘l zìgo
no i sa pù che far co la tèra dei so nidi.
T’ho volù bem, caro poeta scritór ‘n dialèt
fim da bocia, da quando no te no conosévo
scusa se scrivo così, squasi tant a l’èt
ma grazie a ti al Trentìm tant ghe dovévo.
Volerìa sol che da chi anca a zènto ani
ghe fus qualchedùm che lèze i tò scriti
se no altro per dir che no s’è fat dani
a portar avanti l’amor, e semper drìti.
Arco, Santuario delle Grazie, fra’ Silvio Bottes, 1984
