AH CHE BEL …

di Cornelio Galas

I ha bel e che finì, ale tante, ‘sta benedeta Lopio-Busa. Na galeria a do cane. Che te ciàpi pòch dopo Mori, vers Lòpi. E te vègni fòra a la chipa dela Maza. E po’ zó, nar che nare, en pont nof sula Sarca, vers Lufàm. E te te tàchi, dopo, a le stràe nove che gh’era zamài prima. Ah l’è tuta n’altra roba neh rispèt a ani endrìo. No gh’è pù cóe. Par squasi de nar ancora en autostrada, ‘péna vegnui fora dal casel de Roveredo de sòto.

El Soardi, sì ensóma dove gh’è ‘l Fanum, el par davéra n’autogril. A Paso San Zoàm, dove i ha finì el nof albergo, gh’è tut mal zènt che se ferma (gh’è i cartèi …) a magnar, a bever qualcos, anca a compràr zigareti e giornali. Che tanto su da Nach no vèi pu nesùm.

Tant ghe voléva per far sta galeria? Osc’ia, cosa gàt? Me par che te gàbi ‘na facia de um malmostós …

-Dai che adés – sem nel domilievìnti – la Lopio-Busa la gh’è no? No te vàla gnancór bèm?

“Mah …”

-Mah cosa?

“Mah, te dirò. Me par che adés la vàga pèzo …”.

-Eh osc’ia, dai, no stà dirme che no te va bèm …

“No l’è quéla so mare. L’è che me par che adés ‘n vègna zó de pù chi nela Busa”.

-Sì, te gài resóm forsi, ma almém no i stà en colona, i vèi zó pu en pressa no?

“Ma i è tut mal de pù. No se trova da parchegiar gnanca a pagar”.

-Ma scolta, no èrelo quelo che voléve? Far arivar pu en pressa tanta zent?

“Sì, ma dai, no a ‘sti livèi … Che po’ no i trova da parchegiar e i và a Limom, a Malzésem, en val de Leder … ciàpei tì”.

-Te me stài disendo che la néva meio quando la néva pèzo?

“No, per carità. Però … i gà més masa dai a farla sta galeria. Adès i parla de darghe en bigliét tipo gastronomia al supermercà a quei che và a Venezia, ma anca a Roveredo, Trent, Riva, Arco, te me capìsi bem”.

-Ma entant i camiom i camper … dai che i va per la so stràa e giusti no?

“Sì, sì. Te gài resom per quel. Ma zà da quando l’Arcese e altri i è nai fòra dala Busa la néva meio neh …”.

-Cossa volerésit dirme?

“Ma diaolporco, dai, te rèndit cont che adés no gh’è gnanca en cantóm dove te pòi lassàr la machina senza pagar do euri a l’ora?”

-Ma alora perché voléve tant sta Lopio-Busa?

“Scólteme mì, pisòt che no te sei alter, te ricordit quando quei de Arco i voléva far el port – tirando denter l’aqua – al Lufàm? Te ricordit quando i voleva far i skilift su a Malga Camp? Ma adès, secondo ti, chi saréssel quel mona che farìa ste robe dal bòm?”