Volerìa dirte…
di Cornelio Galas
Ciapà da tante robe che no conta gnent,
tirà da na banda, da l’altra, da quéla,
me par de èsser gualìf a … ‘n guìndol
che va su e zó senza mai savér ‘l perché.
Tira e mòla, tègni e làssa, ciàpa e tèi,
te pàssa envanti i dì, i mesi e i àni…
che no te sài gnanca cossa te sei demò,
che no te capissi quel che conta de pù.
Ma prima che sia massa tardi, scólteme,
volerìa dirte quel che dalbòm mi penso,
che deventerà, se sa, quel che pensévo
quando zamai de mi vif no ghe sarà gnent.
E alora, cara dòna che tut de mi sopòrta,
te làsso ste dó parole, propri ‘n crós,
quéle che de solit se àrfia l’ultim dì,
prima de sgolàr vers posti che no se sa.
El sò, te dirai che dovevo dirle prima,
che a quei modi de dir no se pol risponder,
e che l’è fàzile lassàr a bóca seràda
quei che ‘nvéze avrìa volù avérzela…
Volerìa sol dirte che senza ti no vivo,
che no gh’è gnent che pòda empienìr…
quel che ti te làssi se no te ghe séi,
quel che resta, quando tì te vai lontàm.
E alóra, resta chi, propri tra mi e ti,
qualcós che ghe somiglia tant ale arèle,
dove se stà per mauràr, per secàrse…
e po’ esser de colp magnai da qualcùm.
El me amor no pòl esser mastegà cosìta,
no volerìa mai che po’ ‘l fus endigèst,
el dovrìa durar, come profumo dei fiori,
come l’aqua che vei zò da le nòsse roste.
