TRENTINI ‘N PURGATORI – 7

di Cornelio Galas

“L’è tut …na comedia”

Sètimo tòch: Domenica Targa, che l’ha vist la Madona a Montagnaga

-‘sa fàla lì ‘n banda quela pòra dona?
èla anca èla tra questi del Purgatori?
No se dirìa, così a na prima ociàda…
che la sia una da meter tra i pecadóri.

“Pòra dona, l’è véra”, dìs San Romèdi
t’hai propri trovà la parola pù giusta
perché l’è stàda a so temp abandonada
sia dala ciésa che da giustizia giusta.

Ma và lì, va pur a fàrtela contar sù
la storia de sta putela de Montagnaga
che ancora s’en parla en quel del Piné
de na beatificazióm restàda senza paga”.

Vàgo alora, pàs lent, senza corer màsa
vers quel costóm piém de sàsi e gièra
éla l’è lì, endinociada come ‘n ciésa
la varda per aria e ogni tant ‘n tèra.

De colp la se vòlta, coi so oci tristi
No la dìs gnent, ma se capìs demò tut
Alora me vei sol do parole dala bòca:
“Vòlela parlar? Le me scusa, som sùt”.

Come fus na suora la se comòda ‘l vél
po’ la se alza da quela so posizióm…
No la ride, no la piànze, na via de mèz
se capìs che no l’ha pers la devozióm.

“Domenica Targa me ciamo, ero na pastóra,
per Nicolò, me papà, sol quel dovevo far
No gh’era ‘n dì, senza laóri e strusiàde
del rest senza quei no se podeva magnar.

En dì el Giàcom, ‘n contadìm del me paés
l’è nà tut a pè a Caravagio, al santuàri
da lì l’ha portà su ‘n quadro dela Madòna
che i ha mès en ciésa vizim ai do altàri.

Anca mi, vardando quela Madona benedéta
volevo nàr a Bèrghem, con drio el rosàri
me papà no l’ha volù: “Ti te stai a casa”
e alora a le pegore gò dat i so magnàri.

Ani dopo, arivàda zamai vizim ai trenta
ero sola co le me bestie, su ‘n Paludèl
De colp, entant che pensevo a le me robe
pegore e càvre le scapa, oh Dio che mazèl.

No savévo che far, le era deventàe mate
una ne ciapévo ma dése de nòf le néva…
ho zigà,per gnent, ho pregà tuti i santi
po’ ho vist che ‘l zél bianch se féva.

En mèz a sta nuvola, bianca, vapór scièt
eco la Madona e piam piam la so vóze …
“Te dovrési nar, ala festa de l’Asensióm
nela ciesa de S. Anna, lì drìo le póze.

Mi stremìa me par de no respirar pù bem
ma quela la sèita a dir cosa dovrìa far:
“En dinòci, prim gradìn, soto a l’altar
dove avé mès el quel quadro per pregàr…”.

Così ho giust fat quela sera dela funzióm
entant che le litanìe canteva i paesani
Ma me son trovata, su ‘n fianch piegada
e da dormir m’è vegnù coi sogni strani.

Quando ‘l capelàm ‘l m’ha svejà ala fim
gò contà tut quel che nei oci era vegnù
No l’era ‘n sogno e gnanca stormenimenti:
La Madona ‘l rosari e ‘n bràz ‘l so Gesù.

Dopo de alora altre quatro volte ho vist
quela Madona, e bem, nele so aparizióm
e miga sol en quela ciesa su de Sant’Ana
anca a Pralonch, l’ho vista per dalbóm.

Ma tuti i preti i me ciapéva per na mata
i diséva che gavevo de zert el malcadù…
Gò parla a don Michele, el me confesór
a portarme zo a Trent l’è stà propri lù.

I m’ha portada a Trent, zo al Bonconsìli
per mesi i ha seità de tut a domandar…
entant ‘n paés i era zamài tuti con mi
i ha fat en quadro nof, grant, su l’altar.

Vescovi e cardinai, che doveva po’ dezìder
el vintiséi magio i ha lassà far la festa
da tute le val i vegniva alora su a Piné
da magnar e bever i lo metéva ‘n la zésta.

Som morta che gavévo sesantazinque ani
la Madona l’ho vista anca altre volte
i diséva che i m’avrìa més zo en ciésa
envéze i me òsi i è restài nele polte.

Ani dopo, me par ai primi de l’Otozènto,
quela ciésa de Montagnaga i l’ha seràda
el quadro da lì i l’ha portà a Civezàm
dala zent quela porta l’è stada sfondada.

Tut è tornà, come na volta a Montagnaga
ma sol per no averghe en giro gazèri…
perché a Roma i gà dit tante volte de no
ala veneraziom dela Madona coi so zéri.

E sì che tanti lasù è stà po’ i miràcoi
zent malada de colp steva meio de prima
e anca adés i me dìs chi nel Purgatori
che tanta l’è la zent che và su ‘n zima.

Adès som chì, né fodràda o’mbastìda
che spèto el giudizi per el Paradìs
la Madona l’ha m’ha dit: Tranquila…
che me fiòl per prim el te benedìs”