STORIA DEI SCAUT DE ARCO

Ancòi ve meto su foto vecie dei scaut de Arco. Disènte dal ’45, pèna finì la guera, fin al Setantasèi. Sì, l’è vera, quando se deventa vèci, vardando le foto de quando se era zòveni, na lagrimòta la ghe scàpa. Così come te vei el gròp a veder quei putelòti, de alòra, che adès no gh’è pù. Quele che se fèva (e credo sia cosita anca adès) nei scaut l’era amicizie che durèva (e dura) po’ per tuta la vita.

De pù: le è squasi meio de quele che se feva soto naja o dele amicizie a scòla, o a zugar a balòm ensema. Gh’era le so regole, se sa. Le so bele Messe, i so alzabandera. Ma se zùgheva, se trapoleva tute l dì. E po’ s’empareva a rispetar la natura: arbòi, bestie, perfìn i fonghi mati e i lumàzi, per dir. Se piovèva gròss, se vegnìva zò pai de fèr dal zel, gh’era la tendòta: che spùza de pèi. Da magnar quel gh’era, per tuti. E se no stà a to cà envèze che vegnir en campegio coi lupeti, coi esploratori, coi rover.

Se vardè l’elenco dei scaut de quei trenta e passa ani vedrè che col fazolèt e le braghe de veludo corte gh’era anca zent po’ deventada importante. E tut mal anca quei che s’è fermà ale elementari o ale scole de aviamento (le medie de sti ani) i sé semper po’ empegnai per i altri. Ensoma, quel l’èra el tòch, da quel è vegnù le stèle.

Se volè vardè subit le foto. Se no gh’avè pressa però ve conto en par de storie de quei ani che ancora me ricordo, anca se alora ero en bocièta. Alòra: erèn en Bordala, campegio dei lupeti. E fèven n’escursion con don Albino. Su e su per sta montagna, en mez a sti boschi. Quando de colp un dei boci tirando via en toch de muscio el vede na caterva de tochi de fer, tuti precisi, longhi me digo na trentina de schei. Ariva don Albino, el tira via tute l muscio e, oscia, vei for na pila de bombe dela guera. Tute ben empilàe. Rùzene, ma entrèghe. Don Albino el ne mète dòe nel so prosach e tornèv zo. “Stème ala larga – el diseva sto prete – che no se sa mai”. E arivà al campegio l’ha ciapà la machina e l’è nà dai carabinieri. Se ghe penso me vei ancora i sgrisoi.

N’altra volta, sempre a Bordala, sul pu bel dei zòghi de l’ultim dì, vei zò na tompestada che pareva … balòti, oscia. La Giardineta dei mei tuta tamburelada. Vedri dele auto spacài. Ma soratùt tuti i dolzi e le “ranciate” che se strangossèva dala matina … en mez ala pacièca.

E per finir, quela volta che mi e un de Bolignam no gh’aveven voia de nar la dominica matina zò a l’oratorio de Arco per la solita riunion dei lupeti prima de na gita su per Laghel. Co le robe da magnar e bever che n’aveva dat drio i nossi sen nai en giro per le campagne. A robar zirèse ai Mori, tant per cambiar. Arivo a casa la sera. “Com’ela nada? “, me fa me papà. “Benon digo, l’è propri bela Laghel, te vedi zò tuta la Busa…”. E me papà: “E da lasù hat vist dele volte anca do boci che robèva zirese?”. Ve lasso enmaginar el rest …

Eh sì, tanta nostalgia, tanti bei ricordi. Sol na roba la m’è restĂ da chi: le putèle, ensòma le cocinele, le guide, le è arivae propri poch dopo che ero na via mì … ‘cramento.

SCAUTISMO AD ARCO – DAL 1945 AL 1976 –

LE FOTO – E TUTTI I NOMI

Questa voce è stata pubblicata in Senza categoria. Contrassegna il permalink.

Lascia un commento