SCRIVI

di Paola Carlin

El Cornelio el fa prest a dir “scrivi”… ma scriver cosa? Tira fòr i to sentimenti, el dis!
Sentimenti … cosa voràlo dir? Cos’ elo sti sentimenti … L’ AMOR ! provante a descriverlo alora.
Sì, l’Amor per i genitori prima de tut. Mi son stada fortunada: en papà fantastico che adès purtropo l’è su lì … Ogni tant però el vèn a tirarme per i pèi quando fago masa la sema ! E l’ è sempre nel me còr. Na brava mama che me vol bèn e che no cambierìa con nesun’altra al mondo! La gh’è sempre quando gh’ò bisogn.
L’Amor per i fioi … sto chi l’è en sentimento che l’ è imposibile da descriver … son ‘pena nada a vardar i me fioi che dorme; ancor no rieso a capir cosa hò fat per meritarme ‘sti tre tesori. I me tre omenèti, ognun coi so pregi e i so difeti. Quanti basi, quanti abrazi, quante enrabiade che ogni tant (de spés) me ciàpo. Ma me luse i òci ogni volta che i vardo.
L’ amor per n’om …  boh, cos’elo? Ma sì che son stada enamorada anca mi tanti ani fa; l’ è quel sentimento che el te fa caminar senza che i pèi i toca tera: chissà se en dì tornerò a volar.
Pò gh’è l’ amicizia, na roba tanto semplize e complicada nel stes temp. Poder parlar de tut savendo de no esser giudicadi; podér ascoltar de tut senza giudicar … Rider, pianzer, cantar, sognar, far monade Ensema, questa l’ è l’ amicizia per mi.