Schizà denòr ala Sarca

No so perché e per come. Ma ancòi, festa dei laoradori, m’è vegnù ‘n mènt na storia bruta de un mòrt, laorando, propri pochi dì prima de nar en pension.

No me ricordo l’an, el dì, el més. Me ricordo el posto: riva destra dela Sarca, denòr al pont de Torbole, propri soto el vecio bar Mecky. E me ricordo, de pù, quel che gh’era entorno a quel sasòn de cimento. Che i pompieri i dovèva tiràr su … Soto, soto quel sasòn de cimento, gh’era sto por, vecio, operaio. E tuti, entorno, a spetàr…a spetàr per vedèr cossa era restà de que l’òm che tra pochi dì el sarìa nà en pension.

Gavèvo la machina fotografica en man. Avrìa dovù far foto per el giornàl. E ‘nvèze me son blocà. Enciodà. No dovrìa suzèderghe ste robe a quei che va sui posti dele tragedie per i giornai. I te lo dìs semper: ti schìza, schiza el boton de la machina. Che po’ vedèn cossa publicar.

E mi, quela volta, me sòn pèrs. Vedèvo tuta sta zènt, sentàda su le sponde dela Sarca. Gh’era anca dei putelòti en bràz a quei che me parèva turisti. Tuti coi oci vers quel sasòn de cimento. Perché forsi i se spetèva na roba tipo cartoni animati. Che na volta schizai i pàr dei tapè. E dopo i torna come prima? Me son smarì quela volta.

Ho portà en redazion foto sfogàe de qualcòs che podèva esser en sasòn de cimento, prima che i lo alzès. Prima che i portès via en d’en sachèt de plastica nera, quel pòr om che tra pochi dì el sarìa nà en pension. E che quel dì, pàr, nel disnàr de pochi minuti, l’avèva pagà da bèver ai so coleghi. Come se fa, come se deve far, quando finìs ani e ani e strussiamenti e se scominzia a pensar a … l’òrt.