SAORI, GNOCHI ALE ERBE

SAORI, I GNOCHI ALE ERBE

Oh, vel digo subit: no l’è la riceta dei strangolapreti. Se ve pias i strangolapreti v’ho zà spiegà come far. Alora dovè averghe sula taola, o vizim al gas o ‘n do volè, ma arènt demò, basta che la roba no la sia nel cesso o ‘n camera…o ancora da comprar: mez chilo de patate, zentozinquanta grami de farina che i ‘taliani i ghe ciama grano saraceno (l’è quela scureta, che serve anca per far la polenta carbonera per capirne), po’ en mazèt de basilico, do ciufi de salvia, zinquanta grami de buro, sal e…en pugnet de farina a parte che no taca tut zo…quando scominziè a far sbegazzi.

Entant lavè bem le patate. No serve tirarghe via la scorza: butele denter la padela quando l’acqua la scominzia a boir. Zò en pel de sal gross, come far la pasta, e lassè che le patate le vaga per vinti minuti. Quando è passà ‘sto temp (entant no stè encantarve: ocio che vinti minuti i passa en dena scorèza de temp) butè fora tut nel lavandin (cioè butè fora l’acqua, no le patate). Eco le patate fin che le è calde dovè pelarle e schizarle col…mister de l’ombrela, el coso, el schizapatate (dai cinesi el trovè per do euri).

Ghe sé envegnui a pelar e schizar le patate senza scotarve le manote? Bom, alora tut sul taol che avè preparà enfarinà co la farina che avè tegnu da cont (dovevo dirve anca questo? Ah alora en quei vinti minuti se nai a fumarve en zigaret? Bravi …) eco sul taol adès metè le patate schizae e ghe butè sora la farina scura e na presina (quel che resta tra do dei) de sal. E via co le manote a far la pasta. E su e zo, en qua en là. Na smacada, na tirada…ancora: vara che cosita no la va miga bem. Dai, dai che se no feven meio a nar al ristorante …

Pronta? Ciapè el basilico e la salvia: lavèi, sughèi e po’ via co la mezaluna, taiarli a tochetini fini. Ciapè ‘sta roba verda e butela nela pasta de patate. E via ancora co le manote. Piam, piam. Le robe fate per forza no le val na scorza. Se no ve pias empastar lassè star: deve esserghe passiom en ste robe, pazienza, voia…de far po’ na magnada de quel che entant ste magnando zà coi oci.

Na volta finì de far la pasta (vara che ve vedo: mi ghe darìa n’altra svoltoladina neh…) fè dei bigoloni longhi: mai fati? Alora basta ciapar en toch de pasta de patate e co le do mam averte farghe le gatizole, avanti e endrio. Po’ taiè i bigoloni a tocheti de do, tre zentimetri.

Entant avè mes a boir na padela con tanta acqua e ‘n po’ de sal. E sul gas (perché voi el so no gavè la fornela a legna…ah quela sì che la feva miracoi) metà anca na padelota col buro e la salvia che avè vanzà (l’avè vanzada neh…oscia alora v’en serve almen na desina de foiete o zinque foione).

Quando i gnochi i vei a gala, via che i vaga o meio su da la padela co l’arnes coi so busi che vei zo l’acqua. Ensoma metèi suti en d’en bel piatom e sora el sughet de buro ala salvia e anca na spolveradina de formai gratà (el grana se sa). Cossa beverghe drio? Diria en vin ros lezer (anca quel frizante el va bem, dipende dai gusti). Anca na sciavèta dai…