Ma ‘sa farésit tì co ‘sti orsi?

di Cornelio Galas

(al bar Primavera de Vignole)

-Pòrteme fòra per piazér la solita briòs vòda e ‘n cafè dòpi valà …grazie. Ah scusa, ma i giornài èi tuti ocupài stamatìna?
“Eh ‘sa vòt, gh’è su la storia de l’ors…”
-Ah … ho capì. E la Gazéta? I giornai taliani?
“Me sa che gh’è scrit de l’ors che i ha copà anca su quei giornài lì sat …”.
-Va bèm, va bèm … ah porteme anca en suco de narànz valà.

(en bànda gh’è el Berto col so bicièr de bianch en mam)

-Ehila Berto, zà fàta colazióm vedo …
“No l’è che sto calt te gài pù sé che fam cramento”.
-Zerto che ‘n bianchét ale nòve de matina, a stómech vòt …
“Oh bèlo, vàrda che sto chì l’è sol el secónt neh, el prìm l’ho dropà per resentàr la boca dale nocioline …che le è anca vecie quele che i tèi sul banch, ghe l’ho dit ala Pina … le sà de gnào cramento”.
-Gnanca en giornàl da lezer stamatina osc’ia.
“Ma sì tuti che i parla de sto ors che i ha copà, come se no ghe fùssa gazéri pù gròsi a sto mondo diaolporco”.


-Eh ma anca quei che l’ha copà, dai … i dìs che perfìm quel che l’è stà sgrifà da que l’ors el ghè restà mal quando i gà dit come l’è finìa…
“Bastéva che no ‘l nés a zizegàrl que l’orsa col cagnòt, col bastóm come i dis…”.
-L’avrà zercà de difenderse en qualche maniera no? Volerìa vederte ti se te vègnìs adòs l’ors neh.
“Tut màl no l’è quela secondo mi so màre …”.
-E quala èla alora?
“Mi digo che quando i ha portà i primi orsi, quei portài chi dala Slovenia tra l’alter che qualcós i sarà costai no? Eco, mi digo che quando i ha molà sti orsi nei boschi i dovéva pensarla che no i sarìa restài sol quei se gh’era màsci e femine enséma dai … E no l’è che quando l’orsa la fà i picoi la ghe mèta subit i colarìni no? Alora suzéde che no te sài pu dove i è e gnanca quanti che i è … quei novi digo”.


-Sì, ma i dìs che su tanti sol pochi i è deventài zidiósi, cativi ensòma.
“Ma l’è semper orsi osc’ia. Ghe piàs le pégore, el mèl, no i soporta quei che và per fonghi se i se svizìna ai picoi …no ghe vòl la scala o le scole alte per arivarghe … ah Pina, pòrteme do patatine e ‘n sprìz valà”.
-Però anca el Rossi a la televisiòm ‘l li ciàma grandi carnivori … no picoi carnivori. E l’ha dit che no gh’era alter da far a sto punto. Prima la sicuréza dei omeni (e dele done se sa) pò i orsi. E po’ d’istà gh’è anca i foresti che va nei boschi, i bòci …
“I dovéva pensarghe prima cramento. Meti che a forza de bastonàe fussa mort tute le vipere. Che fat mètit denter en par de pitoni al so posto che magari i te fà su come na stròpa um che va per ampómole?”
-Ma ‘sa disit su dai, no stà nè ‘n zèl nè en tèra sta storia dei pitoni, sèt zà embriàch?
“T’el dìsi ti. Mi so sol che prima che vegnìs sti orsi no gh’era tut sto ciacerar e sto casìm. I podéva lasàrli en dove che i era. Po’ t’hai vist no a so temp cossa ha fat i todeschi quando l’ors l’è arivà dale so bande. No i è miga stài lì tant a tirarla per lònch: bam. E che se ciàva tuti. Va su a dirghe qualcos ti …”.


-Ma zamài i orsi i gh’è, bisogna far i conti con lòri … i copénte tuti adés?
“No, gnanca se i volèssa farlo … no se podrìa”.
-E perchè?
“Ma sàt quant che gh’è costà tuti sti orsi tra ‘l comprarli, portarli chi, meterghe el colarìm, narghe drìo col canociàl, pagar per le pegore e i dani che i fà … e po’ tuti quei che ghe lavora drio, ‘sa faréssei? Tuti su al Castelér a engéssar le zatèle dei osèi cascai dai pézi? Dai, dai …”.
-No se dìs de coparli ma de mèterli magari en posti dove no i pòl far dani …
“Alora te pòi vènderghei a quei dei circhi cramento. O rifàrghe su la so vasca en Sardagna. O ‘n rezinto en piaza Dante così el fà corer quei che va lì a far casìm de not ..”.
-E portarli zò en Abrùz? O ‘n qualche parco?
“No me par che i gh’abia l’entenziom de meterli su ‘n camiom e portarli via. Sat che rider se i disés adès che i ha sbaglià tut fim dal prinzìpi? I deventerìa na barzéleta oltra a doverghe far qualcos alter a quei che stà drìo ai orsi, come te disévo prima no?”


-De zert, pu se ‘n parla e pù noi trentini vegnìm fòra come quei che no i bazìla a sbararghe ai orsi. Te sai cossa vol dir en inglés Laif Ursus? Vita orso. Bèm gh’è zà quei che parla de Did Orso. Morte Orso. Che varda che mi ‘l so l’ingles neh … a so temp gavévo anca na morosa da quele bande. Bem, i ne tòl anca per le bale, capìssit come?
“Quei che dìs po’ che no i vegnirà pù en ferie da noi per via de sta storia de l’ors … che colpa ghe n’hai quei dei alberghi, dei bienbì, dei campégi, dele osterie se i gà molà i orsi nei boschi e adés i còpa quei rognosi?”
-Sarìa come no nar pù en Giapone perché i còpa zò tute le baléne, o no nàr dove i màgna i cagni e i gàti … o dove i còpa i leoni perché no i sà che sàfari…
“L’è che l’altra volta, quando i ha copà la Daniza, i gà dat la colpa al màssa sonìfer més nele capète che i sbara per endromènzar ste bestie, adès envéze …”


-Ma sì, ancà lì, te l’hai endromenzà sto ors, te gài anca tirà fòra na gòza de sangue per l’esàm del dieneà, per veder se l’è stà propri quel a zacagnàr quel por laór … te gài mes el colarìm … osc’ia l’era meio coparlo subit se quel te gavévi en ment da prinzìpi no?
“Eco, eco …fa giùst cont. Adès vèi fòra na rivoluzióm che basta la metà. E se seitéra a pagar per i dani dei orsi oltra che nar nel bosch pregando de no encontrarli perchè, dìgo … meti che …”
-Ho capì cossa te volerési dir, meti che l’ors el lo copa, per conto só, um che se lo trova davanti de colp, come la meténte?
“Ma difàti … te poi enmaginàr se, come i dis de far, tiro fòra la bomboléta de peveronzìm per farlo nar via … se gò drìo en cortèl per netàr i fonghi mi gh’el fìco nel cul osc’ia … voi veder se ‘l se risc’ia dopo a vegnìrme al rèst”.


-Eh ma no so se te podréssi neh …
“Perché? Dovrìa star lì a spetàr che l’ors el stranùda? E se ho desmentegà la bomboléta?”
-Varda che secondo mi zerte robe, come per quei che te vei en casa per robàr, te podréssi farle sol de not, quando l’è scur.
“Massì, figurete se vago de not per fonghi …co la pila magari”
-Ah no so neh, per come la se sta metendo sta storia …
“Sat che digo? Ma làssa che i stàga nel so brodo valà, de zert fim che gh’è l’ors nei boschi no vago a zercarmela. Pitòst fàgo do passi da chi al bar Franca de Bolignam … vègnit anca ti che te ofro en biciér? Dai che magari lì se pòl lèzer anca la Gazèta … me pàr sol setimo algéri el Rossi co le moto gròsse … ah zamai l’è més pezo dei orsi quel putèl”

Questa voce è stata pubblicata in Senza categoria. Contrassegna il permalink.

Lascia un commento