QUANDO SARO’ GRANT …

di Cornelio Galas

Tuti, da bòci, dovévem rispondér, prima o dopo, a ‘na domanda che ne fèva qualchedùm: “Ma cossa vot fàr da grànt?”. Vegnìva fòra risposte semper, come dìr?, semper momolàde tra lèngua, boca e sguànze. Perché quei che te domandéva ‘ste robe ‘sa févei?

I te struchéva coi dèi ‘n tochét de la facia, en … en spizegòt, gnènt de che, tant per far veder che i era dei bonèra … e tì, come i t’avés fat l’anestesia … te disévi: “no so … forsi (ahia) el nnnotàiooo …. Sol perché gh’era en giro le ciàcere che ‘l notaio l’era um che ciapéva na carga de soldi sol se ‘l sgrifèva na letera co la so firma.

Po’, finì el liceo, m’era vegnù la mania de l’avocato. Sol perché gh’era Pèri Mèsom en televisiom alòra …

E po’ ho finì per scriver sui giornai. Dìr qualcos en radio, en televisiom … Scrivere anca dei libri. Comèdie, canzom, poesie. Adès, passa sessant’ani, som ancora chi che schizo tasti, pensa ti. E no so gnanc’ora cossa farò dal bom da grant. Perché se ritachéss via forsi m’empegnerìa de pù, scriverìa meio,magari anca en inglès, o sol en dialèt trentim, chi elo che lo sa …

Perché vardàndome endrìo vedo tute le monàde che ho fàt, quele che m’ha fat perder temp, soldi, perfìm la voia de volerme bem, pensa ti. L’è come se te fussi su ‘na coriera che prima o dopo la finirà en ‘den burom… te vegnirìa voia de sonàr el campanelìm sul plafòm (gh’elo ancora per domandar de smontar a la fermada che vèi?) de nàr zò, prima. De far el rest pù piam, a pè.

Ma no se pòl, ‘cramento. No se pòl. Ogni tant l’autista el se ferma, per quel. Ma no perché a qualchedum ghe stà vegnèndo su la piza. No perché gh’è quel che … ghe scapa da pisàr. No, el vèi lì e tra ‘n pater noster e n’ave maria el te dìs che zamài el bigliet l’è pagà per tuti. De star tranquili. Che na volta arivài se monta po’ su n’altra coriera.

Ma  ‘n do vàla pò st’altra coriera? “Tranquili, l’è ‘n posto pù bel. Dove no serve i soldi per star meio, dove podrè dal bom far quel che voléve far da grandi …”.