E PO’ TE TE SVEI VIF …

E  PO’ TE TE SVEI VIF …

sveglia-alba

di Cornelio Galas

Sì, va bèm, ti te sei pù lezù, pù studià de mi. E te ciàpi anca pu soldi no? Anca a mi me sarìa piasù a so temp deventar avocato, notaio. El disévo anca nei temi ale elementari: sì, volerìa deventàr siòr, no strussiàr per arivar ala fim del mes. No dipènder da nessùni, per gnent.

Po’, se sa, no l’è che quel che se pensa da boci pò ‘l deventa vera. Me som trovà a far el giornalista. Che l’era un dei me sogni, per carità, ma no ‘l prìm. No quel su ‘n zìma. E ho emparà tante robe da sto mistér.

N’ho viste tante, ne ho patìe tante, pù crós che briós, come se dis. Sóm arivà ala fim, al fùm de la candèla. Nar via da quel mondo per la disperaziom. Che quando arìva i zóveni, che quando te te sènti squasi ‘n de pù, l’è meio, crédeme, tòr su el scatolóm e nar for da la porta de la redaziom.

Zerto te resta ‘n po’ de magóm. Te sènti ancora le ambulanze che gòsa. E subit dopo … no te ciàmi pù l’ospedàl, per saver dove l’è nàda. Te lèzi quel che i scrive. E te vèi da rider de le volte. Perché i tranèi i è semper gualìvi. Perché ala fim se scrive semper de le stesse robe.

Te vèi po’ da pensar a quando i te farà l’òbit. Ai necrologi, ai ricordi: cossa dirài, cossa scriverài de mi? Meno male che a quel temp no ghe sarò pù. No, no podrò farghe la ponta ai bigoi.

Ma l’è destràni, sto nàr envanti. Sto savér cossa t’hai fat e no capir cossa te farai. Sto spetàr quel che pol suzéder da ‘n moment a l’alter e no capir, no voler savér, se ‘n sto moment, l’è propri l’ultima volta, demò, che schìzo tasti.

Te vegnirìa voia de bestemiar, diaolporco, per esser arivà fin chi e no savér quando finìs la to storia. Per no poder schizàr en botom e nar endrìo, e tornar de volta … ah quante robe t’avréssi podù far de meio.

Te vèi voia de pianzer e de rider. Ensèma. De dormir per no pensarghe. De star svéi tuta la nòt per no perder gnanca en minut de sta vita. De nar d’an prete e confesarte. De farse na docia co l’aqua santa. De gosàr: “Dài, dài … ti che te comandi tut, dime la verità”.

Po’ te t’empìzi en zigarét. Te vardi el zél. Te dìsi, da per ti, che forsi, domàm, te te svèi vif. N’altra volta. Varda tì …

Questa voce è stata pubblicata in Senza categoria. Contrassegna il permalink.

Lascia un commento