OCIO AL PESS …

di Cornelio Galas

sseee

Ocio che doman l’è ‘l prim de aprìl. Ocio … St’àm però no gò voia de far scherzi, tranquili, anca perchè me par che sui giornai e ‘n televisiòm zamai te trovi de quele robe che par en (brut) scherz tuti i dì. E che ‘nveze l’è propri robe vere. No me meraviglerìa gnanca de veder n’àsem che sgola. Che ‘n sàt, magari con ‘n drone soto el cul …

Bei tempi tut mal quando – col pòr Sergio Molinari – ne metévem d’acordi (oh, tra giornai concorenti neh) per embastir en scherzo de quei giusti el prim de april. E se sa che l’era pu fazile crederghe a ste notizie strane se le gh’era … su tuti e doi i giornai. En ricordo um, forse el pu bel, se gavè do minuti da butar via.

Nei ani otanta a Riva no gh’era gnancóra la piscina del Comun. Gh’era en progèto … carte che s’enmucièva a l’uficio tecnico, soldi che no se savéva dove nar a trovar, gnanca col capél en man su a Trent. Ale tante, ‘sti lavori i era partìdi. Piam piam, ìe … paréva che sta piscina la fussa zamai drio a esser empienida de aqua. E ‘nvéze gnente. Misure che no néva bem, el mistér de l’ombrèla che ‘l doveva esser fat en maniera diversa, impianti che doveva esser messi pù en sicureza. Tante gàbole, tanti gazèri. E sta piscina, finìa, semper seràda.

Alora mi e ‘l Sergio avém scominzià a ciapàrne per temp per far sto scherz d’april. Ensoma, articoi sul giornal prima del prim d’april: tra dése dì avérze finalmente la piscina, manca pochi dì a l’inauguraziom dela piscina, ieri i ha scominzià a scaldar l’aqua de la nova piscina. E così via fim al trentum de marz: Doman l’inauguraziom dela piscina. E ‘l prim de april: ancòi se inaugura sta benedeta piscina. Ghe sarà anca el campion de tuffi Klaus Debiasi, con el Cagnotto e altri campioni en fato de noàr. En rinfresco per tuti. La banda. E i boci i podrà anca far i primi bagni.

Quela matina lì, davanti a la piscina (ancora seràda, se sa) gh’era en sàch de zent. E ‘n mèz anca l’assessor al sport, el por Mario Albertini, encazzà come na bestia … perché nesùni i gaveva dit gnent, propri a lu, che l’era ani che ‘l steva drio a sto progèto. No l’è finìa: pu tardi, en redaziom, me ariva denter l’alora vicesindaco Umberto Benaglio. Anca lù encazà nero: “Cornelio, adès te scrivi quel che te digo: che el vicesindaco de Riva el protesta pu-bli-ca-mente contro el sindaco. Che l’ha deciso de inaugurar la piscina senza dir gnent ala giunta … no l’è questo el modo de governar”. Ero preparà però a sta presa de posiziom: el Sergio – dove l’Umberto l’era stà prima – el m’aveva telefonà: “Vara che mi gò dit che la publico la so nota …”. Però no ghe l’ho fata. Sem anca mezi parenti. E po’, a dirla tuta, me stèvo pisando adòs dal rider: “Umberto, vara che l’è en scherz …”.

Questa voce è stata pubblicata in Senza categoria. Contrassegna il permalink.

Lascia un commento