L’ORS E LA CAVRA 

di Cornelio Galas

En dì, ai primi de aprìl, denór ai tóvi, n’órs ‘péna levà dopo aver pasà i frédi scondù via, el gràta la schéna su ‘n pinàt, ‘l se dà na lavàda ‘al mùs e sdravacà su l’erba squasi squasi l’è drìo a ‘ndromenzàrse de nòf. I òci i era lì lì per seràrse (“e chi elo che l’ha dit che bisogna sveiarse propri ancòi?”) quando ‘l sènte el sòn de ‘n campanelìm.

“‘Sa èlo che rote adès le bàle? Vardè che som ancora ‘n pél zidiós”.
-Ah scusa órs, som mì, la càvra. Fussa per mi ‘l spacherìa st’agegio che i m’ha més endòs.

“No m’enterèsa de chi l’è la colpa. Digo sol che te m’hai ròt el sòm”.
-No ho fàt apòsta, dalbòm, credeme, stà li tranquilo, no dìgo bàf, torna a paióm.

“Te ghe n’hai dele bèle, cavra dal formài, sàt che te digo: m’è vegnù anca fàm”
-Bèm varda che, propri chi vizìm, gh’è le argne zamai piene de mél. E po’ ampomole, granzóni. I è giust là ‘n zìma, drio el boschèt.

“Tèi varda che no som vegnù co l’ultima nèf. Conoso le stagión, dai che l’è prest per tute ste robe che te dìsi ti …”
-Ma no, te digo, no conto monàe. Ti vegneme drìo, te verài che bom magnàr”.

“Ah no ghe n’ho voja, làsseme dove sóm. E po’, scusa neh, perché stracarse su quela pontèra quando da magnar ‘l gò chi vizim?”
–E ‘n do èlo che demò no ‘l vedo, dime dime così fém a metà.

“Te sei propri na cavra embezìle. Far a metà se podrìa anca … se no te fussi propri ti el me magnar”.
-Mì, te disi? E come farésset adès a magnarme che ‘l campanèl t’engoserìa? E po’ ‘l me paròm ‘l spèta el late, me sa che ‘l s’encazerìa.

“Ah ah ah ah (‘l ride l’orso) sat che te me fai squasi paura? Ma dìme, com’elo el to paróm? E come la narìa?”
-La narìa che se te me magni, lù el droperìa el fusìl. Ah ‘l sà nar a caza. Piem de corni l’è le pareane del so baitìm.

“Sì ma prima ‘l dovrìa ciaparme. E quando coro coro. Vorìa veder el to paróm col fusìl, anca ‘l fussa de oro.”
-Ti no te sài – adès te conto tut – cosa che i pensa de tì chi ‘ntorno. Che te fà casìm e basta da quant che te sei storno. Che t’avrèssi fat meio a star dove te eri, lontam, en Slovenia, senza far gazèri.

“Così i dìs de mi sti òmeni traditori? Te conto mi alor la storia de tuti i me dolori. Mi stèvo demò bèm, là dove ero nàt. Me mama, me papà e tuti i fradelòti. Nesùm se spaventéva, nesum che disèva gnente. Magnar lì ghe n’era, e l’aqua a la sorgente. En dì, un de quei bruti. Vèi lì dal vòs Trentim, zent con dele gabie grande e anca ‘n camionzìm. I gòsa, i zìga, po’ i tìra for fusìli. I sbàra sol a mi: e resto nei so fili. Me som endromenzà, tut colpa de quel brusór. E quando i m’ha svejà sentivo en brut odor. Ah, pòra cavrèta, no te sai gnent de noi. Ciapài, col colarìm, miga come voi. Sèm lì per far fazióm, fim quando no i se stufa. Disnar, zena e colaziom? No le è mai a ufa. Beate voi cavrète, anca col campanelìm. Te savèse cosa vol dir esser ciapài per el copìm …

La cavra l’aveva scoltà. Zùca e barbèta ensù. Mai la s’era squasàda, la pareva quasi ‘n gnù.

-Scolta òrs tristo, che vive a sgarbiàr, se te vòi te aiuto mi, almèm per el disnàr. So che no te piàs l’erba ma qualcòs te verài trovo. Làsseme vardar en giro, subit drìo el tovo.

Poch dopo l’era tornàda, la cavra dala baitèla. En boca la strenzéva qualcos … na fritèla.

-Per ancòi gh’è sol questa, nel bidóm dela sporcaria, ma ti credeme a mi troverò altra magnarìa.

Da alora l’ors el vegn, zo dal bosch de sora. Ogni dì,de corsa, semper ala stèsa ora. La cavra la ghe porta tut quel che la bina ensèma. E lù ‘l magna de gusto, come fùs na béna.

Col temp l’ha anca capì che la cavra l’è propri taiàda. Ogni volta che se ‘svizìna el paròm la ghe fa (per l’ors) na scampanelàda.