LA PASQUA DE STI ANI

di PAOLA CARLIN

E’ pena pasà la Pasqua e a mi le ricorrenze le me fa sempre vegnir en ment de quando ero piciola e spensierada. Quest’an l’ho pasada en modo en pò  strano e diversa dal solit: en giro per i palazeti de Pèrzen, Egna e Bolzan a compagnar me fiòl pù piciol a zugar a hockey sul giaz che l’ha fat en torneo internazionale durà quatro dì. Na stracada per mi, ma per i fioi se fa questo e altro.

Quando ero piciola mi envezi le robe le era tute pù semplizi e probabilmente èren anca pù sereni. Me ricordo che la domenega dele Palme molaven lì el capòt e meteven o na giaca pù lizera o se eren bòci la maia de lana “da meter sora”. No importava se le palme le vegniva en marz o en april, se la temperatura l’era soto zero o vinti gradi al’ombra … Se molava el capòt e basta! I dis che adès no ghè pù le meze stagion, o l’è fret o l’è calt; de sicur quando ero piciola mi le gh’era ancora e le palme voleva dir che l’era ora de cambiar stagion (ve ricordè anca voi che na volta gh’era la primavera?)

El dì de Pasqua neven a Messa e me mama la ghe tegniva che nèssen vestidi “dele feste”; no l’è come adès che vago en giro vestida come na sdrogia tut l’an. Cantavo nel coro dela Ciesa, anca se no capiso come fevo visto che son sempre stada stonada come na campana.

Dopo Messa me mama la feva en bon disnar, come quel de tute le altre domeneghe peraltro. No me ricordo de aver mai magnà cavreti o agnei (pòre bestie, lasantele crescer en cit prima de magnarle).  E gh’era de sicur na bona torta.

Me mama no la ne comprava mai l’of de Pasqua perché la ne diseva che ‘l costava massa e che l’era soldi trati via. Però la ne comprava sempre na steca de ciocolata gigante, una per un (eren en trei): mi la volevo sempre fondente. Che magnade de ciocolata ne feven! Chissà perché, ma gnanca mi g’ho mai comprà l’of de Pasqua ai me fioi e ho portà avanti la tradizion dela steca de ciocolata gigante …

El pomerigio se neva a zugar zo per i spiazi , oviamente dopo eserne cambiadi i vestidi dele feste. Me par de ricordar che no ‘l pioveva mai de Pasqua e de Pasqueta na volta …

El dì de Pasqueta gh’era la tradizion de tirarghe ai òvi. Noi gaveven le galine e per en par de stimane prima de Pasqua a me casa no se podeva magnar òvi perché i serviva per quel dì. I feven sodi e per farli deventar bei scuri e coloradi no se usava le sporcarie de coloranti che gh’è adès, ma se meteva nel’acqua de cottura le scorze dele zigole. Pù te ghe ‘n metevi e pù scuri i deventava.

Se tegniva da parte anca tante monede da zinquanta lire. Si, sol quele, le altre no le neva ben; le era dela misura e del peso giust, secondo mi i l’aveva fate aposta per tirarghe ai òvi. Le feven boir per no so quant per disinfetarle, perché po’ i òvi anca se mezi desfadi sei magnava oviamente.

Bon, tut pronto …  òvi sodi fredi e bei scuri e le zinquanta lire bele lustre …

Dopo disnar se neva sula teraza; se meteva l’òf vizin al mur ma no pogià se no l’era masa fazil ciaparlo, se decideva la distanza da tegnir e a turno se ghe tirava la moneda a l’òf. Ghera na tecnica per tegnir e lanciar le zinquanta lire. Se te ciapavi l’òf la moneda la doveva entrar e restar dentro; chi che ghe riusciva el se tegniva l’òf e el se lo magnava.

Me papà l’era bravissimo e pò doveven aiutarghe a magnar i òvi vinti se no ghe neva su el colesterolo. Coi ani sen deventadi bravini anca noi bòci e qualched’un en ciapaven.

Che bel che l’era, se pasava en par de ore a zugar ensieme genitori e fioi, e quante risade. Bei tempi, so che en qualche paes i ha mantegnù ancora sta tradizion.

Ormai per quest’an l’ei nada, ma chissà che la prossima Pasqueta no ghe tirante anca noi ai òvi (zerto che con la mira che gò … )

Però me ven en dubbio: i òvi podo comprarli, le zigole per le scorze anca, ma… LE ZINQUANTA LIRE EN DO VAGO A TORLE ???