‘SA VOLE’ DA MI ADES?

Ehi, ehiii, son mi, propri mi, la Dàniza, l’orsa che qualcheduni adès volerìa copàr o seràr via sora Trent, al Castelèr. Ve scrivo – perché mi son lezùa e studiaa pù de tanti de voi se no ‘l savè – ve scrivo per dirve do robe ‘n cròs che sui giornai e ‘n televisiòm com’ela come no ela no le va mai su. Alora, ‘ntant me ciàmo Dàniza no perché vegno da Niza en Francia ma perché co ‘sti nomi i batèza i orsi en Slovenia. Dove son nata. Mi là via stèvo benom. Nesuni i parleva de mi. No gh’avevo sto colàrin de fer che tra l’alter ‘l me dà ‘n fastidio de la madona. E no ero gnanc’ora sposada, no gh’avevo fioi. Me la passevo pu che bem. Corevo ‘n mèz ai boschi da la matina a la sera. Me fevo i me bei letarghi. Dormivo senza tor zò le goze per stimane. Po’ ‘n dì è vegnù chi zent dale vosse bande. I m’hà brincà. I m’ha mès en de na gabia. E dopo ‘n viazo che no ve digo i m’ha molà sui vossi monti. “Ràngiete” – i m’ha dit. E da alora – a parte ‘sto colarìm – l’è nada ognì dì pèzo. Perché ‘ntant no savevo pu dove nar a magnar, a dormir, a far i me bisogni. En Slovenia, a me cà, conossèvo tuti i posti giusti. Savèvo anca dove gh’era el mèl per esempi, i rami aposta per gratarme la schena. Chi da voi? Do passi de massa e te te trovi zent che va per fonghi, quei che gh’à la casòta en montagna e i magna tochi de vaca rostidi sul foch (po’ i dis che son mi quel che copa le bestie…), quei vestidi de tuti i colori che i va zò dai senteri co le bici (che se te t’encanti n’atimin i te ciàpa soto), ensoma ‘n casìn che no gh’avè gnanca idea. Lì no se pol nar perché se no i vei fora coi forconi, toti qua, toti là. Po’ quei che te fa le foto come se te fussi ‘n mostro che no i ha mai vist. I m’ha dit tra l’alter che propri chi, da voi, sti ani ghe n’era tanti de orsi. Mai l’ha copai tuti. Ma alora se la gavè su coi orsi perché sé vegnui en Slovenia a torne? Perché adès volè coparne perché sem massa tanti? Mi no capisso. No volè pu veder i circhi dove i fa balar i elefanti e dopo vegni a ciaparne e ne molè nei vossi boschi per cosa? Per dirghe ai foresti che en Trentim oltre a l’aquila (quela che adès zuga a palacanestro) gh’è anca i orsi tipo quei dei cartoni animati? Mi adès ho mes su famea. Gh’o fioi. En marì che dopo do dì l’è caminà e ‘l m’ha lasada chi ‘n sta bruta situazion. ‘sa faga, domanda per le case Itea? Per l’asistenza a domicilio? Ghe vol l’Icef? Mi domando sol de esser lassada ‘n paze. Se propri ve do sì tant fastidi…portème de nof en Slovenia. Che almèn là ghè ancora i me veci, me cosini, gh’ò via anca na tàna da dove se vede anca el mare. E nesuni i vei a roterte mai le bale.