LA FIM DEL MONDO

del Cornelio Galas

Ah no volerìa de zerto esserghe quel dì. Che vegnerà zò pali de fer, fòghi, sàssi, de tut. Ah no, no voi miga deventàr na statua de créa come quele de Pompei. Che dopo i te tóca, i te sbava ados, i lassa che la piòza la te ruga. Meio nar for dai tóvi prima. Meio lassar sto mondo prima che vegna la so fim. E star su le sue. No dir, no scriver, no pensar gnent che no sia quel che se deve dir, scriver, pensar. Meio no nar pu ‘n là de quel che se dovrìa. Meio no … far de pèzo. Meio far de meio. Che dopo, se sa, la narà mal, mal, mal. En casìm. Vegnirà i cavaléri de l’Apocalisse, quei co le trombe che sona la fim del mondo. Zo tut. Zità, capanoni de cimento. Come na guera. Zo tut. Na guera, na guera, l’ultima guera. E na volta tant non per colpa dei òmeni. Pareane che se sdelfa. Ciése, moschèe, sinagoghe che se smìgola. Quei che se beghéva tra de lori che no sa pù da che parte vardàr: ‘n do èlo el nemico? ‘n do èi quei che ne vol far del mal?
E ‘nvéze l’è da su alt che vei sto casim. No ‘n teremot, no ‘n meteorite. No qualcos de alter. Qualcos che no se credéva el podés suzéder. E che adés el suzéde … Tuti che core, avanti, endrìo, e no sa gnanca dove nar. Tuti che i dìs che forsi se se pol salvarse, ma no i ghe crede, no i ghe crede … perché l’è qualcos de brut, pu brut del brut che se podeva enmaginar.
E zo n’altro condomini. El sól che no gh’è pu. La luna che no gh’è pu. El mar che se alza. Con onde pu alte dei gratazéi. Scampar, scampar … ma dove? ‘sa far? ‘sa far? No so, no so, no so, crédeme, no so.
Zent che s’endinocia. Che dis Ave Marie e no se ricorda gnanca tute le parole. Zent che tèi soto i bràzi i fioi, soto sto diluvio. Che almen prima mòro mi de lori … E po’ quei che gira per ste zità dove no gh’è pù nesùni. E i roba, e i magna e i beve … se ciàva, se ciàva, che almén morirém contenti. E quei che no ghe crede gnancora che la sia finida, che i monta en machina, i fa ‘l pieno. E i va, i va … dove no se sa.
“Se l’è propri finìda – dis un – che la finìssa … ma ‘l decido mi”. E ‘l se sbara ‘n testa. N’altro el s’empica co le so tiràche. El strùssia … el strùssia. L’elastico el slonga l’agonia. Uno el se trà nel lach. Dopo do minuti l’è lì che ‘l nóa per tornar de volta. Perché ‘l vol viver osc’ia, viver … anca se tut entorno el dìs che no se pòl pù.
En matelòt restà sol el pianze. Na dona la lo tòl su. La lo varda. Come se varda n’oselòt cascà dal nìf. E che s’è spacà tute le alòte. La lo strénze contro le so téte. Per tegnirghe calt … fin quando deventerà frét. Per tuti e doi.
El Dio che dovéva esserghe no ‘l gh’è. No ‘l varda zo dal zel sta disgrazia. Ma tuti, tuti i lo ciama. Tuti, tuti, i ghe dà la colpa a lù.