EL TEMP, EL CUL, I SIORI I FA QUEL CHE I VOL LORI

Se tira fora sempre sto modo de dir quando el temp no l’è quel solit. Ensoma quando l’è sbalà. Quando el fa calt (e enveze dovria far fret), quando el fa fret (e enveze dovria far calt), quando el dovria eser mez e mez (e enveze l’è entrech). A la televisiom i continua a dir che pol suzeder ste robe strane. Po però i parla de tanti gradi sora o sot……o la media. De disastri che na volta no gh’era. Dai, dai, no stente a girarghe en tondo, qualcosa è cambià, ecome. E miga da l’an passà. Miga da algieri. I osei no i vei pu zò da la montagna perchè lasù i sta pu al calt che en campagna, nele basse. I orsi i gà do oci così, do ociae perchè i continua a remenarse, no i riesse a ciapar som…no i va en letargo. E credo bem, fora ghè zent che va a sciar en maneghe corte…Tei, me sposa l’altro dì la me ciama…varda, varda fora en teraza – la me dis. Vardo e ghè el limon coi fiori. Che fente – la me domanda – ghe metente sora el nailom o ‘l lasente star così come l’è. Ma ostrega che fente, che fente…e se doman ghè la gelada? Quei de la ciaspolada i và a tor la nef da quei che vende i gelati. Quei de Folgaria i la buta zò co l’elicotero (Ma gh’envegnerai fora co le spese? L’elicotero el costa…boh). Ma ensoma, chi no è sparì sol le meze stagiom, le è nae a farse ciapar anca quele entere. Da chi a ‘n po se te voi nar al mare te tocherà tor le ferie en febrèr…e nar a sciar en luglio. Vendemar en marzo, far avanti e ‘ndrio a lecar gelati sul coro en novembre, sposarse poc dopo la fim de l’an (che porta fortuna), vestirse en maschera a nadal e far el presepio en agosto. Feme smontar che me gira la testa e me vei da butar su…

Questa voce è stata pubblicata in Senza categoria. Contrassegna il permalink.

Lascia un commento