EL MAIALE EN SAOR

SAORI, el maiale en saòr

MaialeSaor

Entant ve digo cossa serve (per sei che magna: se sé en trei, fè la metà, se sé en doi basta en terz de tut se sé en quatro…fè voi i conti a ocio, che ve diga).

Alora: en chilo de spala de maiale (de rugànt) senza òssi, quatro eti de lat, trenta grami de buro, en bicièr de asèdo bianc, na zigola, ai (no en spìch…), rosmarin, farina, prezemol, brodo, oio del nos, sal e pever. Taiè su a tochetìni l’ai ensema al rosmarin e al prezemol: rodoleghe denter la carne. Lighè su tut co la gavèta come per far l’arotolà.

Entant en de na padela scaldè el buro con en cuciar de oio, denter la zigola taiada che v’è vanzà (no v’avevo dit de vanzarne? Vel digo adès…).

Denter el rodolon de carne. Na spruzadina de asè e lassè che la padela la faga quel sfrisss con ‘n po’ de fum (senti che bom odor…). Oh, no stè spetar che brusa tut… Denter el late e do mestolini de brodo (no l’avè fat? Oscia se el gh’è nei ingredienti vol dir che el serve no…).

Quertè tut (con cossa? Gavrè en cuercio…qualcos…no co le mam che ve scotè). Fiama del gas (perché el so che no gavè la fornela…) bassa. Ogni tant svoltolar el tut. Almen per n’oreta. Oh deghe n’ociada neh…no stè nar a far do ciacere en Fesbuch o al bar …

Na volta che vedè (e tastè) che l’è pronta, en bel tabiel e via a taiar le fete… Arènt la so bela polentina. E mi ghe beverìa sora en rosato. Sarìa en pecà smarzir tut co l’acqua.

Questa voce è stata pubblicata in Senza categoria. Contrassegna il permalink.

Lascia un commento