El gerìm dei zimitèri
di Cornelio Galas
Me som semper domandà, fim da bòcia, perché i méte quel gerìm ‘n tra mèz a le tombe nei vialéti dei zimitèri. Quel gerìm, per dir, che fa quel ciàs, zìghete, zòghete, crampete, crimpete, anca se sui péi no te gài le zavàte.
Per mì l’è qualcós che no l’è lì tant per èserghe. I l’ha studiàda, dai, sacranóm. Te vai – miga sol el dó de november – a trovar quei dei toi che i ha més a so temp zó, e te devi per forza pestàr su quei gerìni. Che i te dìs, pàs dopo pàs, che ti te camìni dove altri pù no ì pòl caminar. Che i te dis che anca ti, meio tardi se sa, te deventerài zéndro, polver, tochéti de … gèra.
E su de ti caminerà altri, prima de eser anca lori caminai da sòra. Ma no l’è quel che me fa pensar. Pitòst altre robe che gnancora so. Per esempi: èlo véra che al de là, con Dio, Buda, Manitù Allà o altri, tutmal ne troverém de nòf ensèma? E se cosìta la và a finir, sàt quanti gazéri gavrém tuti ancora? Quel che m’ha portà via la sposa … o quel che ha copà tanta zènt. Quel che féva ‘l bel ‘l brut, sol per quel che ghe vegniva de volta. Quel’alter che no l’era zamài content. E quel che me toléva semper per le bale? E quel che l’ha robà le migole dal zést dei poréti?
Disente che de là ne troveréssem tuti, bei, così così, tuti i bruti. Qualchedùm, ne tegnirà a ùm o podrém far quel che ne vèi? Perché sat che vendéte, che pugni, che bòte, se i ne làsa far quel che gavém ‘n testa. Perdonar i torti, le magagne, i dàni? Ma per piazér, ‘n do sarìa alora sta giustizia divina.
Ah mi no fàgo gnent, ‘l giuro, basta che Dio (o altri) i faga ‘l rest. Perché anca se de là comanda i siori, i preti, quei racomandài, quei che no se pòl tocàr, déme na smartelàda valà, che mòra dal tut. Così forsi podrìa anca desmentegàr…
