Dòne e soldi, sol per mi

di Cornelio Galas

Putèi, gò squasi rispèt a dirlo. Anca per el fato che no me pias far envidia, pitòst pecà. Ma tanto no me crederé mai. Da ‘n po’ de temp – no so perché e percome – sèita a capitarme tute le fortune de sto mondo. Odìo, no l’è che ho ancor desfrutà ste robe bèle ma som sula bona straa. Scominziem co le done. Che ala me età, se sa, le deventa ‘n po’ come l’uva (malmaura) dela famosa volp sol oerché no l’è bona de saltar fim al ram.

Bem, sul compiuter, co le mèil, ghe n’è tante, e po’ tante, e po’ pù tante, che … ensoma, avé capì, meio no farghelo saver ala sposa. Se ghe dés da ment a tute me digo che sarìa zamai ciucià dale strìe. Disente alora che speto l’ocasióm giusta. Le dìs, ste done nel compiuter, che no gh’è problemi. De pù: ghe n’è de vizine trezento metri a mi: osc’ia no sarà miga quela biondàza che lavora al bar?

Dirè: varda che ste chì ala fim le te domanda soldi. Nesùm problema, sacranóm, perché, semper sul compiuter, m’ha scrit na zerta miss Anna Moris (forsi con do “ere”) che la deve vegnir a esser na neoda de quel che fa i zigarèti e ‘l dovrìa ciamarse Filips, Filipo ensoma. Bem sta chì la dis che la dovria ciapar do milioni e mez de dolari da na parente dale me bande (da Vignole? Osc’ia bela questa, a saverlo quando gh’era i tabachini serài).

Sol che la dovrìa brigar, vegnir aposta dala Merica e alora basteria che metés mi entant sul me cont quei soldi che dopo l’è pu comoda a torse i pu tantie lasarme en premio, disente a ocio e cros, gros. Basta sol che mi daga el me numer de cont o dela carta de credit. La fa tut ela.

Semper per i soldi, per meil m’è arivà (sol a mi neh) en cine picol de una che te fa veder come guadagnar zinquezenti euri al dì. En zògh da puteloti. Basta che te schizi de chi, te vardi de là, te compri aziom, te le vendi. El fato che sia na roba seria se ‘l capìs anca chi che i te mete tuti i guadagni sul to cont (basta darghe i numeroti) miga sul só.

E dopo gh’è scrit come i s’è trovai altri, semper co sto sistema. Oh, tuti contenti. Gnanca uno che no ‘l se sia sentì tràta mal o che l’abia gavù qualcos da questionar.

Ades vago al mare co la sposa per quindese dì. E na sera ghe la buto lì (miga la storia dele done, se sa): “Tèi, meti che guadagnès zinquezento euri al dì …”. So che la penseria subit a borse e scarpe nove e no la me domanderia gnent de alter. Capì come?

Questa voce è stata pubblicata in Senza categoria. Contrassegna il permalink.

Lascia un commento