DIAOLPORCO

VARDANDO I GIORNAI VECI

di Cornelio Galas

Quando scrivevo su l’Adige gavévo – fim dai primi ani neh – ‘sta manìa: quela de sbregàr le pagine che m’entereséva e méterle da na banda. El rest el serviva per sbianchezàr, per netàr i vedri (i vèi bém, mèio che col Vedrìl), o a me papà en falegnameria quando gh’era da ‘ncolàr e ghe voléva qualcòs en mèz che no fés nàr zo le goze.

Bèm, quando è arivà i compiuter en redaziòm l’è stà tut pù fazile. Perché bastéva schizàr ‘n botóm e te “salvévi” quel che t’enterésseva. Me sóm fat così, dì dopo dì, n’archivio: en scatolóm per i tòchi de carta, dele cartéle sul compiuter per i fàil salvai.

E adés basta nàr a zercàr per tema qualsiasi roba. E vèi fòra cosa se scrivéva, ma soratùt quel che se diséva anca ani e ani endrìo. Praticamente su tut. E l’è quel che méto su Televignole soto il titol “Misciòti de giornai vèci”. Gh’è tanti che me scrive adès: che i volerìa n’articol del domiliedó sul tal fato o quel che diséva el tal dei tali su quel problema, o la foto de na squadra de calcio …

Se ghe la fàgo zérco de contentàr tuti. Agratis, se sa. Oh, gh’è dele vòlte che l’è ‘n casìm neh vegnìrghen fòra. Miga ho archivià tut de tuti i giornai. Tra l’alter quando avéva ciapà fòch la vecia falegnameria de me pàre … en par de scatoloni dei ani setanta i è nài a farse benedìr …

Tut mal gròso modo se capìs quel che è cambià en Trentìm nei ultimi quarant’ani. Cossa? dirè voi. Ve rispondo en maniera scièta: “Poch o gnent”. Ma prima de scriver altro ve conto en par de fàti (veri, no monàe) che forsi pòl spiegàr quel che volerìa butàrve lì …

Alòra. Nei ani Otanta el pòr Sergio Molinari (che no riésso ancora a farme na resóm che no ‘l ghe sia pù) el lavoréva a l’Alto Adige (così se ciaméva prima el Trentino) nela redaziom de Roveredo. En dì el torna dale ferie – così el me l’ha contàda – e come tuti quei che torna da le ferie el varda, se sa, quel che i altri i gà lassà nela cartèla. Nela cartèla (che l’era na tèca) de solit se metéva denter i articoi da publicar.

En pratica, quei che per diversi motivi no i era nài sù ‘l giornal prima … o perché i èra massa longhi, o perché era arivà en necrologio proprio en quel posto dove el necrologio el doveva nar, o perché i èra massa corti per quel tipo de menabò (empaginaziom). Ensoma, per farla finia, i èra restài lì “en mùa”

‘sa fàlo alóra el Sergio, ancora abronzà dal mare, poca voia de tornar a laorar, e de no nàr pù envéze al bar, a zugàr a carte, a ciapàr ‘l sól? El tira fora na sbrazàda de sti articòi veci e ‘l scominzia a meterli nel menabò. Stando atento, se sa, a cambiar quando se trovéva “ieri”, “domani”, “L’altro giorno” … con “recentemente”, “nei giorni scorsi” o adiritura lassàndoli senza date quando no se capìva bem.

El dì dopo, cosita, và fora na pagina de Roveredo praticamente identica a quela de ‘n més prima. Zà, perché quei articoi i èra zà stadi publicai e méssi per sbài en quela teca famosa … l’era copie ensoma, non articoi restai lì spetàndo el so turno.

Eco, tut quest per dir che ‘l dì dopo, nesùni (par sol n’asociaziom che l’aveva eleto el diretivo sì, ma dopo l’aveva anca nominà el presidente … e ne l’articol no ‘l ghera) s’era acòrt de quela pagina … vecia. De pù. Par che adiritura qualche partito el sia entervegnù per risponderghe a quel che – el mes prima, magari en temp de ferie el pòl scapàr … – n’altro partito l’aveva scrit.

N’altro fato: per sbài, su l’Adige stavolta (mi no gh’ero en redaziom però … se no magari févo ‘l stés sbài) và sù en luglio, le clasifiche de na gara de sci. E no sci estivo o coi rulli neh … propri sci da inverno …en Polsa de Brentònech. ‘sa suzéde? Telefona un de quei che avéva fat la gara: “Ma ‘cramento, ve l’avevo dit en tute le maniere che avé copià mal el nome de me fiol … e ancora zamài el meté sù sbaià”.

Sergio Molinari

Tut sto giro lonch per dir che sui giornai veci, anca de tanti ani, gh’è robe che le podrìa esser stà scrite anche ‘n sti dì. E lassém stàr la Lopio-Busa, l’ospedal de Arco … sarìa come vinzer fazile, zugar a carte scuèrte. No, anca en politica: dove se parla de pensiom da meter a posto se no i conti no i torna, de la sinistra che no la se trova tant bem … coi altri dei sói, de i autonomisti che no i sà pù ‘n do tacàrse per nar al governo, de … la lege eletorale che bisogna cambiar osc’ia.

E po’ el nof ospedal de Trent, i vitalizi a Trent e Bolzam, benzina che va su e zo, zent che sfugna, quel che vive soto i cartòni, el massa calt, el massa fret, la nef che no vèi pu, le mèze stagiom finide, Dellai dapertut, bèghe per l’òrs, putèi che no trova da aloràr …ma no vòi rovinarve la sorpresa, né a veder sti “miscioti” e ‘l capiré da voi … che anca questo l’ho scrit dèze ani fa. No,no, scherzo neh.

EL NADAL DE NA VOLTA

No so perché, forsi dovrìa farme veder da qualche dotor che conós le malatie del zervèl, ma fim da bocia el Nadàl el me fà star tristo. Sì, anca se ‘rivéva i regài, anca se no se néva a scòla, anca se – propri ‘n sti dì – no gh’era problemi de dólzi en cà.

No so. Ma me paréva – e me par ancora neh – che fussa tuta na roba per finta. De colp tuti che te féva le feste. E che mal quando i te tiréva le sguanze … ma che bel popìm … Po’ – da Santa Luzia fim ala Befana – la néva de fighi sechi, de mandarini, de tòchi de ciocolata, de panetoni. Se podéva star su a zugar fim a tardi, anca dopo Caroselo. E quando arivéva i parenti gh’era altre robe da zacar, altre feste.
Ma – osc’ia – manchéva semper qualcos, dopo. Zà, perché finì le feste, se tornéva al solito tram tram. Guai a domandar la fugazèta se no l’era doménega. Guai a star lì, col ciucio, dopo Carosèlo. Guai a sperar de poder zugar a balom de soto dopo marenda.
Ades? L’è cambiada la storia. Gh’è pasegìni che gira nei ristoranti anca sul tardi. Putelòti che – t’el vedi – i è nervosi, i gà sol voia de dormir – che stà lì a pianzottàr, a remenarse fin quando la copia lì vizim la pianta lì el dòlz: “Nem valà, che me par de esser a l’asilo …”.
E prové a regalarghe fighi sechi e mandarini….i ve le tira drio. Se la va bèm.

SEM SOL DE LE BESTIE …

Ho vist, scrìt, fotografà, lezù, storie for de testa. Zènt che ha copà per dó soldi. Omeni che ha violentà neóe. Quei che ha fregà anca so màre. E quei che … no te l’avréssi mai dìt. Sèm bestie, bestie, che al posto dela còa gà … el màl de schéna. Che drópem i péli de altre bestie per tegnirne calt. Sém bestie, bestie. Che se gh’è da scampàr dal fòch, schizém tut e tuti pur de nar fòra… Sem bestie, tra omeni e done, quando se trata de vegnìr ale mam … sém bestie, che ogni tant và ‘n cèsa, o ne la moschèa. Ma quando vegnìm fòra … sém ancora bestie. Che va bèm tut, che la lège se deve rispetarla … ma guai se te me ròti le bale a mi.

ME GIRA LA TESTA …

Me gira la testa. Sì, sto deventando propri vecio. No capìsso pù gnent de quel che i dìs ala televisiòm, de quel che i scrive sui giornai, de quel che te vedi su sto argagn de compiuter. Na volta o t’eri comunista, o t’eri democristiam. Po’ gh’era anca le vie de mèz … republicani, liberali, socialisti democratizi e po’, da l’altra, i proletari, le brigate rosse se propri te volévi far casìm. Adès? Gh’è ‘l Pd dove gh’è denter de tut. Gh’è la Lega, Forza Italia, Alfano. Dove gh’è de tut. I me domanda en sì o ‘n no a cossa? Per tegnir tut mal en pè el Senato? No èrel meio scancelarlo e basta? E la lege eletorale? No, questa no la me piàs perché con questa te vìnzi ti … Ah me sa che ala fim per cambiar tut no se cambia gnent. Robe zà viste.

GIUST COME ALGERI … 

Giust come ieri. No è cambià gnent. Giust come ieri. Som vìf, ciàmeghe pòch. Giust come ieri, algéri per dirla giusta en trentim. No è cambià gnent, per fortuna. Respiro ancora. Stò sule me gembe. Ragiono, ‘cramento. No gà bisogn de badanti. Epùr no capìsso bem quel che suzéde ‘n sto mondo. Ha vint Trump en Merica? Cristo, me sà che sem messi mal … El fà sù i muri col Messico? Ma se a berlin i l’ha butà zò quel che gh’era … Ah ma se vede che la globaliziaziòm no la và pù bem. E ti stasera te vài ancora a magnar al Mec Donald? E ti domàm te pénsi che la narà meio cosìta? Ma bévete na coca cola valà. Che almén te fài en rùt …

E tim e tam e tom …

Sbréga la carta, po’ tira l’aqua, alza la testa, vàrdete drio. Che l’è da lì che vèi le sorprese. Che l’è da lì … da quei che no t’avréssi mai pensà. Po’ và fòra, piam, ancor pù piam. ‘tento ai cantoni, ‘tento ai spìgoi. Via col cul denór al mur. Via fin che te par d’avérghel dur. E zó che i arìva, i pali de fèr. E zó che i vèi quei dal formài. Ti và envanti, fin che te pòi, ti dròpa l’ombrèla, se te la gài. Sto mondo, caro, no ‘l te regala gnent. Se ti no te ghe regali … qualcòs de tuo. Ma pol dàrse che ‘n dì – oh, no te prometo gnent – qualcos, qualchedum, el vegna su la tua. E che ‘l te diga: “Ah, pòr sfigà che no te sei alter, te dago na mam mì valà …”. Ocio, perché, l’è propri alora che quei che ha capì el tài del prà i te la mónze. E i te tira la giachèta da la so banda. Come el “ladro” el ciucia el vim. Te te troverai, demò, pù lezèr, e da la banda giusta, te dirai. Fin quando no se vòlta el vent. Che alora, oltra a la maièta en pù, te servirà. credeme, anca le mudande. De fer.

E DE COLP TE VAI SU …

E te vegni fòra dal zimitèri. Dove i ha ‘péna mes zó to neó. de gnanca vintitré ani. L’è longa da lì a dove t’hai lassà la machina. Se fà a pè quel che s’é fat a nar. L’è calt, se suda co la giachéta. Mì pò, semper pu cicióm. Ma no l’è quela so mare. No l’è quel el concèto, come diséva el Flavio Coradìm al liceo de Riva.

Se torna de volta senza ‘l Filipo. Che adés l’è soto tera. Che adés no ‘l gh’è pù. E te fai el Gavia, el Tonale, stràe strete, meio sonar. No la finìs pù sta stràa per nar a Vignole. Da dove sem partidi stamatina prest. E nessùni che parla.

Nessùni che dìs bàf, en sta machina che la va, la va … pù voida de l’ultima volta. Come se manchéss qualchedum. Che no gh’è pù. Come se tra ‘sti sgrebeni, prima de trovar el sfàlto e qualcòs de pu larch, se sia fermà anca el mondo.

Come se drìo fussa restà qualchedùm desmentegà. Da tòr su. Da portar en pizeria. A far na ridua. A sbevazàr bire. No, el Filipo no ‘l gh’é pù. I l’ha mes soto tera. Poch prima che néssem via …

SCORLA LA TERA, SCORLEM TUTI

El sò. No bisognerìa mai spuàr nel piàt dove s’è magnà fim l’alter dì. Ma se ciàva. Anca per el fàto che ste robe chi le ho semper pensàe. E pù de  na volta ho begà en redaziom coi me capi. Che sia per quel che no ho fat cariera? Tutmal no soporto pù, quando suzéde disgrazie come quela del teremot de pochi dì fa, le interviste, i servizi en direta, quei che sa tut de tut.

No se trata de far de tut na fasìna, neh … Però, osc’ia, quando l’è massa, l’è massa dai. Me ricordo quando gh’era stà el teremot nel setantaséi a Riva. No gh’era stà morti. Però dani grossi. E famée che aveva dovù star for de casa per ‘ pèz. Mi ero zóven, alóra, ma i veci giornalisti de l’Adige, i m’aveva zà fat capir el tài del prà: prima roba, mai róterghe le bale a quei che no i sà gnancora de esser al mondo dopo na bruta storia. Seconda: mai far domande tant per farle. Terza: zercàr de capir come l’è davéra messa la storia. Ensoma l’ambaradàm. Terza: no tirar fora le solite tiretere.

Bem. N’ho vist, lezù, scoltà assà de sto ultim teremot en sti dì. Uno che el parla del fato che i deve nar via co la televisiom perché gh’è casini, perché lì no se pol star. E …’l pàr anca encazà cramento. Va bem. Ma ‘l parla sol de quel … entant. N’altra che la me spiega per dese minuti quel che era suzés a l’Aquila … el savém, el savém. N’altra ancora che l’intervista na psicologa che ghe stà drio a quei restai senza gnent. E la psicologa la se tèi la sciarpa su la boca: no se capìss gnent. Trane che sta zent ades la gà problemi. No l’avria mai enmaginà …

Po’ quei lezui e studiai. Che i dis che quele case bisogneva farle su en maniera diversa. Ah d’acordo, ma m’hat mai dit prima dove trovar i soldi? I sospende i mutui quei de le banche. Grazie. Gh’è da pagar qualcos? Perché la casa tòta col mutuo no la gh’è pu e no podo gnanca ipotecarla.

Parte iniziative per tor su soldi per i teremotai. Dapertut. Tanti però i domanda: “Sònte sicur che dopo i arìva dove i dovrìa arivar?” En televisiom i fa veder na pora dona vecia: i gà sistemà el let su en furgom. Oh, nesuni che ghe dis al fiol che forsi la starìa meio da n’altra banda.

Entant gh’è zent che scomete sui morti. Dese euri che i è de pu de quei de l’Aquila. Ma se ciàpa i soldi sol ala fim … E quei che dis: dai che fem l’amatriciana. E do euri de ogni piate l mandém en zo. Sì, dai magnénte tuti l’amatriciana, così ghe dem na mam …

DAI CHE NEM A MAGNAR EN PAZE …

bar-andora-menu-scaccia-clienti-203355

 

No gò gnent contro i bòci. Som nono, zamai. Anca mi me son trovà con fioi picoi. E anca mi son stà bocia. Anca mi en combinevo de tuti i colori, no stèvo mai fermo, corèvo e zighevo. Ma me sa che piam piam la s’è voltàda, la storia.

‘Na volta, per dir, quando se nèva a magnar fora (la piza e l’aranciata, stop) ensema ai nossi veci, se te scominzièvi a frignar, far gazèri, zugàr coi tochi de pam e far robe che podéva dar fastidi, la néva de scopelóni. E se dopo el prim scopelóm no t’avevi capì bem cossa t’avressi dovù far (o meio,no far), te n’arivéva n’alter. Con to papà che ‘l diséva: “Questa l’è la prima rata, el rest t’el ciàpi dopo a cà”.

Adès envéze l’è i puteloti, me par, che comanda. Dapertut. E soratut quando te pensi de poder magnar tranquilo perché vizìm (prima) no gh’era che n’altra copiéta come noi, co la candelina empizzada e ‘l vaso coi fiori (anca finti magari) che … capì come?

No, ariva enveze a quel punto i barbari. Grandi, picoi, medi. Oltre al scaregamento che no te capìssi se i è drio a traslocar o cosa, tàca via el gnio gnao dei passegini (secondo mi i dovrìa farghe pagar el bol e l’asicuraziom come i autini vist che i è semper pu grandi), i te dà denter anca nela schena, ma tanto, l’è en passegim neh, miga en cararmato, par che i te diga.

Quando ale tante i se senta zo tuti quanti, i popi i scominzia a far el concertim coi pironi, coi cuciari, coi cortei. Quel pu picol enveze el bate i pugnoti sula careghèta tacada ala taola (che quei del ristorante i deve averghe neh, se no no vegnim pu chi … magari osc’ia), fin quando ariva el magnar. E per en po’ le boche le gà tute qualcos da far, trane che parlar e zigar. Ma dura poch sta calma. Perché qualchedum se mete de zerto a pianzer come se i lo stéss fracassando de bote, quei pu grandi i taca via a correr tra i tavoi fasendoghe far le gimcane ai camerieri e i so genitori …

Eco, l’è quei che secondo mi i risc’ia ades de ciapar scopelóni dai fioi se sol i tenta de dirghe qualcos. Perché n’ho vist pochi de quei che a ‘n zerto punto i ghe dis ai fioi de no far casim, che sem al ristorante no en piazza o nel cortil de casa. E anca quei che ghe dis qualcos a sti boci enmanegai verdi i fa ancora pu casim: “Andreaaaaa, silenzioooo …”. Che l’Andrea par che no ‘l senta quel che i gòsa, quel che anca en cosina i ha sentù.

E dopo torna tut come prima. Na volta che l’ho dit, en d’en ristorante, al mètr (no per quel l’era ben pu alt d’en metro neh) e cioé: “Cossa me diseresselo se de colpo scominziés anca mi a far i concerti coi pironi, i cuciari i cortei? Se scominziés a zigar e po’ anca a correr su e zo dal locale? E se la me sposa la zighés: “Corneliooo …. fa zitoooooo” ?

“Eh sa – el m’ha rispost – se queste mura, questi tavoli ma soprattutto quel locale di là dove .. non visti ogni tanto ci sfoghiamo, potessero parlare … ma non possiamo fare niente. Pensi che l’altro giorno un cameriere inciampando in uno di quei marmocchi ha rovesciato gran parte delle portate addosso ad una signora. Non le dico quanto ci è costato l’incidente. Però le dico cosa hanno detto i genitori di quel bambino … nulla.
Ah, desmenteghévo. No parlo miga de sagre paesane, mense de le fabriche, feste ala fim de l’asilo, posti dove te magni tant al chilo neh …E no ho desmentegà envéze el casim che fa anca i grandi. Quando per esempi i parla col vivavoce al telefonim. E dopo, se ‘l t’enterroghés su quel che l’ha dit, te savréssi risponder tut giust, a memoria. Ma gavrém modo de parlar anca de ste robe chi …

BASTA EN TOCHET DE PLASTICA …

728px-Open-a-Door-with-a-Credit-Card-Step-2-preview

La me fà ‘n dì la spósa: “Tèi, hat sentì ala televisiom quanti ladri che gh’è en giro? L’è propri ‘n caso che no i sia ancora vegnui a trovarne. Che po’ el digo tuti i dì a tì e a to fiòl de no lassar averta la porta de soto. Che ‘n dì o l’alter ne i trovém en casa con tuta sta delinquenza che ghè ‘n giro. E tut mal sarìa forsi el caso de far qualcos per quela porta che zamài no serve gnanca na spalàda per butarla zo: basta che ‘l cagnòt el ghe daga en colp co le zàte …”.

Ogni dì l’era quela. Ogni volta che gh’era sul foi de cà netàe dai ladri tachéva via sta sólfa. Fin quando, stuf e agro de ste litanìe, hoi ciapà el sach en zima e som nà da un che vende ste porte … che ghe gnanca cole canonàe – i dìs nela reclam – te le buti zo.

I m’ha spiegà tut per bem. El perché, el percome. Ensoma, son vegnù su le sóe: “Va bem – gò dit – dai che metem su sta porta blindada a prova de calcagièra, bombe, tir che dovèssa sbagliar stràa … e soratut dei ladri neh.

I vèi a misurar. Po’, dopo en par de disgnoti, el me fa l’om dele porte blindae: “Eh, me sà che dovrem anca far mistéri da murador, scortar sta pareàna … massa larga”. E mi: “Alora la vegnerà a costar de pu enmagino …” – “No, no, dopo ne metém d’acordo, ma varda che per ste robe chi te ciàpi endrìo co la pensiom metà dei soldi spendùi en dese ani … l’è n’afare farlo ades co ste agevolaziom”. Entant che penso se durerò ancora dese ani per averghe endrio i soldi, n’operaio el varda le piastrèle … “Eh me sà che dovrèm farghe na zonta per nar a livel”. Mì tàso: “Afàri lori – digo tra de mi – no te volerai miga che sbassa tuta la casa per nar al livel de le piastrele …”.

Ariva ‘l dì dei laòri. E per la prima volta (avràla ciapà na pàca ‘n testa?) la spósa no la dìs gnent anca se ghè polver dapertut e l’è en nar avanti e endrìo de zent che sporca, e se porta drìo pacièca en casa. Che de solit se mi no vago denter en casa zopegando per tor le pianèle … l’è zìghi che i sènte da chì fim a Bolzam, se ‘l vent el va en sù. E da chi, da Vignole, fim a Verona, se ‘l và en zo.

Tut mal, dai, ala fim vei fora anca en bel laorét, dai. Quando te seri la porta te par de seràr quele caseforti dei cine, quele grose che ghe se vol la combinazion prima, e na bela forza dopo …

Po’ te sènti: “cloch”, propri cosita, quando te sèri. Tèi, l’è blindada la porta, no l’è miga en zugatol come quela de prima. Te te senti pu sicur na volta denter casa. Come dir: voi veder ades cossa che fà i ladri. Perché ghè anca el spionzìm no? Te poi anca saludarli, farghe l’ocièt, torli en giro se de là i scominzia i ruscàr. “Dai, provè a vegnir denter adès se sé boni, dai che voi veder come fé …”.

Passa ‘na stimana, ne pàssa doe, passa ‘n més, ne passa trei. Tut bem. “Vist? Bastéva poch per star en paze … se no gh’ero mi però a darte ‘n butom saressem ancora chì con quela portèla dal pit …” – la me fa la spósa vardandome da sora en zo anca se l’è pu picola de mi.

Ma se sa, mai dir gàt se no te l’hai més nel sach. E difati, eco che ve conto come l’è nada a finir. En dì ném a magnar na piza. Tuti convinti che l’altro (l’altra) el gàbia en borsa o nele scarsele o ‘n dove osc’ia el voleva (doveva) meterle, le ciàve de sta porta che no se squassa gnanca co la bomba atomica.

Quando se ariva la sera tardi scominziém tuti e doi a palparne. No per far quele robe che pensè, per zercar ste ciavi ‘cramento. La spósa a ‘n zerto punto la rebalta tut quel che la gà nela borsa. E no ve digo quanta roba vei fora. Mi nel borsèl gò sol i ociai, el telefonim e el portafòi … fago prima. Gnente: le ciàvi no le salta fora.

Se scominzia a pensar subit al fiòl. Ma quel … come semper l’è nà a Trent dai so amizi de l’università. Zamai el starà anca su a dormir dopo esser nà al concerto ( i ghe ciàma così adès nar a done … boh), e per de pù … sì l’ha lassà chì anca el telefonim (chi no gà testa gà la benzina de la me auto …) quel … diaolporco … se ‘l sènte sonar anca chi fòra quando provém a ciamarlo.

A sto punto provo a pensar de tor na scala, de nar a l’alteza de na finestra, de spacar el vedro … e entant che penso a questo me vegnirìa da dirghe a la spósa: “Tèi, ma le finestre no le è miga blindàe … come la metente se i ladri i vei co na scala? Ma per fortuna capìsso subit che no l’è el caso de nar su le scale. L’ultima volta che ho sbianchezà som cascà zo come ‘n broz. E da alora, quando cambia el temp, me vèi semper fora en mal de schena da …

Gnent da far. Scominzio a pensar anca al cagnot porèto. El dovrìa nar a far i so bisogni a st’ora, ciapar i so bei biscoti de premi che l’aspeta subit dopo … “Ma cossa pensit al cagnot che sem serài foraaaaa” – la gòsa la spósa.

E alora me decido.Ciamo i pompieri. Come i sente la me voze (con tute quele volte che i ciamévo a tute le ore dal giornal …) i me riconòss e – no saendo che son en pension – i me risponde. “No, niente da segnalare Galas”. E i mete zo.

Alora ritelefono. E ghe conto tut. Me sento come en bocia che ghe sta contando a so pare che l’ha sfracassà la machina. No, pezo, come n’embranà, n’imbezìle, Seràrse fòra … seràrse fora: ma se pòl?  “Appena arriva il mio sostituto al centralino vengo su e vediamo cosa si può fare”.

La spósa entant l’è agitada. La telefona a so mama: “Ma sat cossa l’ha combinà me marì? No, vara … mi vegno su da ti a Trent. Ades vei anca i pompieri. I taierà la porta co la fiama osidrica me sa … t’enmaginit che casim? E dopo? Dormir co la porta averta? No, vegno su. Lasso chi quel deficiente de me marì …”.

La vardo e ghe digo: “Scolta varda che anca ti t’hai lassà denter le ciavi neh …” La me varda come se coi oci la volès brusarme e dopo la se senta en machina. E la ghe telefona a no so amica. Contandoghe le stesse robe.

Ale tante ariva i pompieri. Ghe spiego tut. E ghe digo: “Ma se pol averzela senza far tanti dani?” Lori i me varda e, come el mecanico quando te ghe porti l’auto che sèita a smorzarse, el dis: “Dipende, diamo un’occhiata. Ah, con quante mandate avete chiuso la porta?” – Osc’ia, digo, me sa che l’ho seràda e basta. Ero de corsa. Me som desmentegà le ciavi e anca de droparle me sa …”.

I pompieri i gà na casseta de atrezi. Grossa. Ma vedo che no i la caga gnanca. Um de lori el tira fora na carta de plastica, quele tipo bancomat per capirne, el la mete nele sfrìse e …oh, la porta la se averze.

Mi i vardo come se i fùs dei ànzoi pena vegnui zo dal zél a salvarme. Ghe ofrirìa la zena, soldi, tut quel che i vol … e enveze sti chì i scapa de corsa: “Scusi, ma abbiamo un intervento urgente, buonasera”. Resto lì davanti ala porta averta. Ariva anca la spósa: “L?hai taiada co la fiama?” – No, no nem denter che te conto come i ha fat. Ah, almen en giro de ciàvi d’ora en poi l’è meio darghel a sta porta sat … vei che te conto come i ha fat”.

 

QUEI DE LE BICI

PEDONI_CICLISTI_FIAB_2

Oh, che no vègna fòra adès che son contrari al turismo de Arco, del làch de Garda, de la Busa, dei sports e  … de la madòna te me stómeghi neh. E magari anca contro l’indoto: ma ‘sa elo sto indoto? Soldi en pù per tuti? Mi no i ho visti sul me cont ala Rurale … come la meténte?

Fàto stà che – da ani zamài – oltra ale machine, ai campers, ale coriére, ale moto, dale nòsse bande, bisogna star atenti anca a quei de le bici. Tut è scominzià quando qualchedun l’ha enventà quel tipo de bici da nar en montagna, su le stràe en pè, senza far fadiga come … con la grazièla o le bici da dona (ma anca quele da òm, co la càna en mèz).

De colp a tuti gh’è vegnù sta mania de pedalar. E questo el pòl anca esser istrutivo no? El pòl anca far bèm. Semper meio che drogarse, embriagarse nei bars, fumar do pachèti de zigaréti al dì, o tràrse nel lach dala disperazióm …

Però, lassémel dir, quel che l’è màssa l’è massa. Anca perché ste bici coi rodìni fati aposta per nar nei boschi (lassénte star come le ridùs i sentéri), per nar en mèz ai sgrébeni, adés te le trovi pù en zità che, per dir, su ‘n Vél, a San Zoàn, al làch de Zèi. Ensoma, par che de colp le serva pù a nar sul piàm che su l’ért.

Ma se sa, ognum el pòl far quel che ‘l vol … nar dove ‘l vol, co la so bici, la so auto, la so moto … Va bem. Però se mì col me autìm domam me meto a nar a zig zag, sui marzapéi o, pèzo, làsso la me machina en piaza de Arco tacàda ala bomba de la guera soto palaz Marcabruni, co na cadenaza … emmagino che do minuti dopo i me la porta via col car atrézi …

Sti chì enveze, osc’ia, come vèi la bela stagiom, i vei fòra da tuti i busi, come i lumàzi dopo en temporal. En bina a doi, a trei, en fila indiana. Tuti fighéti col so bel caschét, la maietina piena de reclam (ciaperài anca qualcós per ste promoziom?) con tacà ancora la fasetìna de quant che le costa e come se deve lavarla. E no te pòi gnanca pasarli via perché te vedi da lontam che i fa fadiga a star su quele sèle, tuti ciapai a vardar endrìo se ariva el compagn, tuti ciapài a far quele mili pedalàe per nar envanti en metro …

E po’ i te varda no? Come dir: “Vàra che som chi che gà la precedenza … ho méss for la mam zamai da do secondi e mèz”. Per farla corta, l’è come se sti … se stì, come li ciàmei, bàichers (no ì è tuti forésti però), i fussa na specie protèta, che ‘n sonte, come el gàl zedróm, guai se te i tochi, guai se te ghe soni col clacson, guai se te i sgarrìsi. I te varda, co la facia de quel che par no capìssa perché ti tel vardi, po’ magari i alza el terz dé (contando da quel gròs a quel picolim) de la mam e … ensoma, i te manda a cagar. Per no dir de pèzo.

No parlénte de le piste per le bici (e per quei che va a pè). Se te vai tra Riva e Torbole envéze che calmarte col vent del lach, far do pàssi tranquilo magari col cagnòt, te risci de finir al neuro. Ogni do metri (meio ogni do zentimetri) meio voltarse endrìo perché quei lì no i gà gnanca el campanèl su le so bici. E i pòl vegnirte nel cul da ‘n momént all’alter. Che po’ no se capìs neh, se quei che va a pè i deba star a destra o a zanca. Ognum fa quel che ‘l vol. Come quando se gà da traversar la straa sule striscie. E ‘l pu dele volte se s’encrosa.

E ancora: gh’è quei che va en giro con drio la stròzega, sì col caretèl dove i tèi magari en bocia de do ani. Ma digo: e se te vai per tera? Se i te vei adòs? Ma sèt sémo o ‘l stàt per deventar? Dopo no l’è miga sol i baichers quei che fa casim. Gh’è, per dir anca la veciòta, ferma ancora al temp de quando dalle nosse bande paséva i cari tirai dai bòi. E che no la smonta gnanca per traversàr la straa … la stà lì, sul “casco no casco, no stago en pè per miracol”, almen en quart d’ora. Che … te vegnirìa voia de darghe el colp de grazia, così la va a trovar el so por om al zimiteri. Per semper, diaolporco.

Per no parlar po’ de quando, de not (o nele galerie), sti chì i gira senza fanai, senza i giubòti che slùsega. Che demò te i védi propri a l’ultim minut. E le stràe dove no se pol nar denter? Quele a senso unico? Per lori quel cartel ross co la striscia bianca en via l’è gualif a ‘n semafòr quando l’è vért.

Oh, capintene, come disévo no som miga n’orco. No, no i magno sti chi dele bici che róte le bale da Pasqua fim quando l’è ora de far i regai de Nadàl. No, per amor de Dio. Anca perché no i è tuti gualivi, disénte che su mìli en zentenàr i rispeta anca le regole dai. Che vòl dir: sbaràndo nel mucio t’en ciapi tanti de quei lazaroni. Però vedo che te i trovi semper de pu su le stràe bele, pena sfaltae (co i soldi del bol anca de la me machina neh), e semper de men dove i dovrìa star se ghe pias la natura, star a l’averta, respirar aria bona.

E alora, me son dit: “Vot veder che a sti chi ghe pias de pu l’odor de benzina e de gasolio de quel de la grassa dele malghe? Spéta ti che ghe penso mi …”. Così, quando encontro en mucio de sti baichers, i passo via piam piam, me piàzo davanti, e po’ ralento, e dago do tre bele sgasae … oh, na volta che i m’avés dit almen grazie.

LE HO COPAE TUTE

fe1a8545-1c96-45d3-9133-1134708ed785

Ah no gò miga paura neh a dirlo. De pù: me sènto anca bem adès che l’ho fat. Come se me fussa desgropà de qualcos che ‘l me stéva chì. Come l’ho copàe? En tute le maniere. Schizàe, brusàe, fasèndo en modo che le mòra de sé, de fàm. E mi lì, a vardarle, con ‘n zigarét en boca, content de vederle sofrir quele … quele putàne, diaolporco.
En fondo le era stà lóre, ‘cramento, a vegnirze a zizegàr, a darme spizegóni dapertut. Le penséva forsi che stés al so zòch, che ensoma no gavrìa fat gnent de mal. E difati, la prima che ho copà, l’è restàda lì, tut oci, a vardarme. Come dir: “Ma ‘sa tònte fàt de brut?” E ‘ntant che la crepéva ho empizà l’acendìm. Per cremarla, se sa, che se nò magari la spuzéva de brut.
El fàto l’è che se no te gài compassiom gnanca la prima volta po’ l’è ‘n scherz coparne n’altra, n’altra ancora, altre dóe, arivar a dése, vìnti … zénto osc’ia. Senza tanti magóni, senza dover nar da ‘n prete a confessarse.
Ah che pàze dopo … tuta n’altra roba senza quele rotibale, quando tut tase e te gài sol da pensar a portar via quele robe morte, butandole nela sporcaria, che se no magari el cagnòt el le rósega. Oh, putei, mai vist tante mosche come st’am neh …

DAI, BRUSA SU QUALCOS … 

na_fulmine

Ah, no so propri come vegnìrghen fòra stavolta. Da na banda ,sarìa squasi meio star su le mie. Ensoma no far gnent. Ciapàr la storia come l’è. Da l’altra però, me digo, ma se pòl trovarse en ste condizión e no far gnent per cambiarle? Per de pù, ‘cramento, ala fin fin l’è tuta colpa mia, de la me prèssa maledeta, del me esser stormenì quando vegno for de cà la matina bonora. Fato sta che, adès, son chi. Blocà come en mamaluch. Encazzà, zidiòs, che … no so cossa farìa, cossa podrìa far, a cossa ariverìa pur de cavarme sta voia mata. Che l’è brut neh, dirìa squasi come quel che se trova su na barca, en méz al mar. Co na sè bestia. En mez a tanta e po’ tanta aqua. Che no ‘l pol bever, diaolporco. Perché l’è salada, se sà, perché se te bevi que l’aqua lì te vei ancora pu sé. E alora son chi, en mèz al bosch, lontan dale case (ah ghe volerìa almèn en par de ore a pè per tornar de volta me sa), dale botéghe, tut perché la spósa la m’ha dit: “Dai che fén do passi da quela banda lì entant che vei ora de disnàr”. Me son tòt drio tut quel che podéva servir. El telefonin, el portafoi, na botilia de aqua (propri pensando a quel che suzéde a quei co la barca en mez al mar), en cortelìn per i fonghi dela zòca e – se no i è zamài passai – quei dal sangue. Che te ghe meti po’ sora ài e prezemol e te i scòti pena pena en poch oio del nós, dela Busa, se sa. Tut gò drìo, tut. Anca quei do pachéti de zigaréti comprài algéri sera. Ma, ma … me manca l’acendìn, diaolporcoooo, en fuminante, qualcçs che empìzza … cramento. E sì, sì, sì, ho perfin provà co le lent dei ociai a veder se ciapa foch foie seche. Ma, diaol de quel porco, ha piovù tuta la not. E stamatina l’è tut umit. No so se ghe la farò a tornar de volta. Empizar el prim zigaret de la matina dopo aver scarpinà per mèz mont l’è ‘n rito, na specie de messa cantada, col fum che vei for dala boca come n’incenso, cramegna. Gh’è sol da sperar che Dio el me dàga na man. Adès provo a parlar mal de lù. Così forsi el manda zò en fulmine, qualcos che tàca foch da qualche banda.

Né fodrà né embastì

Scritta_con_feci

No, no podo esser lassà cosita. En d’en bus da dove no se pol nar via prima de aver fat zerte robe. Che no pòdo far diaolporco. Che no podo far … Quando ero vegnù denter, no gavévo de zert sti problemi. Me paréva, come dir, na roba normale che ghe fùssa tut quel che serve. Come en tuti sti posti. De sòlit … M’ero anca méss en paze, devo dir la verità. De pù: avevo tirà fòra anca ‘n toch de giornale da lezer. Po’, fat quel che dovevo far, ho méss la man dove de soli tuti i i la méte. Oh: gnent. Gnent. Gnent, guaiaporcole. E m’è vegnù sà lì i sudorini. I sgrisoi. ‘Sa faga adéss – me son dit – ‘n do vaga? No gh’è gnanca campanèi de alarme. No se pol star denter pu de tant. E gnanca nar fòra, en ste condizion. Ho rebaltà alóra per tera el borsèl. Ciàvi, péne, monéa sparsa. Oh, varda chì, na vecia ricevuda de na pizeria. Propri en tochetin de carta neh … Toh, gh’è anca en fazoletìn de carta sbusà, sbregà … Mal che la vaga me neterò el cul con sti tochetini … ghe meterò el dé de drio… quel che ve farò veder dopo, bruti bastardi de sto bar che no meté la carta igienica nei cessi …

CHI TE CREDIT DE ESSER?

Oh, te sei dura, No te te moli mai fora. Soratut quando te dovréssi. Anca per el to ben, cramento, se no, te ‘l sai, m’encazzo. E la finis a pache, a scorloni. Ma credit de esser? L’unica su sta tera? Son mi che dovria vardarte da su alt en zo. Perché ti te sei mia, t’ho comprà mi. E te devi far quel che digo mi oscia. Vara che se le me gira te fai na bruta fin. Anca perché – scusa se t’el digo neh – l’è da ‘n pez che te me stai sule bale. Anzi, te dirò de pù: te me l’hai rote le bale. Pu de na volta. Per no parlar de quando te dovressi far quel che te devi far, en quei momenti che … E i to denti picoi, barea, che schifo. Sporchi, enciodai, con quel che pareria tochi de mudanda (sporca anca quela= en mez. Alora cara zerniera de la “botega”: o te la finissi d’encantarte sul pu bel, o te sbrego. E te buto nel cesso dopo averte finalment pissà adòs.

 MA ALORA SE POL ORDINAR O NO?

IMG_0029

Oh, l’è da do ore che speto che ariva el camerier … Come? Come? La “Spiaggia” de Riva l’è serada? Eh, ma diaolporco, almen dirlo prima …Difati vedo che no gh’è nesùni … ebbenvallah nem al Brolio a farne en kebab Franca, così la va a Riva st’istà … No, ma sé propri sicuri che i l’ha seràda propri adès? Ma se pòl? Ma meti fora en cartèl dalbon … dai dai che l’è ‘n scherz. L’è ‘n scherz vera?

 ZAMAI I HA PIANTA’ LE TENDE

En viale Roveredo, tra Arco e la Republica per so cont de Vignole, i stà sbusando ancora la stràa. Tra l’alter propri dove i l’ha sbusàda zamai tante volte nel giro de pochi mesi. I casi i è doi. O l’apalto per laori che no se capìs pù a cosa i serva l’è stà vint da l’impresa fà e desfa. O i sèita a desmentegarghe denter, che ne sònte, en martèl, en pìch, na cazòla, na livèra, en casco, le ciavi de la ruspa. E se ne scorze sol quando i ha stupà le buse e fàt quela strisciòta de asfalto sora. Come pol darsi che qualcheduni en Provincia i abia fità en tòch de quela stràa a foresti per far le ferie dale nosse bande. Difati, adès, se scominzia a vedér anca le prime tende … Vot veder che i è drio a scavar per alaciarghe (ale tende) el gas, l’aqua e anca i cavi del telefono?

LA VARDA CHE ADES CIAMO ME SUOCERA

poste

La me fa la spósa: va zò ala Posta de Arco a tòr na racomandada che i m’ha mandà. Che mi gò da stirar e meter a posto le valìs del mare. E po’ fa qualcos anca ti enveze che star semper lì davanti a quel compiuter, cramento. Po’ zà che te ghe sei va a far anca en tòch de spesa che ‘l frigo l’è vòt. E po’ fa ‘n salt anca en farmacia a torme qualcos per sgionfarme el stomech … con tut quel magnar e bever me par de esser en balom.

Ciàpo su la machineta, quela che la sarìa mia, ma adès el la dropa el bocia perché tanto i pensionai i pol nar anca a pè. Ma sicome l’è calt, el bocia l’ha dropà la moto. E alora ale tante podo dropar de nof la “me” machineta.  Sùta , se sa, col clima che no va, se sa, piena de Cd de zent che enveze che cantar par che i tira i ultimi.

En viale Roveredo i è drio de nof a spacar su la straa. Ma diaolporco, avè desmentegà zo qualcos dai scavi de do mesi endrio? Coa, soto ‘l sol, co la machineta che par na fornela pronta per far qualcos ale bràse pu che la polenta. Difati se metés na feta de carne salada sul cofano secondo mi la deventerìa subit nera, brustolada.

Ale tante arivo ala Posta de Arco. Denter se no altro l’è anca fresch. Forsi massa. L’è come passar en de n’atimo dal forno al frigo. Tògo el numer. E speto. Speto. Speto. Speto ancora. Sto PO46 no ‘l vei mai fòra. Come ne la tombola de Nadal. Gh’è prima semper i GHE24 o NO35 o DO90 o BALE22.

Dai e dai vèi anca mezdì. E toca a mi. Dai che forsi ghe la fago anca a far i altri mistéri. Buto lì el tochet de carta che ho trovà nela casèta dela posta. E l’impiegata la me varda mal. – Guardi che la delegante doveva firmare qui, con la data. E poi serve anche la carta d’identità del delegato. E anche il numero dei documenti di identità.

Oscia, ghe digo, la varda che questa l’è la mé sposa. El so neh, el so, purtropo che l’è la me sposa …

M’endinocio. La scongiuro de darme sta racomandada. Ghe digo anca: farèsse meio a no serarlo que l’uficio de le Poste de Bolignam. Che zamai lì i ne conoss tuti. Anca el gat che sta vizin ala bilanza…

-Mi dispiace, ma servono queste firme e quello che le ho detto …

La varda – ghe digo – che ciamo la suocera e se la ghe domanda a ela se la Franca Angiolini l’è la me sposa, la mete zò, e la se fa portar dal Pietro da Trent en mezora. E ‘l Pietro l’è un che dropa le man neh…

Gnente.

Alora sbrego su el biliet dal nervoso. E quasi el magno. Vago fora, al bar dela Gina. En cafè. E firmo e scrivo tut quel che dovria firmar e scriver la sposa. Po’ denter de nof nel frigo. Ciapo el numer: PO 74. E i è arivai al PO59. Me vei mal. Pozo la schena su ‘l mur. E me vei en ment de colp quando soto naja feven la gara dele scirache. Vinzeva semper quei del Veneto perché lori oltre al Diaolporco i gavèva anca el mitra: ci elo ci t’ha stracagà luamaro che no te sito to mare che no te sé dove la laora de note ciò …

Quando me sveio dal coma, miracol, toca a mi. Meto tute le carte de identità e quele firmae sul bancon. Toh, digo tra de mi, va ben adès? L’impiegata la me dis che manca la data ,,, ma subit dopo che la m’ha vardà chisà perché la data la ghe la mete ela. Altre do firme per ciapar sta racomandada. La vei da la Opel: la machina nova quela che aven pena comprà la deve esser messa a posto perché ghè ‘l ris’cio che la ciapa foch. Arivà sul pont del Sarca fermo la machineta, smonto e vardo zò: meio no butarse fin che dura sta sechéra, se riscia de farse del mal …

QUANDO L’E’ MASSA L’E’ MASSA …

El so. Giust l’àn passà i era en tanti, propri en sti dì, a domandarse ‘n do t’eri finì. El paréva che se no te ghe fussi tì no se podés far gnent. E difati tuti quanti a vardar se te vegnìvi, diaolporco. E tì che te te scondévi. O che te fevi finta de vegnir a trovarne e po’ enveze … St’an alora te te sei ciapà per temp. Gnanca el temp de spetarte ala stazion che te sei arivà. Dapertut. Te te sei piazà da la matina a la sera anca dove de solit no i t’aveva mai vist. Come dir: el so che l’an passà son nà da altre bande. E alora st’an zerco de vegnirve encontro, dai.
L’è che, oscia, tut, come el pés, dopo tre dì el spuza. I suoceri en casa, i amizi che t’hai conossù en vacanza, e anca ti, guaiaporcole, te dovressi capir che quando l’è massa l’è massa. Perché l’è vera che ai i todeschi – che i è reversi – ti te ghe vai ben così. Ma ti, calt, credeme, magari te fussi en calt todesch: tut te sei trane che fret.

VIVI COME QUESTO FUSSA L’ULTIM DI’

Eco, alora: stasera do pize, oto bire medie, na steca de zigareti, a putane tuta la not, e magnar fora tut quel che gh’è e anca quel che no gh’è. Se po’ doman no fussa propri l’ultim dì, demò dormo. E che nesuni vegna a roterme le bale prima de le trèè de dopodisnar. Che se ghe riprova n’altra volta, magari co luganeghe ala brasa…e ‘l vin, per cambiar.

 

COME ONTE FAT A DESMENTEGARTE?


Ani e ani tacài. Mai na volta for de casa senza de ti. Gnanca al cèsso de le volte, senza prima esser sicur che te fussi vizina a mi. Perché mi ero ti. E ti te eri mi. Guai a desmentegarte po’ se se dezideva, ensema, de far viazi, de nar en giro. Quante volte t’ho dàt na paca sul cul, per esser sicur che te me vegnìvi drio. Senza de tì no ero nessùni. E che bel quando te portèvo dove i te feva deventar pu bela, pu nova. Perché l’era en cresser ensema, oscia, deventar veci ensema, va ben, ma anca poder dir: oh, èla l’è chi con mi da ani e ani … Cramento, come onte fat a desmentegar la carta d’identità en quel albergo de jesolo?

Voleria dirte

Che son ‘n mona. Che no t’ho mai capì. Che l’è pù quel che par de quel che l’è, tra de noi. Volerìa dirte che se podrìa sì nar envanti. Ma – me domando – come? E po’: come prima? No, dai, no sténte a torne per giro, vegnìnte come se dis zò dal pin: no gh’è gnent, propri gnent che ne tei tacài ensèma. No sen gualivi. Dai e dai no ne binèn. Basterìa sol che ela la me spotstés la machina de vinti schei e co la mia vegnirìa fora dal garàs senza dover vardar i cantóni no? Oh, la ciàma pura so marì se no la ghe la fa … Ma gavè el salvasterz su sto gipòm?

L’ULTIM

Cossa? Cossa? Cossa? Ma ‘n do elo scrita sta monàda, che i ultimi sarà i primi. Ti te sei l’ultim, ma ‘l prim l’era quel de stamatina, oscia. E po’ te me vardi, come ‘n stormenì, come un che ‘l sa, propri, che l’è l’ultim. Co na facia da sciàfi. Come se te voléssi torme per el cul.  El so, ala fin, l’è colpa mia, sol mia. Dovemo entaiàrmela prima. Dovevo far qualcos perché no te restéssi sol ti, sol tì diaolporco, a st’ora, dinanzi a mi, da sol, da sol. Mi e tì. Ma gavévo pressa de vegnir a casa. De sdravacarme sul canapé. De ‘mpizàr la television e dir, tra de mi: adès? Adès? Ahhhhh adès me tògo en tòch de paze sol per mi. En cafè al ginseng, n’amaro, e dopo … te vedo ti. Che tristéza, che … no se pol dai darghe tanta emportanza sol a un come ti, perche te sei sol ti, perché no ghe n’è altri … perché te sei l’ultim zigarét restà en d’en pachét de emmesse.

DIME, DIME, DIME …

Ma ti me vòt ancora ben? Ma ti e mi sénte ancora ensèma? Cossa gh’è che ne tàca? Che ne tèi a un? Parléntene. Dai. Fénte fora le vecie question. No gò gnent contro de tì. Semai te sei ti che, spéss, te la gài con mi. Te me strénzi el col. Te me dài pache nel stomech. Par squasi che te voi coparme. Stofegarme. Epura quando t’avevo compràda t’eri na camisa xxl … diaolporco.

TE SEI LI’ LI’ MA GNANCORA DE LA’

Oscia, mai ciapà tanti auguri come st’am. L’è da tre robe che zerco de risponderghe a tuti. Perché, me son dìt, devo risponderghe propri a tuti. No saltarne gnanca un. L’è dura, l’è dura. Ma prima de sera ghe dén la volta.

Entant ghe penso su. I è zamài zinquantanòve. E come tuti i numeri che finìs en nòve, vol dir che te sei lì lì ma no gnancòra de là. Come quando te vedi che na roba la costa nove euri e novantanove zentesimi … no l’è dese euri. Ma sèm lì. E tut mal te par de pagar de men de dese euri. Propri perché ‘l nove el te fa star n’atimin tranquilo no … Meti che quela roba la costéssa dese euri e do zentesimi … oscia, te diréssi, la me par ben cara però.

A disnòve ani, quando te deventévi magiorène a ventùn, te paréva de esser ancora endrio. A vintinòve te pensi ai “enta” ma senza enfassarte la testa prima de esserte fat mal. A trentanove te vai zamài vers i “anta”. Entorno tuti che te dìs: “Te dovrèssi esser madùr, dai che no sta ben far zerte monae”. Ai quarantanove? Eh lì te te ricordi quando t’avevi scrit sul giornal: “Grave un anziano di 51 anni caduto con la moto”. E te gaà rispet sol a ricordarlo. A zinquantanove? Oscia, penso a quanti de la me classe, del zinquantasei, no i gh’è arivai. Penso a me nono Carleto, mort a sessantùn ani. Po’ slargo i bràzzi. Vardo el zièl. E che suzèda quel che deve suzéder. Magari però no propri ancoi. E gnanca doman che gò da dar fora el diserbante. E gnanca dominica che gavevén en ment de nar a trovar i cosìni zo a Berghen. E po’ gò ancora da sistemar la dichiarazion dei rediti. E po’ en settember voleven nar zo a Milan a darghe n’ociada a l’Expo. Ensoma, caro Destìn, son massa ciapà almen per tre quatro mesi. Dai che ‘n parlém dopo ah? Basta anca na mèil … così te sparmi boi e scati del telefono.

SE DEVENTES SINDACO …

Ma gnanca dirlo. Gnanca scriverlo prima. Se deventés sindaco, meti, de Arco? Prima de nar nel me uen via fìzi farìa come el por Zampicoli, l’Italo. Farìa en giro per la zità. A vedér come l’è messa. Po’ en salt al Centrale, al Casinò, al Trentino. Via vers el pont. De volta vers via Vergolan. Po’ ‘n  cafè (pago mi se sa, son el sindaco no, miga en frate scoton), zò en via Mantova, uno en via Nas. Po’ co la bici narìa a dar n’ociada anca a Romarzol. E dopo en municipi, dove volerìa vardar ben tute le carte che devo firmar. Dopodisnar su vers San Martin, Masson, Bolignaàm, Vignol e i Mori. N’ociada anca ala Moleta, e la sera prima de zena, anca a Padaro, prima de farme na piza a Romarzol. Tanti roticoioni per stràa? Va ben. Tegnirìa nota de tut. Anca dele monae. Sol per torme la spiza, quando uno me fa n’interrogazion, su na busa de la gràsa che spuza, de dirme che … l’avèm zamai spostàa. Da na stimana.

I LI PARA VIA …

Enpizzo la television e vedo che en Svizera, en Francia i ghe dìs, i ghe fa segn, i … fa anca de pezo, e i manda de volta quei arivai coi barconi da noi. Oscia, me digo, i gà a sto punto sol el culo de no averghe spiage dove sti barconi i ariva. Oscia, me digo, meno male che sen europei. Tuti quanti. Oscia, me digo, ma sènte en Europa sol per na storia de soldi? Forsi l’era meio quando no eren europei solo per quel …

Vorrei dire quello che penso, Siamo in democrazia no? Ah no? Scusate, provo un’altra volta.

(Cornelio Galas)

Gh’è ancora quei che te vol bèm …

exchange of money on the internet isolated

exchange of money on the internet isolated

L’è zamài na desina de volte che ‘l me capita fora, de colp. Sul compiuter. E mi che no ghe dàgo mai resòn, ciapà come sòn dai me mistéri. E sì che ‘l lo dìs subit neh: “No son un dei soliti venditori, no ‘l fago per fregarte o robarte soldi, te verài che ala fin te te troverài content … basta che te me scolti n’atimo”.

Dai na volta, dai dóe, dai trée … me son ciapà ‘l temp per scoltarlo, ale tante, sto pòr putèl. E alóra vei fòra che, dàmela tòmela, senza far gnent, senza laoràr, senza gnanca sudàr ensòma, te vegniréssi a ciapàr miàri de euri al mes. Cossa te costa tut sto ambaradàn? Gnent. Te gh’ai tut da guadagnarghe e gnent da rimeterghe. Oscia, me son dit, sto chì l’è meio de Padre Pio. L’è ‘n Sànt. Co la crisi che gh’è, dove tuti i se dà spallàe per en laoro, el te dà le drite giuste … per farte star ben tì, no lù. Alóra ‘sa fago? Apéna rìva a cà la sposa ghe digo che la prenota subit a san domingo … disente per en par de mesi. E sùbit a zena de pèss, ma de quèl che te paghi dèse euro anca le lische cramento.

E dopo … crompèn la machina nova. E dopo se ciàva, na television tre metri per quatro … fènte anca zinque. Oh, se volè ve dago l’indirizo anca a voi. Meno male che gh’è ancora zent che aiuta i altri, che li fa stàr ben senza pensar al so tornacont …

Quèle to paròle che ho pèrs …

dimenticateAa

L’è pròpri vèra. Te te scòrzi massa tardi de quel che te gh’avèvi, de quel che de colp no gh’è pù. De quel che – per colpa tua, se sa, sol tua oscia – t’hai pèrs. E sì che stamatìna, ‘ntànt che te la sposa la me parlèva – co la so vòze calma, quela che la gh’à semper quando l’ha bevù el cafè, che la s’è messa a posto – ensòma, pèna ch’ero levà su dal lèt … me l’ero anca segnàe col làpis stè parole. Per no desmentegarle. Perché no le me nèss for de testa.

Envèze, vàra chì come son adès, né fodrà né ‘mbastì. Col gnent davanti. Col gnent de drìo. Col gnent de gnent en testa de quel che la m’avèva dìt. Ma no l’è, diaolporco, perché son deventà de colp ensemenì. No, ghe tegnìvo a ricordarme quele parole. No le era gnanca tante, cramento. El giùst. Ma quel tòch de carta … me son fidà massa de quel tòch de carta. Che adès chisà dove l’è finì. En tra mèz al sentàl de la machina? O l’ònte magari pers entànt che tirèvo fora el tacuìn per pagar i zigarèti?

A ogni modo no ‘l gh’è pù sto sacranòn de biglietìn. Ho rebaltà tut. Gnènt. No ‘l vei fòra. Se me ricordo qualcòs? Ah, l’è dura. Va bèn, sì, ‘l sò, le solite do ciopète e ‘n pè de salàta … ma gh’era anca altra roba me par che dovèvo compràr al supermercà. Tut scrit su quel biglietìn maledeto. Son del gàt …

NAR FORA A MAGNAR EL DI’ DE PASQUA

pppppp

L’è quel che te paghi. Che te magni o no. Te poi saltar, se te voi, antipasti, primo e sorbèt e nàr subit al cavrèt. Ma quel te paghi, tut mal ala fin. E alòra, dài, l’è ‘n pecà lassàr lì tuta quela roba. Che qualchedùn ha laorà per farla. E meterla nel piat che la faga faziòn. Dopo le prime do portàe me sento zà mez encoconà. Zò en bicier de bianch, fòra a fumar ‘n zigarèt. E via, diaolporco, che per i alpini no gh’è gnent de emposibil, cramento. Dròpo anca ‘n toch de pan per netàr su ‘l sugo dei ravioloni. E via, avanti coi scavi, che tanto da doman tornèm a magnar lengue de lugherin. Dai e dai ariva anca ‘l cavrèt co la polentina, i fonghi. Ma chi el quel mat che lasserìa lì tut sto ben de Dio? E zo, guaiaporcole, e zò che ‘l vaga el cavrèt, pora bestia anca lù. Ma sonte stà mi a coparlo? E tut mal na volta còt ‘sa fente, el butente via con tuta la fam che gh’è a sto mondo? E zò dopo anca la colomba, el cafè, la sgnapa per el resentin. Che se no te magni tut no te par che quel che te paghi el sia giust. No no, n’altro amaro, cramento così sem a posto. (Dopo, ala cassa): Le me scolta, nei trentazinque euri gh’è denter anca n’alka selzer? E se no, me lasseresela butarme zò n’atimin sul canapè vizin al bar? Ma no valà, fago do passi per nar a cà che l’è meio cosìta me sveio fora. E la sposa: “Sat che sforzi traversàr la stràa … adès capìsso perchè t’hai volù nar a magnar a l’Everest, propri a dò metri da do abitèm…”.

QUEI CHE TE CIUCIA LE ROE

Gò n’atimin (tant) le bàle girae. Te fai, te brighi, te ghe meti passiòm e ore e ore a zercàr, a pensar, a scriver. A trovar qualcòs de nòf. E sul pu bel? Vei fora qualchedun che te copia pari pari le to idee. Ma quel sarìa el men. El dìs, anca sui giornai, che mai nesùni prima gà avù quela idea. Depù: el dropa anca el nome gualif de quela idea come se ‘l ghe fussa arivà per prim a trovar anca el nome. Adès, mi son bom, tranquilo, lasso che le miserie umane le vaga come l’acqua dela Sarca … semper en zò, verse l lach de Garda. E da lì verse ‘l mar. E dal mar dove che le vol nar. Ma diaolporco, te pol vegnir quei zinque minuti ‘n dove te spacherèsi tut co la voia de mandar ‘n mona zerta zent? Che tra l’alter no ho mai domandà gnent per quel che fago e brigo, gnanca a quei che adès ciuciale roe. Ma forse gà reson la me sposa: “Ma lassa perder e vei zò dal gabiot de sora … vei con mi a ciapar el sol. E godete sta pensiom prima che (toca fer) magari te vei entorno qualcos che no te poi pu godertela. Me sa che la gà reson …

GHE PENSO MI

A LA POSTA DE BOLIGNAM …

Bolognano

Ma cossa vot che i faga quei de Arco. De sbusar le strae e po’ lasar le buse i è’ boni quei de Arco, de dar fora gnochi a carneval, far i cari co la carta dei giornai veci, far su casoni en mez ai olivi i e’ boni … ma sì el sindaco Betta che s’encadena davanti ala Posta de Bolignam … ma fame rider dai … e dopo che falo? Bisogna portarghe da magnar, da bever, servirlo e riverirlo de not e de di … e ‘n pu co le cadene la Posta el la sera lu per primo no … ma vala’ … ma valà pisòt,  ghe penso mi, che conosso cagni grossi su per Trent … fago na telefonada mi oscia te verai che … oscia i muri fago tremar, le pareane vei zò … speta speta …

Ecol chi el numer … speta e scolta neh se te voi emparar qualcos … che me par che a forza de studiar a l’universita’ no te sei gnanca bom de far na racomandata … tanto te dropi semper le meil … l’e colpa vossa, de voi boci dei compiuter se i sera la Posta de Bolignam … perché no sè pu boni de dropar la pena, e savè la tabelina del sei sol perché’ ve ricordè la canzon dei quarantaquatro gati (en fila per sei col rest de doi) … se no saria miserie …  speta speta che ghe telefono mi ades … pena ciapo la linea … si anca la canzon de Caruso soto… ma lo salo che Dalla l’è mort por om? Dai en po’ de rispeto … meti su qualcos altro no … Pronto? Ah signorina gh’elo el dotor Serosutut? Sì va ben speto  … ah mi son el Cornelio da Vignole … el Cornelio Galas fiol del por Italo … quei che gaveva la falegnameria … che prima l’era de me nono Carleto … arènt a l’albergo Everest per capirne apena l’ariva zo dala Maza, da Nach pero’… sì va ben speto …

Me sa che la va per le longhe … Scolta, va a tor el pam entant valà, fa qualcos. Come dove se va a tor el pam? Su ala Coop no … oscia ma sat en dove te abiti almen? A Trent en Bolghera sì,  ma sol per studiar dal luni al vendro- Dopo te abiti a Vignole e la Coop l’è a Bolignam … se pol nar anca a peoti … dai nar che nare che l’è zamai mezdì. Ah, dopo passeme anca dal Silvino, oscia el Silvino Morandi quel che vende zigareti e anca giornai ades. . En do che l’è? Ma cramento, dove t’hai fat le scole elementari, poch soto, en viale Stazion … gh’è su el scartabel e tut mal domanda valà.  Che vergogna, a che  passi … eco tome la gazeta e do pacheti de emmesse duri,  pahete dur me racomando … toh, toh i soldi e va se no i sera … bom . Sperente che te trovi almen le scale per nar en zò.

Madona … ma cosa ghe ensegnei a l’università de Trent? Come se volta le pagine dei libri?

… Pronto? Sì, sì son sempre chi,.sì   grazie neh …

Dotor Serosutut? Salve, se ricordel de mi, del Cornelio? No? Strano perché mi me ricordo de lu quando l’è vegnu zo a presentar i novi servizi dele poste a Riva. Se ricordel che gh’era tuti i giornalisti? Eco eco gh’ero anca mi e gavevo fat l’intervista per l’Adige. Se ricordelo? Bem fa gnente, .el senta mi ghe telefono per ste Poste de Bolignam: ma perché volé serarle? Che v’avente fat de mal? Sì, sì … ho capì, ma sì, ma … se però … el varda secondo mi … ma quel no saria en problema … ma el varda che el Comun el ghe sbassa anca l’afit neh? Ah, beh quel  se sa … no son en pension … no credo che ghe la faria a pagarghel mi el stipendio a l’impiegata. Ma el varda che el funziona neh que l’ufizi li … e dovria girar anca dei soldi … almen … mi vedo che en gira … no, per carità, no l’è miga per farme i afari dei altri o de le Poste no … però ensoma … no l’è che l’impiegata la sta li a petenar le bambole, farghe la ponta ai bigoi o a vardar se va ben el color de le ongie … mi vedo che la lavora e svelta anca … se no no i vegniria tuti anca da Arco dove enveze per dir se fa dele coe che dele volte te passa anca la voia neh …

Eco, eco … messa così la va za meio, disente alora che ghe pensè su almen- Sì però se el me permete mi credo che ghe faria piazer a sta zent saver anca quando grosso modo fini de pensarghe su- Eh star en viveta no l’è bel salo … bom bom … ah el scolta, se el vei zo en di a vardar cone la va magari nem ensema dal Marosi a magnar la carne salada coi fasoi en bronzon, i la fa bona salo? Ah lu l’è vegetariano. Bem tut mal gh’è anca verdure de l’ort del Marosi, per quel neh,  sì sì va bem el lasso nar , grazie salo? Alora se pol dir che meza gabola l’avem saltada? Sì sìi l’è prest … oh no ‘l staga miga pensarghe su massa neh? Va bem saludo , anca la so sposa … ah no l’è sposà … bem el me saluda tut mal i soi … el porta zo anca lori chi a Bolignam che tant quel che vanza ghe ‘l dem ai ruganti.

 FA’ E DESFA

 

Gh’è da meter novi tubi dele fogne? Se spaca le strae. Gh’è da veder dove s’è rot i tubi dele fogne? Se rispàca le stràe. Gh’è qualcos che no va nei telefoni? Oscia, vod veder che s’è rote l cavo propri lì dove avem giustà la stimana pasada el tubo dele fogne? Gh’è da far n’alaciamento nof del metano? Cramento, propri lì, sì propri lì bisogn tacarse. Ma ‘sa fat? No te sfalterài miga propri chi … vara che tra dese dì doven spacar su tut per le conduture de le acque bianche neh … spèta. E quando te pensi che sia propri tut finì, toh, manca i soldi del Comun per sfaltar de nof le strae. E resta buse dapertut. E a le machine, anca a quele nove, parte subit le sospension. E i motorini i va dal balon su drit. E le veciote le se ‘nzòpega. Ensoma, par che le stràe le serva a tut – a farghe busi e cuertarli a la sbregabalon soratut – trane che da strae. Con quele bine nere dove i ha apena scavà. Che po’ i ghe scava ancora ‘n banda e alora le deventa doe le bine. Ma no vei su né fasoi né zaldo. Sol polver. De pù quando gh’è ‘l vent. Cramento. Ma me domando: no sarìa meio meter tubi e bataria varia nele scarpàe da na banda e da l’altra enveze che ‘n mez? Oscia, lì i podria anca far buse tut l’an. E anca far a men de cuertarle. Così no ocor gnanca taiar l’erba …

NO PODRIA, MA SE TE CONTINUI A STIZARME …

Vara che te sei neh. T’ho dit de lasàrme ‘n paze. De no farme vegnir voie strane. .. No podo, no podo … ghe lo giurà e stragiurà ala sposa. Che tra l’alter la me tende tut ‘l dì e anca la not, per paura che ‘l faga, la sera su tut. Ma se te te fai veder nuda, con tute le to bele curve e i to bei colori. La pel lissia senza gnanca na ruga. E po’ quel to profumo che se sente anca da lontan … no so, no so se ghe la farò a resister oscia. Vara, gò za la lengua suta a forza de pensar cossa te faria. Però cramento no podo, la me sposa no la me lo perdoneria. Te l’ho dit, gò fat na promessa de quele che … de quele che pu te vardo me vegniria propri voia de brusar e saltarte adòs. Da quant temp elo che gh’ero saltà adòs a to sorela? Me dispias, te dirò, l’è durada poch quela storia. Ma ti te sei pu granda, pu bela. Me sa che con ti la naria en pel pu per le longhe. El temp de snasarte, te darte ‘n baso e … de magnarte bela luganegona mia. Che no ghe la fago pu a nar envanti coi passati de verdura, cramento.

STASERA MI E TI , ENSEMA … ‘L FEN

No vedo l’ora. L’è da stamatina che ghe penso. Oscia, finalmente stasèra no gavrèn altri penseri, altre robe da far, altri gazèri. Sì, no gh’è Madone che tegna. Stasera ‘l fen, dai. Se no no ‘l fen pu. Gò intenzion serie stavolta. No la finirà come l’ultima volta che sen restài enciodài propri sul pu bel da … to mama, quela … brava dona. Che ghe sarà vegnù ‘n ment de vegnir a trovarne senza far na telefonada prima. No se pol pu far i so mistèri en casa se te capita zent e no te sai che la ariva. Ma ancòi te verai che ghe la fen. Ho fumà poch, no ho bevù gnanca en bicièr, propri per no arfiàr, per averghe la forza giusta. Anca ti no stà strusiàr pu de quel che te pòi en ufizi. Fa finta de lavorar na volta tant. Che stasera, boiavaca, l’è la sera giusta, el sènto. Tranquila che narà tut via come l’oio. No sarà na roba zac e tach, ma gnanca qualcos che scominzia e po’ no finìs pu. Magari tra tribolazion. Dopo staren meio tuti e doi se Dio vol. No ghe sarà quela roba grossa e nera tra noialtri. Vara, mi dirìa che pena rivada a casa te vai en bagno e te te cambi. Mètete vestiti lezèri. E anca i guanti … i serve i serve, scolteme mi. Anca mi me cavo zò tut quel che podria dar fastidi. Perché, oscia, per spostar que l’armaròn dala sala ala cantina ghe sarà en po’ da sudar. Ma dopo te verai che sodisfazion, finalmente. Poder nar en giro per cà senza bàter co le nosèle e i stinchi en quei spigoi …

‘CRAMENTO, NO TE GHE SEI MAI QUANDO VORIA DROPARTE …

No, digo, diaolporco, ma elo possibil che tute le volte che vegno chi denter, ti no te ghe sei mai. Capirìa na volta, dai, pol suzeder, ma no propri tute le volte che … no ghe la fago pu. Che gh’o bisogn de ti per star ben. De droparte sì, droparte perché senza de ti no ghe la farìa pu, dopo, a nar en giro. Gh’avrìa ancora quela voia, quela necesità … sarìa zidiòs. E de sicur s’acorzerìa tuti del me esser destrani. Squasi for de testa. Che dovrìa perfìn sconderme dal rispèt de esser ‘n ste condizion. Te dìsi che te dropo sol per scaricarte adòs tute le robe sporche, quele che no se dis e no se fa veder ? Oh, no son stà mi a far i omeni (ma anca le done neh) cosìta. No son sta mi de zerto a mèterne denter ‘sti strangossamenti, sto dover correr, sfogarse per sentirse po’ ben. Ma senza de ti … sul pu bel tut va a farse benedir. Tut resta, come dir, a metà. No te sei né vegnù né nà. E po’, scolta, no sem miga pu a l’età dela prèa. Ne nà zò acqua per l’Adès. I ha enventà anca sistemi pu moderni per darne na man quando se se trova a sti passi. Cossa disit? Che ogni volta che te dropo po’ vago via e te lasso lì né fodrada né embastida ? Che te molo de colp come se no te me servissi pu? Che anzi te buto via come se te me dèssi fastidi? Oh, vara che mi i soldi i tiro fora per averte semper vizina quando voi e come voi neh? Te dirò anca che dele volte no l’è che te fai ben i to laorèti en quei posti delicati … o te pianti lì sul pu bel perché par che te se sbrèga el cor (sì, ensoma, lì en mez) o che te resti lì tacada al to posto. E no te voi vegnirme encontro… No, digo, ma en sta casa no gh’è nesuni che avisa quando è finì la carta igienica? Dai, da bravi …

HO VINT EN PREMIO

Questo non è uno scherzo, complimenti, lei è tra i pochi fortunati a poter vincere un favoloso premio: scelga tra questi tre (I-Phone 6, Table, Fotocamera) clicchi qui

Bom, ho schizà

Lasci i suoi dati

Bom, fat

Adesso lei è tra i pochi utenti della sua zona che possono vincere i favolosi premi

Che culo

(segue questionario, altri dati da rilasciare…)

Scrivo na mail:

“Alòra, ciameme quando tirè su i biglietini de ‘sta loteria. Spero bem che ghe sia anca ‘n notaio, che se faga le robe come le deve esser fate. Quanti nomi ghè zò nel sachetìn? Chiel che tira su? ‘n bocia che no ghe vede come per el lotto? Se vinzo me mandè tut col corrier? Che no vegna fora che devo pagar qualcos neh perché ve mando tut de ritorno e no firmo gnent.  E se no vinzo no ste pu roterme le scatole. L’è da ‘n pez che no compro pu i grata e perdi… Ah, se vinzo spero bem che ghe sia anca la garanzia che ‘l so mi come l’è sti mistèri….i se rote subit e dopo nesuni sa pu gnent, nesuni se fa pu sentir.

DOPO DE TI … EL STROF

Ah, come l’era bel. De pu, de pu … Bastèva sfiorarte apèna. Anca sol co ‘n dè. E de colp me sentivo come en Paradìs. De colp nèva via tute le me paure.  E savèvo dove nar, cossa far, senza dubi. Te eri ti, sol ti, quela che me deva ste sicureze. Sol ti, sol ti … Po’, quela volta maledeta. Che no ho gnancora desmentegà. Forsi t’eri stufa e agra de darme semper da ment. Forsi dai e dai no te eri pu bela, viva come la prima volta. O forsi l’è colpa mia: magari pensèvo che la nossa storia ensèma la saria durada per semper. Fato sta che adès son al stròf. Nel babao. Ogni volta che averzo la porta el digo: domàn devo compràr la lampadina nova del lampadari oscia.

DEVO PAGAR

ANCORA QUELE ROBE?

El botesèl de petrolio, el barìl ensoma, el costa men de la metà de pochi mesi fa. E alora, te vei da dir: anca benzina e gasolio i dovria costar la metà no? No. Perché en Itaglia gh’aven le accise. Che l’è tàsse messe su zamai da ‘sti ani. Per dir, gh’è denter ancora le spese per la guera en Abisinia, quele per el teremot de l’Irpinia, quele per el teremot del Friuli, per varie aluvion e problemi che se vede no i è riussìdi a vegnirghen fora ancora. Ma no l’è finida chi. Te ciapi quel che costa la benzina te ghe tachi le accise e su tut te ghe fai pagar anca l’Iva. Aumentada anca quela. E po’ i se la tol coi ristoratori che fa pagare anca el coperto? E po’ i dis che se pagherà men tasse? Ma basève el cul valà.

LA TELEVISION VECIA

Se rote la television. Alora vago zo dal Leonardeli e ne compro una nova. Vegno a cà. La taco. La ‘mpizo. Me vei fora la Carrà. Meno male che gh’ò ancora el scontrin. Doman vago zo e ghe ne canto quatro: oscia, no volevo na television de seconda man…

NO L’E’ PER MI EL CIRCOL PENSIONAI

Som arivà lì lì .. po’ son tornà endrìo. – Perchè? Ah no l’è posti per mi quei lì.-Elamadona gh’at rispèt a star coi pensionai? Vara che tempi endrìo quando gh’era le pensiom bebi te trovèvi denter anca putei de quarantazinque ani neh… 944428_4194306435599_254575599_nMa no l’è quela so mare, no l’è quel el conceto… – E alora? Oscia l’è zamai do tre volte che passo davanti a quela porta e te senti che i zìga squasi da encazai: scopa, scopa t’ho dit, vara chi…scopa. – Beh, e alora? E alora caro mio se vago for de cà de zerto no l’è per netar el paviment del circolo pensionai de Arco ‘cramento, che gh’è zà la sposa a cà che la continua a dirme: Ti che no te gh’ai gnent da far…ghe sarìa da… No, no, che i se la scòa lori la so sede, se ciava. Al Casinò se te vai denter no i te dìs miga de netarghe el paviment sat?

LA PU BELA DELA CLASSE

Le còe come la Pippi Calzelunghe. Do òci che te brusèva. Zà do bèle tète, anca se no le era ancòr sciopàe, ‘na vesta corta che fèva vedèr gambe senza calze. I se voltèva tuti, i masci, quando la vegnìva su per le scalète del liceo. Quanti scopelòni da le morosòte. Ela la nèva ‘nvanti, Come se no ghe fùssa gnènt da vardàr, da sentir, da … Ah l’era ela quela che vegnìva ‘n ment, dopo, nei cèssi. Quando – dài che te l’hai fat anca ti che adès te fai finta d’èsser en pretòm – se tratèva de ‘nventarse qualcos per tiràrse via ‘sto sbrusòr de soto. No gh’era, alora, telefonini. No se podèva mandarghe mesàgi. Sol stàr lì, come i òchi, come i pàiti, come bisèrgole al sòl: vardàr e no tocàr

E LU EL ME VARDA …

Ma sònte ancòra ensognà? Ma no, oscia, el cafè zamài l’ho bevù. E alora ‘sa suzède? Chi elo quel lì che copia tut quel che fàgo? Toh, vàra: me sòfio el nàs … e anca lù el se sòfia el nàs. Vara, vara adès … me fàgo la riga dei cavèi en bànda e lù … oscia el la fa precisa istèssa … però da l’altra banda. Ah vòi vedèr adès ‘sa te fài: te mando a cagàr. E se te lèzi quel che dìs i làvri … lù el fa l’istèss. Com’ela ‘sta roba. Che de matìna prèst gh’è zà quei che rote le bale? Spèta mò … te spùo adòs, toh. Anca lù el spùa, ma no me ‘riva gnent en facia. Zerto che gh’è dela zent che no la mòca lì gnanca se … gnanca se … ‘cramento te dago en pugn che te fago scorlàr per en par de dì. Toh. Ahia, che màl … sangue. Elamadona n’ho ciapà, ma te n’ho dàt anca a tì…vara lì che màm ensanguinae che te gh’ai anca ti. E te vedo tut a tochetìni…

Cornelioooo….Corneliooo… ‘sa è succès en bagno che ho sentì en casìm. No t’avrai miga rot de nòf el spègio…

LE STORIE DELA “BUSA”

La Lopio-Busa

Gh’era na volta – oltre al Pero che se vòlta – na campagna che no finìva pù. Anca nele còl de sòra. Tèm, Val de Lèder. Nàch. Tuti contadini, se sa. Ruganti da arlevàr per far luganeghe e tute l rest. Bròcoi a Torbole. Carne salàda mèssa via per temp. Oio, cavalèri, pègore per el giòm da mèter sul guìndol. Come se stèva? Bastèva mèter ensèma la colaziòm, col disnàr, co la zèna. Averghe en vestì per nar a mèssa o ai matrimoni o ai funerài. Se se contentèva dai. Po’ le guere. La fàm. Case butàe zò dal “Pipo”. E per fortuna che l’aria l’èra bòna, per vegnir fòra da la tbc. E per fortuna che i todeschi i è semper stài ennamorài de ‘sti posti. Che anca quando sen deventai ‘taliani ciapài col sciòp, i ha dessì continuà a vegnir. A magnàr, dormir, bever da le nosse bande.

Schizzèm el boton envanti. Le fabriche. Che tante dopo le ha serà. I alberghi, che tanti i è finidi en man a quei che fa su case. I artezàni. Che ha strangolà co le tasse e le carte da far. I boteghèri: che dopo è vegnù quei grossi che i vende de tut per de mèn.

Le stràe le è semper quele enveze. Sì, dai, i ha fat qualche slargo, endrizà qualche curva, i ghe fa far el giro larch a Riva e Arco se no i camiion i dà fastidi. Po’ tante stradòte. Per nar da chi a là. Ma se te voi nar a Roveredo, oscia, fate el segn de la cròs. No gh’è pu el semafor de Mori. Ma gh’è quel de Nach. E quante che i ne conta ogni dì per dir: oscia, se sa, l’è ‘n bel casìm, farèm, farèm…bisogna far.

Lèzo che adès, qualchedun dis che forsi saria meio che quei de l’Autobrènner, i se rangia, anca coi soldi, per far sta “tiràca”, sì sta bretella come i dis da temp. Ma voi sé pissòti, no ve ricordè quando a so temp, trent’ani e passa zamai, propri quei de l’autostrada i aveva presentà en progieto. E i se sarìa rangiài lori, anca coi soldi. I gh’à dit de no. E alora bonanòt sonadori.

Adès ‘sa se pol far? Poch e gnènt vist l’andazzo. Speràr, pregàr, spetàr. Ma alora forse valerìa la pena no ilùder la zent. Dai, endrizènte quele do svolte, da quela dei rospi endrè, dai che tanto quando i vei zò en la Busa i s’enmucia l’istèss. Ogni tant ghe penso però: meti che prima de far la Maza, l’unica straa che gh’è adès, i avès fat tute l casìn per la Lopio-Busa… T’enmaginìt che per nar a Roveredo magari bisognèva nar su per Vèl e vegnìr zo da San Felìze?

EL TIRAGIACHETE

Sèmper ‘n mèz ai pèi. Ah, se sòl el podès…el te vegnirìa drio anca al cesso. Quando te pensi, te speri de no avèrgh’el pù ‘ntorno, ma vàra tì, el gh’à zà ‘l nàs sul tò copìn. Alòra te dròpi calma e gèss, t’el làssi che ‘l diga quel che ‘l vòl. Che l’è zamài quel che t’hà dìt mez’òra prima, se non da demèn. Te ghe dài resòn, ‘na vòlta, dòe, trèe, quàter se no basta. E no che no basta, perché adès te ‘l gh’ai envanti. Che ‘l te spùa adòs entant che e’l parla. Con quel brùt fià de quei che no ha digerì ben. El se mòve come ‘n guìndol, per spiegàrtela meio. E guai a dìrghe che quel ‘l te l’hà zà dit. Finchè te vèi n’idea che squasi mai la te lassa a pè. E movèndo da soto vers l’alt en dè te ghe dìsi: “Vàra, vara, gh’è chì stasèra el dotòr Pisantèra. Dìghel a lù che de ‘ste rogne el n’ha risòlte ‘n casìn…”

TE VEI ENTORNO NA ROBA

Te parli del pu e del men. Con zent ghe en fondo gà na quindesina de ani men de ti, miga en secol. Te ghe trove en quele parole, en quei modi de dir, de far nar le man en aria, qualcos che te feve, te diseve, te penseve anca ti. No, no te le hai desmentegade quele pasiom. Quel zerto no so che che te ciapa dentro, te dà en strucom e te fa correr drio n’idea, na dona, qualcos che te senti vero. Po te te vardi meio al spegio. E te vedi su la facia tute le fize de l’anima. Che da dentro le buta fora, zamai che le è stade scondue fin ades. Te vedi en boceta che zugheva al balom tra i filari dele vigne. O che ‘l tenteva de far come el dionisi, con en toch de legn de frassem. Su, sempre pu su. Fin che quela specie de asta de fibra (de legn) no la se spacheva.  E po le prime pianzue per putele che no te cagheva. Le schitarae soto i porteghi de caneve. E anca en cesa. E tante not pasae sbarai fora da le mine. Perchè erem zoveni, no sparmeviem sul son. Magnevem la vita, zacando tochi grossi. Ades te sei chi coi popi e le pope che te varda come en sior da darghe del “lu”. Che no i lo sa che faria ancora el giro de la bus co la marcia endrio per vinzer la scomesa de na botiglia de vodka….ghe vedo ancor bem.

NO TE GHE SEI MAI

QUANDO TE DOVRESSI ESSERGHE

Quando t’ho vist ho dìt da per mi: “Oscia, dai, vei con mi ancoi che senza de ti no savrìa ‘sa far quando … ”. E ti te sei vegnù subit. Senza dir né tre né sei. No ne conossèven. Però mi savèvo che de ti podèvo fidarme. Che te me sarèssi ‘stà vizin, semper. Pronto a darme na man. Pronto a far quel che te sai far. Pronto ensoma. En ogni moment. A tirarme for dale strazze. A farme sentir ben, no col nervòs che te ciapa quando quei come ti, de colp, no i gh’è. La madona, pensèvo de esser en de na bòt de fèr. Ogni tant tastèvo,  movèvo le man per esser sicur che te fùssi con mi. Bom, bom, me disevo, lù el gh’è. El so, el so, la zènt che no gh’à i nòssi vizi, le nosse trasgressiòn, no la pol capir ‘ste robe. Ste manie. Sto dover esser vizini. Tacài. Ma l’è per quel che no capisso, come la pòda esser finìa così. El temp de far do passi. De ordinar qualcòs da bever. E … e ‘n do te sèt pers acendìm? Come empìza ‘sto zigarèt, co i sàsi ròssi la pàia, en bachèt sech? Lassa perdèr valà, ghe domando a quel che ghèba chi vizìn. Ma che no te trova sul tapetìn de la machina tra ‘n quart d’ora…

MA LA GH’AT SEMPER

EN TESTA?

Ciao Cornelio, che ‘n pezòm che no te vedo… tut bèn? “Fi … fì dai” (?!) Ma e co la sposa? “Ben ma fì…fì…dai”. Scolta dai che ‘na sera vegnì a magnàr na piza con noi, ah? “Fi…fi fàrìa bel”. Così ricordèm i veci tempi de quando eren morosòti…te ricordìt? “Fì…fì”. E te soni la chitara come ai veci tempi, passèm na bela sera ensema…oh vei anca me marì e i putelòti neh, la to sposa e…gh’at fioi ti? Ah madona, che te sei nòno, l’è vera, el sarà zamai grant to neò adès… “Fi…fi “. Dai alòra che ne metèm d’acordi una de ste sere, ah? Anzi, podrèssem far stasera, dai che fago en colp de telefono ai mei… “Fi, fi ma prima…devo far qualcòf…”. Scusa neh, fin ades no t’ho dit gnent, ma te continui a dir fi…fi par squasi che te gh’abi en testa sol quela roba lì, no sta ben dai, po’ cosa voleresti far adès…con mi…dai lassa star valà che l’è meio… “Fi…fi…ma prima…” Senti Cornelio, basta, fin che se scherza se scherza po’ basta, no te pensevo ancora sì maniaco… “Fi…fi….no, no, prima dovrià però…” Basta Cornelio, te saludo te sei propri en sporcòn lassetel dir… “Fì…fì fe te me laffi dir difevo…che devo nar dal dentifta a tor la dentiera che la m’è fè rota…

TIRA TUT ENDRIO DE N’ORA

Su le prìme, disèntelo, te pàr squàsi che qualchedùn el te diga: “Dòrmi, stà tranquilo soto le cuèrte e i linzòi, che l’è demò ancora prèst per levàrse su”. Dopo però, quant che te te sei remenà ‘n par de volte de pu, tàca via la solita sòlfa: l’è le òto, ma sarìà difàti le nòve, l’è le nòve ma come dìs l’orolòi che no t’hai tirà endrìo, sarìa di fato le dèse. Vers mezdì, mezdì e mèz fènte, scomìnzia la tiretèra de la fàm. Oh, sarìa passà anca l’una e mèza de dopodisnàr…de solit a st’ora erèn zà drio a bever cafè e sgnapèta per el resentìn… E ‘nvanti tute l dì fin quando se dìs: “L’è mezanòt, ma sarìa l’una, forsi l’è meio nàr a paiòm”. Che ve dìga, se sparmierà anca corènte, se gh’avrà anca la sensaziòm de dormìr de pu, co st’òra che và evntanti e ‘n drìo. Spieghèghelo però anca al mè cagnòt de tegnìr i so bisogni n’ora ‘n pù ala matina perché sarìa sì le oto ma l’orolòi el segna le sète.

L’ORA GIUSTA

Oscia, devo ricordàrme, domàn, sàbo, de tiròr endrio l’orolòi. Perché, se sa, tornèn a l’ora del sol. Ensòma, te pòi dormir n’ora en pù. Che po’ se te te ricordi t’avèvi dormì n’ora en men a so temp quando gh’era l’ora legale. Legale? A posto co la lègie? Ma a che ora? I ne fa nar en qua e ‘n là – i dis – per sparmiàr corènte. Cioè, no so voi, ma mi la capìsso cosìta: t’empìzi la luce quando? Quando l’è strof no? Alora, tra pochi dì, domàn, te dovrèssi empizar la luce n’ora dopo o n’ora prima? El so, el so: vegnirèm for dal let tuti quanti disendo le istèsse robe: “L’è l’è oto de matina, ma sarìa le nove, se ciava…”. Bel no? Te pòdi svoltoralte nele cuerte e nei linòzi n’ora ‘n pù. Bel no? Te poi dirghe ala spòsa: “Varda, stamatìna el cafè el fago mi…disènte tra n’orèta. Entant vei chi cavalòna che gh’avèn n’ora per far le nosse robe…”. Envèze? El so mi come la narà a finìr…el so zamài… Vei le sète, le oto, le nove…’sa fente? Nente o stente? Dai che se no se profìta de ancoi che gh’avèn n’ora en pu da dormir… Po’ ‘riva mezdì. (Che sarìa l’una de dopo disnàr). E se nèssen a farne ‘na pizza? Oscia, bela idea. Ma me par massa prèst…i sarà lì, en pizèria, che i mete ancora zò i mantìni…

NO TE ME LA CONTI GIUSTA

E mi, de sòlit ‘sì petenìn con tut e tuti che son nà a fidarme de ti. No l’avès mai fàt. Se po’ penso a quel che te me sei costada, al temp che gh’ò mès per zercar de capirte, de farte dir qualcòs soratut quando neven ensèma, via da cà, en posti che me sa no t’avevi  mai vist o enmaginà. No te eri sol na bona compagnia per mi da ani semper en giro a scorlandon e sol, rebuf, come en cagn lassà per straa. Gh’era nela to voze, en prinzìpi almen, quando ero propri ennamorà, gh’era nela to voze qualcos de misteriòs, che te ciapèva el cor oltre al zervèl vist che, se sa, le man le era ocupae a far alter. Voia de seràr i oci, de lassarse ninar: ma no podèvo, no podèvo. Se no t’avès vist, vizìm a mi, se no t’avès vardà ben ah la saria finìa mal, propri mal me sa. E alora semper tacai come se gh’avèssen la cola. No ghe la fevo, ogni tant, a no tocarte, a far en modo che te me disèsi qualcos. Soratut de not, quando magari con zò en bicièr, se fa pu fadiga a vegnirghen fora anca per far quei dozento metri che manca al garàs. Finchè quel maledeto dì me m’hai lassà nele me strazze. L’era da ‘n pàr de stimane, a dirla tuta, che t’eri ‘n po’ sule tue. Ogni tant pareva che te zavarièssi. Bisi per fave. Robe che no steva né en zel né ‘n tèra. Epura no t’avevo fat gnent de mal. Tratada come semper. Portada con mi dapertut: anca dai amizi, dai suoceri, en vacanza, a tor la pensiom. Gnent, te te sei messa en testa na roba e te continuevi a bater quela solfa. No cara putela del navigadòr satelitare, no cara mia viale Roveredo de Vignole de Arco, dove abito, no l’è viale Roveredo de Riva del Garda. No, te te sbagli oscia, se te dico de portarme a me cà no te devi ensister che vaga a trovar el Carlo Modena al so albergo Briom. E po’, scuseme, ma che faga, che diga, cosa capiresselo el Carlo se ghe capito lì ale doe de not?

QUEL DUBI GROSS

Gavevo en dolor  ala panza. Ero sicur che se tratès de brusor de stomech.  Perchè alora ero sposà e la la me sposa la feva sempre la stesa roba da magnar: na roba todesca, anzi, da esse esse,  dura da butar zo: el polo ala Himler.

No me neva però de tirar fora vinti euro sol perchè en dotor qualsiasi el me dises quel che zà savevo da per mi. E cioè che gavevo acidità de stomech. Però, putei, sto dolor propri lì nol neva via. E ero n’atimim preocupà.

En quei dì po vei fora cge anca en me caro amico, el Benedeto, el gà i stesi fastidi, nel stess posto. Alora, me son dit, se convinzo el Benedeto a nar dal dotor a farse veder, vegno a saver quel che m’enteresa senza spender n’euro.  SEmplizon no?

El Benedeto dai e dai el và dal dotor. El vei de volta e el me dis: “Ah, l’era

sol brusor de stomech, el dotor el m’ha dit che no ghè da preocuparse”

No ghe fago veder che som content per la bela notizia che enteressa anca e soratut perchè ho sparmià i soldi della visita. El saludo, vago a casa,

e tiro en sospiro de solievo.

Do di dopo el Benedetto el more.

Ostrega, me digo, meio che vaga a farme veder a l’ospedal a sto punto. I me

ricovera. Na serie de analisi, lastre, che no finiva pu. Vei fora che l’è sol

brusor de stomech. Ma devo pagar zentodese euro de ticket. Diaolporco.

Spaco su tut quel che trovo en casa dal nervoso. Ma dime ti… L’altro di

encontro la mama del Benedeto. Ghe domando: “Alo sofert tant?”

No, la me fa ela, l’è mort sul colpo. L’è sta ciapà soto da ‘n camiom entant

che el vegniva fora da la farmacia dove l’aveva tot qualcos contro el brusor del stomech.

EL RAFREDOR

Vardo la lavagnòta dove, da quando som en pensiom, me segno tut: se manca el sal, se manca l’acqua, se ghè massa vim, come me ciamo, robe cosita. E oscia, l’aspirina l’è finia. Ma l’è zamai zento volte che ‘l scrivo. Vot veder che l’ho scambiada per el bicarbonato? E se no l’è da secoi che gò stra ‘rafredor maledeto. Che l’è la pezo roba che poda capitarte. Te stai mal, te sei entasà de pu’ de ‘l cesso ala vecia staziom. Te par d’averghe en gnoch frit co l’oio vecio en testa. Però…no te gai fever. E alora te poi star ‘n pè. Ma no te poi fumar, far el figo, saltar, o anca sol star lì a lezerte en libro, vardar la televisiom. Perché ‘sto giòm el te fa sentir en mez catorcio, na coriera che fa finta de essere en trerode, en sors che ghe fa bruti gesti al gat e po’ no l’è bom de scapar. Ma diaolporco, elo posibile che en ani e ani de studi magari i ghe envei fora co tante malatie brute e no i è bomi de far qualcos…che no te faga vegnir el rafredor? Vegniria quasi d’entaiarsela che ghe rende de pu vender quele pirole, quei sprai, quele caramele….quando zamai te gai la gozza al nas.

NO VOI PU VEDER GNENT

Empizo la televisiom. E l’è ‘na fila de robe brute. Zent che copa e se copa. Quei che se taia su a tocheti. De là el cine de uno che l’era mort, el resusita e po i lo copa de nof. Sul giornal, en prima pagina, un che ‘l dis d’aver copà en guera almen dozento omeni. Basta, basta, basta – digo entant che me sento a zena – basta, almen entant che magno no voi sentir pu gnent, gnanca volar na mosca. E zachete, la sposa la tira fora la paletina e la copa l’unica mosca che gh’era. Content cosita o vot che vaga fora a coparle tute?

FATE ‘N PO’ VEDER DAI …

Oscia, ma…oscia set propri tì? Ma dai, no ghe credo. Quanti mesi saralo che no ne vedevèn? Trei? De pu? Ma ma ‘n mona valà. ‘sa t’è capità? Vara, se no fus che gh’envegno ancor fora co le fisionomie e che ho cambià ociai no avria mai dit che t’eri propri ti sat… Come no te me conossi. Come…son el Cornelio oscia, dai che nèm a beverne ‘n cafè. – Se proprio lo desidera… Cossa? Te me dai del lei adès? E po’ che fat co la giaca e la cravata che ancoi gh’è n’afa che stofega… – Guardi che mi fa perdere tempo, avrei altro da fare. Ma valà, te me toi per le bale dai, vei chì vecia spugna dai, ho capì, ti a ste ore te vai zamai a spritz…ahahahah. Te ricordit quela volta che t’ho portà a cà su la cana dela bici? T’eri stinch come na rana. E po’ se no basta te l’hai ciapae anca dala sposa ahahahaha. – Non ricordo questo episodio. Ma ‘sa fat tut en gringola? Hat cambià laoro? No set pu zò da quei dei marmi? – Mi ha assunto una ditta come rappresentante … De cossa – Diciamo che sono cose riservate. Ma oscia perché te parli ‘n taliàm? – Altrimenti non ti capiscono nel settore dove adesso opero. Ah sì, sat cossa te digo? Fate veder. Fate veder da ‘n dotor. Ma da uno de quei bravi però…

EH OSCIA …

De colp me scàpa l’ocio. Su le mèil. Carta di credito bloccata. Elamadona. Vot veder che la sposa l’ha comprà qualcos senza vardar quanti soldi gh’avèn sul cont? Ah – digo tra de mi – la vegnirà ben sul bachetòn. Oscia, i n’ha blocà la carta. Vol dir che sen soto, soto… de pu che nar ne le grote de Patòm. Vardo meio sto mesagio. Che l’è strani. Perché no i me dis de meterme a posto. Sol de darghe i me dati. Ma benedeto, se te me disi che son fora come ‘l levà vol dir che te sai zamai tut de mi, dei me conti, de quel che hò magnà fora. O no? Gnanca el temp de pensarghe su e ‘riva n’altra meil. Stavolta l’è la Posta. Anca chi la va mal che pu mal no la podria. Diaolporco. Ma mi no gh’ò mai avù conti en Posta. Ah, quando ariva la sposa la fen fora ‘sta storia. Tei, son pensionà. No podo miga pagar con quel che no gh’ò…La dovrà darse na calmada. Ah se sa, le braghe en ‘sta famea le gh’ò ancora mi. Che no vegna for monae…

NE TROVERENTE ANCORA?

Da boci i ne feva ‘mparàr a memoria cossa risponderghe ale domande del catechismo. No te podevi averghi dei dubi. Quel gh’era scrìt sul libro de religiòm. Quel bisogna dir quando el prete el te ciamèva davanti ala lavagna. Po’ qualchedùn l’è nà davera a studiar da prete. O da frà. No me ricordo tante suore dela me età. E po’ chi pù chi mèn n’avem fàt de tuti i colori. Sposai do volte. Zent finìa mal – come se diseva alora – per colpa dele cative compagnie. O perché – semper come se diseva nei ani sesanta-setanta – i era così propri come famèa. Come se no se podès deventàr santi se te gavevi ‘n ppà ‘mbriagòm. Mi no son mai stà en stinch de sant. Fàt el cieregòt, finì nei scaut, po’ en quei che sonèva en cièsa. Ma dopo ho molà zò ‘l picòm, come se dis. Anca perché adès, come tanti, no podo pu far la comuniòm gnanca se stago denter nel confessional ‘na stimàna. Ho let entant na ‘sbrazàda de libri. Sì, el Vangelo, la Bibia, anca el Corano … tacando da zo ‘n fònt. E po’ le tradiziòm dei cinesi, dei indiani (anca de quei senza frecie), e libri e poesie tut quel che avria dovù ‘nsegnarme a creder en qualcòs, dopo mort. Ogni volta che more qualchedun che conosèvo, ogni volta che sparìs, da la matina a la sera, n’amico, tiro fora sti tocheti de carta che nei ani ho mess nel cassetìn. Lezo, rilezo. E me par de dar la testa contro ‘l mur. Me sento zò, né fodrà né ‘mbastì. E digo semper le stesse robe: Ah me sa che gh’envegnerò fora sol quando la tocherà anca a mi. Ma de là ne troverente ancora?

AH ME SA’ CHE STAVOLTA…

‘Sa gat che te vedo ombròs stamatina? No stà dir gnente, gnente… Va bem, ma par che i t’abia strucà le bale tra le ante de na porta… No sta dir gnente, ho dit… Dai, molete fora. Ma sì valà, dai che bevem…bevem…no so gnanca mi…bevem qualcos dai. Ensoma, tei chi i risultati dei esami…gò el colesterolo sbarà for da le mine, i trigliceridi che ì è pu alti del sp…rid quando l’era pu alt de ancoi se sa, quei del fegato i dis che praticamente som mort ma no ‘l so…Dai, dai…qualche bicer en men, lassa star le luganeghe, el vim, la coreziom del cafè, i bicerini dopo…te verai che ‘n den par de mesi tut se mete a posto…Sì, te la fai fazile ti. A posto. Vot che te diga na roba? Me sa che vago a farme ciavar stavolta. Ma dai, dai per sì poch? L’è sol questiom de darsena regolada.Tic tac, l’oroloi el funziona come prima. Ma no l’è quela so mare…. E chiela so mare alora? L’è che i m’ha dit che gò el fegato brusà. Ma si, te sai come i è i dotori. I esagera. Ma diaolporco, brusà el fegato, come saral success che l’ho sempre tegnù bagnà?

L’ISTA’ MAI SCOMINZIADA LA STA PER FINIR

Zà ades vei el fret beco. Come esser tuti nel frizer. Praticamente tuti soto giaz come le confezion del capitan findus. Quando l’economia la narà meio, quando i avrà (ma chie? Quei che è nà a studiar al calt?) capì come guarir tute le rogne, i ne tira fora dal sachetel. En colpet de fon e tornem tuti come prima. No, meio. Senza tanti malani e tuti pieni de soldi da no saver come spenderli. Dai che ogni tant l’è anca bel contarse le bale …

NO VEDO L’ORA

CHE TE VAGHI FOR DAI PEI

Vara, t’el digo scièt quel che penso: de ti zamai son stuf e agro. No vedo proprio l’ora de no averte pu ‘n tramèz ai me pensèri. E quel dì, ah, quel dì farò ‘n balòn da no stàr pu ‘n pè. Cossa? Cossa? Te gh’avressi el coragio de dirme che senza de ti no gavria quel che gh’ò adès? Che senza de ti sarìa ancora ‘n giro a domandar l’elemosina? Ma valà, valà. Che son stà mì, sol mi, tuti i dì, tute le stimane, tuti i mesi, tuti ‘sti ani a averzer per ti el portafoi. A tegnir a man i soldi sol perché ti te continuevi a domandarmèn. E guai a no esser pronti a tirar fora i schei per ti. Guai a domandarte qualche dì ‘n pu per pagarte quando ero nei gazèri, quando no gavèvo gnanca da poder comprarme da magnar se no basta. Dura anca to mare. Che la s’ha semper profità del nos ligàm. Fat de firme dapertut, de robe che per forza ne tegniva a un, ma de zerto no de amor tra noi doi. E gnanca de rispèt, de comprension. L’è per quel caro mutuo en banca per tirarme for ‘n toch de cà che adès che t’ho dat quel che dovevo no voi pu vederte en mèz ale me carte. Va da altri a roterghe le bale tuti i mesi. Mi son a posto e guai a ti se trovo ‘na to letera ‘n tra la posta.

CURARSE SENZA DOTORI E MEDIZINE

Pensè de tor zò le goze per dormir? Gavè altri malani? A forza de nar avanti e n’drio dai ospedai e dai medizi me son fat ormai na cultura. Che come sempre ve regalo. Perchè son bom come el pan de molche, ma no stè esagerar che dopo el ve se ‘ncioda nel stomech. Alora, partim co la prima leziom e col conceto che conta de pu. Noi, omini, done, puteloti sem praticamente dele machine. E come le machine – anca se te le lassi nel garage col nylon ancora sui sentai – prima o dopo dovem darne na regolada. Ecola, come l’è:

LA PRESSIOM. La regolè ogni tant anca ale gome, quindi dovè farlo anca voi. Però ste atenti. No se la misura sol su ‘n den braz. Ma su tuti doi. E anca su tute doe le gambe. Ela alta? Alora ve metè na man en mez ale gambe. Serè…serè el bus che gavè lì (quel dei omini le pu picol, basta do dei e schizar). Po fe en sforzet e butè fora l’aria en pu dal de drio. Ades no so come ve sà pu comot a voi, ma mi diria che davanti (i brazi) se poderia star sule tre atmosfere. De drio (le gambe) va bem anca el do e mez. Po dipende se sa dale stagiom.

L’ALIMENTAZIOM. E se sà che l’è emportante. Senca corente no se ‘mpiza gnente. Alora, do bele pile entant. No quele ricaricabili che tanto dopo le desmenteghè en giro…e le costa de pu. No basta quele che te trovi ala cassa del poli, quele normali. Te stai atento al segnet, pu, men. Da na banda uno, da na banda l’altro, sula lengua. Sete sente en brusor, no l’è gnente, vol dir che ghè corente. E che te te stai cargando. Se no te sente gnente l’è le pile ricaricabili che t’hai tot for da l’armadiet per sbaglio…e che le è zà da ricaricar.

LE LUCI. No ghe vedè pu tant ben? L’è perchè tegnì empizà i oci tut el dì. El so che ghè la lege che obliga a farlo. Ma sol ne le strae extraurbane. A casa, entant che laorè (se savè a memoria la tastiera del computer per esempio) no ocor. E così le ve dura de pù. Capì come?

OSCIA, me son desmentegà de dirve cosa far per la presiom bassa. Scuseme, rimedio subit. Alora praticamente fè la stessa operazion che avè fat per la presiom alta. Sol che dal de drio enveze che farla nar for (l’aria) la metè dentro. No stè… usar compressori che ve fè del mal. Basta la pompa de la bici (gavrè qualchedum che ve dà na man en casa). Sentì subit (basta tocarse brazi e gambe) quando la pressiom l’è quela giusta…

COSSA VENDE’?

Sul cartel fora da la botega na fila de parole en ingles. Vedo che ghè su la figura de ‘n martel. Ghe sem: i venderà anca i ciodi…Te vai dentro e subit na putela che fa finta de tirarse zo la vesta (l’è picola…te podeve torne una pù granda se te te senti massa nuda adess) la me domanda cosa voi. Difati me sento spaesà…ghè spegi dapertut…che sia finì dal vedrer? E dopo ghè strani odori? Magari i li envernisa anca i vedri…E sta putela che la me varda come se fus na bestia. Som apena vegnù dal soler…gò da meter a posto do porte vecie che dà su l’abaim…no som vestì de zerto da le feste. Desidera? Ah te savesse popa…ma som chi per i ciodi… No non vendiamo quel tipo di giubbetti…non sono più fesciom. Cossa? No gavè le confeziom de ciodi da dese? E demen? No fesciom…sono superati ormai dal mercato. Ah, no ‘l fa pù faziom tegnir i ciodi…gavrè anca voi le vosse resom co la crisi…ma sì, la me scusa, vago al Brico valà…No, non teniamo la marca Brico. Ma che marca è? Magari se mi dà qualche informazione in più potremmo vedere di prenderla…No, no signorina, la vegneria massa longa, i ciodi i me serve subit per subit…la me saluda el sior Fesciom, sì, el parom…

Excuse me, knows where there is  a fashion store? Do turisti che trovo en piazza. Fesciom? Ah sì, la botega del sior fesciom lè dozento metri pu ‘n vanti, vizim al tabachim. Ma se ve serve ciodi no i li tei pù perché co la crisi no ghe convegn.

NO SE POL DAI …

La fa la sposa: molete fora, semper drio a quel compiuter, dai che stamatina sul prest (ale 8 neh) nem a far do passi (?!) sul lungolago da Riva a Torbole. Ma si dai, me digo, togo do giornai così a metà me sento su su na bancheta e ela che la faga pur la maratona…en bel zigaret de prima matina, che el libera subit i bronchi. Ensoma via de nare. Se parte dal port san nicolò dopo aver trovà posto per la machina sora el depurator. Così no te paghi. Perchè tei l’altra sera davanti ala spiagia dei olivi, do euri per n’ora toi. Va bem via a peoti. Dai che l’è anca bel…a ‘n zerto punto sento ale spale en colp de vent. L’Ora del Garda così de bonora ?, me digo…No, un co la  bici da corsa, la maieta piena de reclam, el casco che el core come se ‘l doves vinzer na gara. Me tiro en banda en temp, E davanti vedo che altri tre coridori, stavolta coi rampichini, i fa zig zag tra la zent e mi som propri l’ultim palet del so slalom. Me tiro pu vers el Briom. E sento driiiiin driiiiin. No ghe n’ho drio altri doi che va en para? E così fim ala paserela sul Sarca. Dopo l’è anca pezo. Perchè un co la bici el me vei fora a tradiment da na curva a gombet, vizim al port dei pescadori. Avanti avanti, en po’ de calma davanti ala pavese (dove ghè el baret) po de nof la rumba. Ghe fago ala sposa: La prosima volta l’è meio che nente sul stradom…no sul marciapiede, propri sul stradom, magari sula riga bianca en mez…sem pu sicuri.

TE ME SEI MORT EN MAN, DE COLP

Quant’èrel che ne conosevèn? En par de ani? Ah no, forsi anca de pu. Te ricòrdit quante ciacerade anca de not? Mi che te tochèvo dapertùt. Ti che te lassèvi far. E po’ tuti quei amìzi. Bastèva na parola, a volte gnanca quela e ti te sonèvi. Magari semper la stessa canzòn. Ma no te te strachèvi mai. T’eri semper a disposizion. En libro avèrt. Ne capivèn al volo mi e ti. Semper tacài quasi co la cola. Not e dì. Se dormivo ogni tant te devo n’ociàda per veder se te gavevi bisogn de qualcos. Se t’eri zo te tirevo su. Dele volte, l’è vera, t’ho tratà anca màl. Qualche pàca l’è scapada. Ma senza volerlo neh. Perché noi ne volevèn ben. No avria mai podù star ‘n moment senza de ti. Sì, l’è vera, gh’avevo fat l’ocièt na volta a quei pu bei, pu zoveni de ti. Ma no t’avria mai lassà per n’alter. Zamai ero abituà a ti. Savevo cosa far per farte star ben. Savevo cosa podevo far con ti. En ogni moment. Po’ quela maledeta sera… Me vei da pianzer se ghe penso. Quela maledeta sera. Avevo fat massa miscioti al bar. Ero drio a contarte monae. Forse t’ho anca dat en buton. E te sei finì soto la machina. Pecà perché el so, en telefonin come ti sarà difizile trovarlo ancora…

VEGNIT?

Dai, dai oscia, ‘sa ghe vol… E dai ‘cramento. Vara che l’è zamai dese minuti che son chi che speto che te vegni. Dai….Daiiii. Ie. No, no, no sta fermarte. Sì, da quela banda li. Cosita…dai, envanti ades. No, no, no sta fermarte lì propri ades. Noooo. Che fat, che fat adès? Tornit endrio? No, no che dopo bisogna scominziar de nof tut quant. No, no propri ades che t’avevi trovà la straa giusta. Eco, eco, adès te ghe sei…vei, vei. Sta calmo. Calmo. Calmooo…eco, envanti. No endrio adès. Envanti. Piam, piam. Pu svelto ades…eco, eco. Dai. No, no sta vegnirme adòs propri adès neh, che son chi che te vedo e te speto. Eco, ades te poi smorzar che t’hai parchegià. Ah, scolta, vara che chi bisogn pagàr….l’è do euri l’ora. La machina dei biglieti l’è lì…lì ho dit, no stà vegnirme ados co la machina.

NO NE VEDEM ZAMAI PU …

Che bel quando te vegnivi da mi. Tuti i dì. Sule prime, devo dir, con rispèt. Magari squasi bianch come na peza da la paura de farte veder dai mei. No come to sorela enveze, quela …  che la steva fora tuta la not e no se sa ‘ndove. Se se vedeva de strafuch, come se fa le prime volte tra morosòti. Ah che bei quei basi che te me devi sule sguanze, mai sula boca. Che se no saria stà pecà … e magari saria restada scotada … come sui zochi, come diseva me mama. D’istà po’ l’era ‘na festa. Podeven vederne semper pù spès. E anca tirarla longa a ciacierar ensema. A far le nosse robe. Entorno i fiori, le piante – sarà stà na me impressiom?  – quando te le vardevi ti le sbassèva la testa. Fin squasi ai pei. Pareva che le te adorès. O forsi anca lori i gavèva rispet, come te ‘lgavevi tì con mi, vers i primi mesi de l’am. Bem, st’am t’ho vist poch: ‘sa è suzès? No te me voi pu bem? T’onte fat qualcos de mal? L’è stimane che lasso averte porte e finestre per veder se magari te rivi de nof. Che la straa te la conossi. Che no te podi aver desmentegà tut de noi. Ma sto to no esserghe pu, dala matina ala sera, de colp, come se te fussi adiritura mort, el me fa pensar. E ancor de pu, caro sol de st’istà domiliequatordese, me fa mal quel che m’entaio: che te sei ti, da temp, quel che me pissa adòs a tute le ore del dì.

OSCIA CHE PACA … NEI DENTI

Ah no pensevo, no pensevo propri che la nès a finir ‘sì mal. Me l’ero ben entaiada neh, però cosita no oscia. Per dirte, m’ha fat men mal quela volta che son restà co la man denter la portiera de la machina. En par de dei roti, le stele da vardar en quel moment, po’ però pian pian l’è pasada. Ma stavolta caro l’è stà robe da nar endrè schena dal dolor. Che po’ el te ciàpa subite l zervèl, tuti i nervi, te vegniria voia de sbregarte quei pochi cavèi che t’è restà. No se pol soportar ‘na roba del genere, credeme. E te l’ho dìs un che el n’ha pasà de tuti i colori, miga uno che col rafredor el se mete nel lèt. Che te diga, adès son propri ‘n tera, come se me fus vegnù adòs vinti metri cubi de legna. Verda per de pù, no stagionaa. Perché disentelo dai, te sei rovinà dopo. E no te ciapì gnanca l’envalidità per de pù. Te parel giust che i te domanda na paca de soldi per giustarte la dentiera cascada nel lavandim?

VEI ZO, VEI ZO …

Dai, no sta farte pregar come tuti i di. Ho zà pregà assà quando fevo el cieregòt da bocia. Dai, vei zo che così ne metèm l’anima ‘n paze. Vei zo en tera, che zà sen pieni de miserie. Da l’altra volta, te ricordit? Quando se fat mal e tant quel por Cristo. Vei zo te digo. No, no te fai ‘na bruta fin se te me scolti. No, tranquilo, che zamai ghe penso mi a calmar i altri. Basta….basta che te vegni zò ‘n pressa da quel murèt popo che se no la va de scopeloni.

EL DISCORSO

Perché diaolporco l’è ora de finiamola ‘cramento. Che no se pòl nar envanti così. Con zent che promete de sbassar le tasse e quando la ciapa el voto ciao Nineta. Che diaolporco l’è semper quei che va su. Che fa i so comodi. Che dopo no te i vedi pu dove ghè i casini. Fati ghe vol no ciaciere…fati oscia. E se ne dè ‘l voto noi faren. Senza tant girarghe entorno. Le tasse? Le sbassèn oscia, subit. I mutui?  Nem noi dale banche a farghe tirar fora i soldi. I ospedai? Noi no i serèn…ne averzerèn de novi oscia. Le fabriche? O i assùme e se no….aria al dado, for dale bale. Altro che soldi dela provincia. Altro che agevolazion…

(dopo l’elezione, risposta al telefono della segretaria): Sì, sì ho capito. Ma l’assessore purtroppo è a Roma in questi giorni. Mi lasci il suo numero di telefono o la sua mail…la farò chiamare. Certo….certo ho capito….si glielo dico che lei è il signor Tal dei Tali di Besenello….sì sì… quello che gli ha tirato su tanti voti….certo….

GNOZI TE AUTON

VUOI CONOSCERE TE STESSO? GNOZI TE AUTON COME DICEVANO I GRECI? ALLORA GUARDATI ALLO SPECCHIO. GUARDATI. ANCORA. SEI TU QUELLO? O VORRESTI ESSERE DIVERSO? TI PIACI? NO? E ALLORA COME VORRESTI ESSERE? CI STAI PENSANDO O NON TE NE FREGA NULLA? ALLORA VA BENE COSI’? IN PARTE ? COSA CAMBIERESTI ? IL CENTRO CHIRURGIA PLASTICA “TE METO A POSTO MI” E’ A TUA DISPOSIZIONE. CHIAMACI ALLO OO-000-1111

PENSIERIN DE LA NOT


Vardo for da la finestra. Oscia, no piove pù. Me par na roba strana. En ‘st’istà semper bagnada. Vardo la televisiom. I dìs che forsi ‘l pioverà. Anca doman. Ma se ciava. Me togo drio ‘l sugaman. Ma no per far el bagno. Nel lach o ‘n piscina. Propri per quele do gozze. Che prima o dopo veign. Me dis la sposa: dai che i fiori de soto i và brevai. Ghe digo: ma valà che prima o dopo el fa do gozze…st’istà la va così. Almen per quel…

DA QUANDO TE SEI NADA VIA …

No, no te me manchi. Non pu de tant e no ‘l digo per finta. O per far quel che adès l’è pu dur de prima. Te dirò: m’ero zamai abituà a star con ti. A passar tuti quei dì ensema. Pu nel let che fora. Ah, da quando te sei nada via sule prime, ‘pena passà quel calt, ‘pena che tut s’è sbroentà, me son sentù de colp fiach, gnech. T’eri ti che te me scaldevi. T’eri ti che me feva anza zavariar. E sol perché ti te me stevi vizin, da la matina ala sera e anca de not, sentivo che ‘ntorno tuti i me voleva ben. Tuti i me steva drio. Tuti boni, tuti lì a darne na man. Quanti cine ala television avem vardà. Quante volte aven magnà e bevù sora el stess cossin. E che dormie. Che bel cocolarse. Mai lassarse n’atimo. Mai nar fora de casa, semper tacai come la cola. L’è da na vita che ‘l digo: tutmal quando te gai la fever te te polsi e ‘n casa i te trata come ‘n re.

BASTA, DIAOLPORCO

Basta, basta diaolporco, bisogna darghe ‘na sterzada. “Te gai reson, te gai reson” – Perché ‘cramento l’è ora de finiamola. “Te gai reson, te gai reson” – Che…che….cosita no la pol nar envanti “Te gai reson, te gai reson”. – Che bisogna rebaltarla… “Te gai reson, te gai reson”.  – Che fin adès i ha fat sol casin “Te gai reson te gai reson” – Che a quei come ti che ghe dà reson a tut e a tuti senza saver de cossa se parla… “Te gai reson te gai reson” – Mi… mi…oscia, squasi…. “Te gai reson te gai reson” – Mi squasi, se podes, dopo che i m’ha date l voto, i manderia en mona” – Dime quando, dove e con chie…te gai reson”

SPARMIAR ANCA ‘N BAGNO

Costa tut n’ocio de la testa. E ades ariva i boi de l’auto, de la televisiom, le bolete (pu care) del gas, de la luce, de l’acqua, dei rifiuti. Ensoma, i ve tira via la tredicesima e anca la quatordicesima. E anca el stipendio che ariverà (coi conguagli…mmmm) Alora, scolteme mi, meti via i giornai veci. Tei tai a strisce longhe e larghe na quindesina de schei. Poi te fai la zonta co la cola che usa i boci a scola. Te rodoli su tut e ‘n mez te ghe meti en bicer de plastica vot, tipo quel de jogurth, così te gai anca el bus da na banda per tacarlo vizim al wc. L’è massa brigos? Alora ghè el sistema dei cantèri. Do sforbesae e te gai subit na vintina de cartine pronte per l’uso…magari te podi anca pasarte el temp a lezer qualcos…po na ucia de sicureza che tegna el tut…e te vai en vanti na stimana…sempre che no te sia vegnù el cori cori

STAVOLTA I M’HA BECA’

Oscia i m’ha becà. Tasi, tasi. Te digo che zamai i m’ha becà. No sta dir alter, respira, parleme, dì qualcos. Te digo che i m’ha becà E pu de na volta oscia. Te capisso…m’è capità anca a mi.  Però a ti mp i t’ha becà come a mi…me paf de averghe anca la fever. Tranquilo, ghe son chi mi…. Maledeti…maledeti… Che po’ no me son gnanca acòrt neh…. El so el so, i è vigliachi….maledeti…. Stame vizin, te prego, no ghe la fago pu…. Sì, son chi, son chi….Te prego neh, fa qualcos, me par de brusar…. Speta speta…che te meto la crema che m’hadat la sposa contro i beconi dele zinzale….

“NO LA VEDO DA ‘N PEZ”

“Ciao Giani, com’ela?” – Ah, vederla demò. “Va bem dai ma te sai come l’è no?” – Eh oscia, vot che no ‘l sapia? “E alora?” – Alora gnente. No la vedo pu da ‘n pèz. “Eh oscia, ma dai…” – No, te digo, sarà zamai n’an forsi anca de pu che no la vedo. “No ghe credo, un come ti, che se ‘l voleva…” – Te digo de no. No, oscia, gnent via gnent. “Elamadona, te sei propri mes mal… e alora cossa fat?”. – Me rangio tei, cossa vot che faga, me rangio….come se pol. “Zerto che finir cosita…un come ti po’….” – Eh caro, capita sat, la pol capitarghe a tuti… “Va bem però…” – Però cossa, la me manca entant….e tant la me manca. “Ma come mai, così de colp…propri ti” – Caro, veci se deventa. Se passa dal massa al miga mai viceversa. “Zerto che no l’avria mai dit….propri ti. Che ‘l tacheva via con una e ala fin el se ne feva na desina tra disnàr e zena….” – Te l’hai dita giusta, e stevo benom sat. Fresch come na rosa. Col me bicierot, la me fumadina dopo, cafè col resentin…pronto per farmene n’altra. “Me dispias…me dispias tant. Alora no te vegni me sa st’an su con noi a San Zoàn…” – No, no, ‘l dotòr el m’ha dit che no podo gnanca sentir l’odor de le luganeghe e dela polenta…me faria mal anca quel…

DIME TUT

–        Dai alora, cònteme. “Oscia, chi, su do pèi…” – Ma no, dime, dime. Buta fora… “Mah, no savrìa…” – Ma fidete, fidete, sen tra amizi no?“ “ No l’è quel el concieto, no l’è quela so mare l’è che…” – Se no l’è quel sarà que l’alter o que l’alter ancora no? Quel che me premeria saria saverlo anca mi. Se no no podo aiutarte. E po’ scusa, te sei stà ti me par a vegnir a trovarme a domandar ‘na man o no? “Mah per quel, giust perché passèvo de chi neh…no savevo gnanca mi. No me fidevo ensoma” – Eco, vedit che te devi sbrocarte? Vara che te gai na cera che no me pias per gnent…e cossa fat po’ en quele condizion….ma set vegnù for de casa cosita? Te devi esser propri disperà… “Vara no te ghe n’hai gnanca n’idea….no te poi enmaginar en che situazion me trovo” – Ma vei denter en casa dai, ‘sa fat chi al fret, co la camisa, mez sbragolà tra l’alter…dai che te dago qualcos de forte da bever e po’ te verai che se vede le robe en de n’altra maniera…. (apre la porta e la moglie si mette a gridare) No Gino, no no ‘sta coparlo….lassèlo star…no avèm fat gnent t’el giuro sui nossi popi. Sol ‘n baso m’è scampà, en baso sula sguanza…. Sen deventai tuti doi rossi e lù le scampà..-sì l’è scampà fora dala finestra dela camera quando l’ha sentì el rumor del to furgon”

LA VA E LA VEI

Ma se pòl, ma se pòl? Te vai, te vei. Soratut de not. Propri sul pu bel. Ma cosa elo ‘sta storia? Chi sonte mi per ti? Un che tira sol fora i soldi quando ghè da pagar? E po’, diaolporco, dai. Avanti e ‘n drè. Prima te me lassi far quel che voi. Per ore. Po’ de colp, te vai via. Senza dir né tre né sei. No se fa così. Mi t’ho semper dat quel che te me domandevi. Mi fago cont che ti te ghe sei quando gò bisogn. T’onte mai lassàda da sola, magari dopo che ero stà mi, propri mi, a farte vegnir? T’onte mai dit qualcòs che no neva? Quando te nevi e vegnivi, te nevi e vegnivi. Ma po’ te stevi chi, da brava, a far quel che sol con ti avria podù far? E ‘sta scusa dei lampi, dei tòni. Che te spaventèva… Dai, dai. Disentela tuta…te te ciami corrente perché te gai voia de correr. E de nar via quando te voi…

 

LE QUATRO ESSE

Mi dovria esser l’ultim a averzer boca su sta storia. O forse el prim. Se non altro perchè ho scrit sui giornai dal setantazinque. Credo de aver vist passar na desina de diretori, qualcos de pu de capi, tre editori. Se parte sempre bem. Basta pagine che cola sangue da tute le bande, basta meter el nas nel cul de la zent. Basta chi, basta là. Po la regola de le quatro “s” prima o dopo la torna fora. Per chi no lo sa le 4 esse le è queste: sangue, sesso, soldi e scandali. Per no desmentegar gnente se podria tagarghe anca n’altra esse, tipo varie ed eventuali de le assemblee: sporcaria che vanza. La fago corta: quando va su sul giornal robe che gà a che far co ste esse, com’ela come no ela, se vende de pu. Perchè no ghè gnent da far: ghè chi va al cinema sol per veder zent che se copa, boci che zuga a sbarar sul computer, quei che ghe pias vardar en televisiom quatro semi serai dentro da mesi en de na casa o zent che gà en nome, famada, en de n’isola. Par quasi che sia mors tua vita mea. Le miserie dei altri le enteresa sempre. Se po l’è un che te sta chi, te godi anca. Anca en televisiom ho vist che da temp i ha ciapà sta anda. De pu. I fa anca i procesi prima del temp . Avocati, zent lezua, i ris che par che i lavora en televisiom enveze che dove i dovria eser. Forse l’è per questo che en tanti casi no i gh’en vei fora. O forse l’è perchè tra le esse bisogn meterghen altre: Sbararle sempre pu groSSe. E Senza Se.

LA RECLAM CHE TE FREGA

Alora, i te dis ala televisiom che ghè sto motoscafo (el se ciama Riva, ma no l’è dei nossi) te poi farlo su coi tochetini che i vende al tabachim. En sachetim a la volta (te tei far tegnir via, perchè se te perde na stimana pò te manca sempre qualcos) te te fai co le to manote sto motoscafo. Che l’è anca grant. Miga en modelim da meter sul comodim. Ma no l’è quela so mare, no l’è questo el concetto. Gnent de mal, ensoma, se uno el se passa via el tempo così…vol dir che de temp da perder el ghe n’ha. No, el me dubio l’è n’altro. Ades che i controla i conti en banca, quel che te gai e quel che no te gai ma te voleresi averghe, magari en dì te vei en casa per sbaglio un de la finanza. El vede el motoscafo e…Ma lei ha una barca. L’ha messa nel 740? Eco, enformeve bem prima de comprar i tochetini…che dopo magari, bem che la vaga, dovè pagar le tasse sul posto barca en bagno…ocio

EN BANCA

Problemi de soldi? E chielo che no ghe nà de sti tempi…Le banche no le ve aiuta? No le ve dà el fido? Ma ghè el Cornelio che agratis (a proposito gnanca un che ‘l te manda qualcos per sti consigli…bravi, brazoti corti, bravi…no ne dago pu) el ve aiuta a ‘rivar a la fim del mes. Alora ve spiego mi come far. Nè ala Rurale (digo Rurale perchè da le nosse bande ghe n’è una a ogni cantom) ma me racomando, col vestì del matrimoni, le scarpe da le feste, sbarbai, apena vegnùi fora dal barber…ensoma, a posto. Pò na valigiota de similpelle che par pelle, che da qualche banda sul soler la trovè…se no va bem anca le cartelle da scola de stiani…lucidae con quel che usè anca per le scarpe quando n’è ai matrimoni o ai funerai. Bom. Nè dentro coi ociai da sol anca se l’è strof. Ve dà quell’aria…ve da quell’aria lì. E spetè el turno davanti ala porta del diretor senza dar a entender che gavè pressa. Tut bem fin chi? Na volta dentro, deghe subit la man al diretor…el me scusa el disturbo…salo, capisso che gavè tant da far co sta crisi…ma basta do minuti, el me creda…vedelo, mi gavria dese milioni de euro a l’estero…però no ho domandà el scudo…che tanto, l’ha vist….quei che è vegnù fora a la scuerta ades i deve pagar ancora…no, mi son stà su le mie…sol che ades voleria farli vegnir dentro…disente così…metà e metà…en bon afare no? Zinque a voi, a lù sol se ‘l vol, senza tante menae de robe scrite…e amizi come prima…ghè sol en problema…dovria nar en svizzera a farmei dar sti soldi…no se pol far le transaziom co le nove regole…alora, lù el me fà en fido de vintimila euro sul me cont…così che lasso la mancia ai me amizi de zurigo…torno coi soldi e magari dopo nem anca a magnar el pes a affi…elo mai stà a affi a magnar el pes?

LAVORAR EN NERO

Se rote la caldaia. Perchè tra l’altro le caldaie le se rote sol quando anca da noi se và soto zero. Perchè le caldaie le gà – nol saveve? – na specie de afarim che snasa el temp. E quando fa fret, ma fret sul serio, quando gavresse mili altri misteri da far, quando avè zà pagà i boletini de zener e raspà el cont per benim, eco en quel momento giust lì le caldaie le se rote. E la sposa la và for da mat: “Ciama qualchedun subit, subit…no te volerai miga che stente chi al fret fin quando arriva l’istà…date da mossa…subit”. Alora, prima vardo la caldaia. No ghe ‘n capisso gnente, no ho miga fat l’enaip…la vardo come se varda le machine quando le se ferma: saralo che è finì la benzina dele volte? Ma sta caldaia chi la va a metano…e a meno che no i abia taià el gas dopo i gazzeri en libia…no, no el gas el ghè perchè el vizim de casa l’è lì che el me varda dal pontesel. E ‘l ride…ah ah quel che scrive sui giornai…prova a giustar la caldaia se te ghe la fai…l’è na sfida, vanzel qualcos?
“Ciama qualchedum, subit, lassa star la caldaia, che l’ultima volta te m’hai rovinà la lavatrice a forza de darghe peae per veder se torneva la centrifuga…ciama qualchedum subit”. E alora ciamo. Arriva propri quel che el m’aveva rimess a posto lavatrice dopo giornada. “ma cossa ghe fat ti a sti rochei? Toti co le man se no se sa dove meterle”. Va bem, va bem. La sposa la ghe mete su el caffè (no l’è che ghe sia qualcos tra de lori? ). E dopo n’oreta de tic e toc la caldaia la riparte. Ah, meno male. Forse l’è nada anca stavolta. Quant’elo – ghe domando. Varda – el me dis el Genio de tuti i rochei de casa – saria dozento euro co la fatura, che devo meterghe dentro anca la ciamada (ma se t’ho ciamà mi col me telefono, diaolporco…e no l’è miga festa…) ma se pol far demen…dai damen zentozinquanta e va bem così. La sposa la gà zà i soldi en man e la ghe dà anca l’aperitivo co le patatine. “Ah, se no te ghe fussi ti…’sa vot, me marì su ste robe l’è entrech” (Ma alora sti chi ì gà na tresca…). Ma come – digo – varda che ades i controla tuti, no se pol pu laorar en nero. E l’altro: “Se te voi ghe dago na smartelada ala caldaia e la torna come prima, e noi no ne sem mai visti, vala bem cossita?” La sposa la me fà i oci da belva. Ciapo su e vago al poli a torme qualcos de forte da bever per desmentegar…

EL GNENTE

Ghè na roba che fa pu paura del strof, de rumori strani, de qualcos che te pensi el sia scondù da qualca banda. E che nol te sia tant simpatico. L’è el gnente. Cioè proprio el gnente. Ma no l’è sol questiom de soldi. Cioè te fai qualcos per qualchedum e te te trovi do dei nei oci. No, l’è proprio el gnente de gnente. Quando te sei en mez a tanta zent e no te caga nesum? No diria. Pezo. Te mori e te vai nel gnente. Quela l’è la preocupaziom. O te vedi nei oci de n’om, de na dona, che diseva de volerte bem, el gnente. La stessa roba. O te pensi, te pensi…e struca struca te te scorzi che l’è penseri sul gnente, su le solite robe. Che nasse, vive e finis. Magari nel gnente.

I RICORDI I E’ COME LE NESPOLE

Sfsssssssssssss. I è dei lampi. Come nei cine: flessssssssssssssssh beckkkkkkk. El zervel, senza che ti tochi qualche tasto, el te fa veder foto vecie, a colori, en bianco nero, filmini girai ancora en super oto. Ensoma roba vecia. Tei vardi , perchè no te poi farne a men, no te sei ti che te volevi propri quel di propri a quela ora, meterte su i oci sti ricordi. E te senti en boca qualcos de dolz, lezer, bom. Te zachi alora, e de colpo par che sia deventà tut pu acido, quasi da tirar le fize da le bande de la boca. Come i fruti del nespol, sì, quei che gò el ciufet da na banda fat aposta per tegnirli en mam. E ciuciar. I ricordi, anche quando ste foto, sti cine picoi, ì è slavaridi o sfasai, sule prime i te pol far anca rider. Toh vara che camisa a fiori…ades con quela tela li no i fa gnanca le tovaie per le sagre. Vara vara che cavei davanti, longhi ma petenai anca mal. Eh ma no ghera el gel. Po te vedi zent ormai soto tera da ‘n pez. Prai dove ades ghè tante casote una tacada a l’altra. Putele che te feva morir. E amizi che enveze i coreva za alora massa en moto. Difati…Eco l’è alora che te vei voia de schizar en botom per tornar a ades. Perchè endrio camina solo i gamberi, anche quei grigi dei canai. Perchè se te vai massa endrio col nastro te vei massa magoni. E dopo no l’è così fazile tornar chi, ades, en sto moment senza qualche sgrif a quel porcodizere che al zervel no voria mai darghe da ment. Perchè se vai endrio te fai dopo do volte, nar e vegnir de volta, le scale de i to ani. Te vei da arfiar. E quando te vardi en su anche el Stif te par l’Everest, e i Gazzi sora Bolignam el campo base per na scalada piena de ostacoi. Che se sa zamai come la va a finir. Nesuni è vegnù mai endrio a contarlo.

LE MASCHERE PER TUT L’AM

QUEL CHE TE CIAMO DOMAN. Dela stimana del no se sa, del mes del miga, de l’am del mai.
QUEL CHE TE SAVESSI … Come se magna bem en quel posto. Come se sta bem en quell’albergo. Come i te trata bem en quela botega. E en quei posti, te te scorzi dopo, no i l’ha mai vist.
QUEL CHE PRESTEME LA MACHINA. Che gò da nar chi vizim. E el te la rende che no ghè pu zo gnanca en goz de benzina.
QUEL CHE NO GO TEMP GNANCA PER PIANZER. E tel vedi tut el dì al bar a zugar coi videopoker.
QUEL CHE AH L’ERA NA BRAVA PERSONA. E ‘l aveva mandà en mona proprio el dì prima che el nes a farse ciavar.

QUEL TUT CASA E CIESA. Che se i ghe sgriffa l’autim el deventa na bestia. No ‘l fa la constataziom amichevole. El ciama i vigili, la polizia, l’esercito. E po el va en giro col colarim sol quando el va a messa.

QUEL DAL BRAZOT CORT. Che na volta l’aves pagà el cafè al bar, na volta el se fus ricordà de renderte en favor. Sto chì el sparmia anca su la maschera. Perchè propri no ‘la mete: così l’è.
QUEL CHE VOLTA’ L’ANGOL. El parla de colp al contrario. Tute le robe bele sul to cont le deventa come quela roba che te rumega nel stomech…e po te buti sù.
QUEL CHE ME BASTA LA ME SPOSA. E dopo el fa cicì e ciciò con tute le done. Basta che le ghe daga da ment.
QUEL CHE STI ANI. El vive nel so bel mantel nero. Che ghe sconde tut trane che el de drio. E el bel l’è che per questo anca na repetada la deventa storia da contar.
QUEL CHE TEI, NO TE SAI CHI SOM. Ma sì, na volta te feve el finanzier. Te fevi paura. Ades però sior no vedelo che ghe n’è almen zinque davanti a lu nela fila?

l’òra de l’amor

Eravamo abbracciati, ricordi? E quel vento sul lago di Garda. S’andò da tua sorella, allora sposata. Primo pomeriggio. E quel vento che entrava in casa. E noi, nel vento.Il vento del Garda, dappertutto. Riempiva le tende come vele. E tu, ed io, abbracciati come in quella scena sul Titanic. Siamo noi i re del mondooooo. E ci baciavamo, coi capelli che volavano attorno alle nostre bocche. Ed era un turbinio d’aria. Tra salotto, cucina, bagno ed atrio.Dove i nostri vestiti svolazzavano. Dove il vento avvolse i nostri corpi nudi…nell’aria…col sapore dei nostri umori più intimi…nell’aria. Poi arrivò di colpo tuo padre. “Ma no vedè che ghè el giro d’aria, che avè lassà avert porte finestre? Ma diaolporco, sè nati en barca?

DI E NOT

Te toi zo ste pirole. Gnente. Dopo na stimana? Gnente. Anzi, mal de stomech. Saralo che ho fat en misciot tra alghe e grape? Boh, lasso star la grapa e togo l’amaro giuliani (dak cognome me par un dei nossi, me fido), Gnente. Su de do eti. Colpa dela sopressa de ieri sera? Po darsi. Gnente sopressa, sol do ciufi de radic e do oveti. E le pirole ale alghe. Su de ‘n eto. Dai, l’è nada bem ancoi. Stasera piza. Me desnentego le pirole a casa. Pizza, birazza, grapeta, tiramisù. Su sula bilanza…sero i oci, som en tort marz come se fermess i carabinieri dopo na zena dei coscriti. Madona, no voi gnanca vardar el nuemr….soto de tre eti. Ma se ciava…el savevo mi che l’è le alghe che ‘n grassa.

DEVENTAR VECI MA CONTENTI

Eh si, te te vardi al spegio. E te vedi entant che la barba l’è semper pu bianca. Che te g’hai le fizze en banda ai oci (ma anca sora, soto, de chi…toh, varda anca de la). Che la panza la vanza en fora. Che a far le scale te vei i afani. Che sì, te ghe la fai ancora a sciar ben o mal come na volta. Ma se ghè da nar su a scaleta…te vedi la madona, i anzoi e anca sant Butete Zò che te dà l’oi sant. Però, come dir, se torna endrio. A l’età dei puteloti. Non de colpo. Piam, piam. Per esempio te robi i ciocolatini de not al bocia. Te vai al supermercato e t’emboschi do luganeghe fresche da ciuciar en machina. Dove te gai anca la boceta de profumo per far nar via l’odor de ai. Te fai le toe. De scondom. Epperò te vedi con oci diversi quel che te g’hai entorno. Madona, che bel posto che l’è sto chi dove abito. Pensa che gh’è zent che vei da posti lontani per farghe le ferie. E noi prenotem per chisà dove. Varda che zent che gira. Ciao Toni, te saria pien de soldi ma te fai na vita…. E l’altro, da del là de la strada…Cornelio, farse en piatim de cazi soi no ah? Te vai al bar dal Giacomo e ‘l sa zà quel che te voi. Ma no lo’è sol comodità. L’è che te ghe voi bem a sti posti dove da zoven te girevi sempre en pressa. E ades te te fermi. Ostrega, no farò miga la fim de quei pensionai che se ferma davanti ai scavi de l’enel e che ghe dis ai operai: “Vardè che chi avè zà usà le bene l’am passà…desmentegà qualcos?”

SOM SCIOPA’

Ah che bel risponderghe così quando i te lo domanda. Sì, som sciopà, e alora? Te starai meio ti che te te tegni tut el gas de le to miserie dentro. Che te sei rebuf, malmostos, ciucià da le strie, quasi mes en costa. Che te se vede proprio sto balom che te ‘sgionfa. De penseri, de casini, de robe che no le va drite gnanca a darghe col martel. Sì, te sarai a piombo ti, che se i fessa na getada co le to misure vegneria fora na roba tipo godì, quel de barzelona, tuta a onde. Sì, som sciopà, perchè som anca stuf de ‘n mondo dove tut quel che i dis giornai e televisiom e radio e misteri vari el par vera. Che te sei lì che te magni e te vardi sto spritz come na partia de balom. Se ‘l va zo vinzet qualcos? Te scalei qualche euro ala cassa? Ma valà. Mi ghe credo ale legi fisiche. Se i soldi i cala da na banda vol dir che i va en scarsela a qualchedum da l’altra. Bruciati 50 miliardi de euro in borsa…ma chielo che de sti tempi se permete de brusar i soldi. Ma valà, i è sparidi soto el banc. E qualchedum l’è drio a ‘n muciarli. E quel por laor che compra el grata e vinzi. Grata e perdi, scuseme. Ma sì, i togo anca mi. Te varde…zinque euro. Bom te rizughi. Gnente. Te ne compri n’altro. Dese euro. Bom, zinque per i zigareti e te rizughi. Gnente. N’altro ancora. Zinque euro. E ritaca banda. Te fai do conti…oscia me sà che g’ho zontà…E savè na roba, fresca fresca, roba che no avria mai dit? I ha mess el grata e vinzi nel “paniere”. Cioè nele robe che l’Istat el varda per decider se la va bem o la va mal…Ma sì, fè el pam anca de dominica…se podo dormo e me rangio con quel sech.

SANGUE CIAMA SANGUE

El so, de colp te  vegneria voia de copar quei che copa done e puteloti anca picoi, quei che ha fat robe che – te vegniria voia de pensar – gnanca ‘l diaòl el penserìa de far. E dopo nar a veder ‘na partia come gnent fussa. Anca zent che fim l’alter dì la ghe diseva su ai ‘mericani per quele agonie de condanai a morir co l’inieziom…o brusai su la carega co la luce…anca quei squasi i sarìa per tornar anca ‘n Italia a copàr ‘sti mostri. Stente ‘tenti – digo però a ‘sto punto – che a farse ciapàr massa da ‘sta voia de farghela pagar va a finìr che n’embroièm co le nosse stese mam. La buto lì: el nòs Chico Forti, quel tegnù en presòm en Merica perché i è convinti che l’ha copà. Eco, el Chico – e anca fior de avocati – el dis che no l’ha fat gnent. Se i l’avès copà? No se podria pu tornar de zerto endrio. E gnanca dirghe scusa pagandoghe i dani… E quanti ne hai fat fora, en tute l mondo, de zent che no aveva fat gnent? Ma anca en situaziom dove se capìs senza dubi (dopo ‘na confessiòm soratut) chi che l’è stà, copàr – i dìs – no serve tant da esempi. Ensoma no l’è che i se tira endrio. Basterìa poch, me vei da dir, per spaventar sul serio: che l’ergastol sia propri ergastol, senza tanti sconti, permessi, adiritura farli vegnir fora dal dì per bona condota. No l’ergastol soratut quando se fa robe che miscia el stomech sol a dirle, l’ergastol deve esser per semper…Che i passa tuta la vita a pensarghe sora e a dir: Cos’onte fat….cosa m’è vegnù entorno….e a sognar anca dal dì quei momenti bruti.

Se po’ lezè “L’ultimo giorno di un condannato a morte” de Victor Hugò capirè meio quel che voleria dir…

LA PANCIERA

Vardo, ancor nel let, Trentino Tv, dove prima de farte veder qualcos dei giornai, i fa la reclam. Me scapa l’ocio: oscia, na panciera che se te la meti te cali dese chili en do stimane. Basta che te ghe meti su la crema che i te manda (co la panciera) col corrier. Va bem digo. La compro. Ariva sto sachet. La panciera te la trovi per de mem dai cinesi al mercà. La crema? E’ tut scrit en mericam, todesch, francese, spagnol…el taliam no i sà gnanca che el ghe sia al mondo. Anca se la signorina al telefono el taliam la lo parleva. Va bem, digo ala sposa, meto su sta crema e la panciera (diaolporco…podevei farla pu larga?) e vago nel let. La matina me alzo su e se fus per mi naria drit ala coop nel reparto gastronomia. Me sento na bondola. Anzi no, n’arotolato de quei che se cose per le feste. Gò anca mal de stomech a forza de star denter sto ensaccà. Vardo le istruziom (en russo) e me par de capir na roba: se te voi calar no te devi magnar questo questo e que l’alter. Sbrego su la panciera e vago a farme en panim co la porcheta….così, perchè i m’ha fat girar le bale. No se fa così …

 

ENTANT GRAZIE

 G’ho chi en cont da pagare che fa paura. Se te digo chiel che me deve sti soldi no te me credi. Che faga? Ghe meta tut en mam a n’avvocato? Brao, così me toca tirar for euri anca per quel. Ah ma no som miga l’unico ne le strazze. L’altro dì encontro el Saverio. Co le mam nei pochi cavei che ghè restà. “Na volta – el m’ha dit – ghera almem le cambiali. En sgrifet e se no altro en toc de carta da reclamar tel gavevi nel casset. Ades l’è tut en ciao sat che gò da nar, passa la sposa, ne conosèm…

Eh sì, el fa n’altro artezàn, son nà anca mì ala Rurale. Ma anca lì no i ne mola for. G’ho dit: vardè che mi no conto bale. En botega son piem de “entant grazie”. E quei che conta i soldi, dietro el vedro smeriglià, i ha alzà la testa, po’ i l’ha scorlada. Ensoma, i m’ha dat anca del mat.

Sto chi l’è gnente, ha fat en en salumier. Da ‘n po’ de temp l’è tut en rafanass. I vei, i toca, i tasta quel e anca que l’altro. E dopo, a panza piena i dìs: Ah, nol me pias

 

CASIN ALA RURALE …

En Cassa Rurale, l’altro dì, gh’era uno co na tanica de benzina en man. Casim, confusion: ‘sa voleralo far sto mat? Pomperi, carabineri, digos col pasamontagna. “Voi parlar col diretor, voi parlar col diretor”, el goseva. Ala fim per evitar el pezo i gh’ha fat parlar co sto benedeto diretor. “El me scusa – el gh’a dit sto por om co la tanica – podo meter questa ne la casetta de sicureza al posto dell’oroloi de oro che m’ha lassà me mama?”

EL DOLORIM

Ah, voi zoveni no gavè de sti penseri. Beati voi. E deghe dentro fin che podè. Quei de la me età, enveze, i scominzia a ciapar i spaventi. Te senti en dolorim tra le costole. Te disi: ma sì, sarà el sforzo che ho fat a tirar su la posta dala cassetta che ghè restà dentro la ciav e diaolporco e me mondo sempre i dei a tirar fora le buste che bisogna nar a giustarla e che la me l’ha dit la sposa anca ieri…No,no…sto dolorim tel senti anca doman, posdoman, anca quando t’hai giustà la caseta de la posta. E ancora, e ancora. Ma fate i ragi ai polmoni no? Meio ancora, smeti de fumar…valà. Come se dis: con do mam no fumo pu. Con una sola sì. Ma no ghè gnent da scherzar. Sto dolorim. Te le pensi tute. Ma no dai, proprio ades, sul pu bel…E na matina te senti mal anca…beh ensoma soto a quel mister de l’ombrela lì. Sarala la prostata? Entant te vardi i avisi da mort…i scominzia a esser sempre pu vizini a la to età…Ma va dal dotor, fate far i esami, dei controli, le analisi…No, no, se ormai l’è la me ora…Ma dai, no sta dir monae. Ghe telefono mi alla cup…i te fa el ciech ap, i te varda e i te scolta dai cavei ale ongie dei pei…e te te meti l’anima en paze. No, Marion, lasciami qui, vai avanti tu, hai una vita da vivere. Voglio solo addormentarmi sul tuo seno, baciarti per l’ultima volta…Ah ciao mama, el Cornelio? Che te diga, basta do linee de fever e el straparla…secondo mi el varda massa film de cauboi e indiani…ma sì, gò dat zo la tachipirina…ma sì te sai bem come i è i omini de ades…se i gaves le so robe tuti i mesi come noi…figurete, eco,eco…ciao mama…domam matina no vegno a far la spesa…gò chi sto catorcio en casa…pensa che el vol el prete per l’oi sant…Sì, sì, ah ogni dì pu vecio…sì, come el papà…

ANCA TI, SIOREDIO…

Dio, se te me volessi propri così bem, no te me faressi strusìar sì tant. Te capirèssi al volo che no ho mai fat gnent de mal. Che no la gò su con nisuni. Te me ciameressi con ‘n fiscio: dai valà, vei su, ‘sa fat lì en mez ai gazèri? Enveze, vara ti, devo esser semper mì a ciamarte. A pregarte. A dirte: “Ma alora, te par propri na bela roba? Lassar che ne rangiente tra noaltri? Che l’è come butar na ciopèta en mez a ruganti che no magna da stimane. Che l’è come fidarse de quel che per do euri venderìa so mama. Dai, manda zò te nof to fiol a meter tuti en bina. Te prometo che fin che te me lassi en pè e con ‘n zervèl senza nebie, farò de tut perché stavolta no i lo meta en cros. Po’ però spetene. Che vegnim su tuti ensema per la ganzega.

SCANDAI E RABIE

Scandalo Expo, scandalo Mose, en mèz altra magnaria nele regiom, rimborsi spese, da noi la storia dei vitalizi. Se parla en tut de dozento, trezento miliardi vegnui a mancar….qualcos de pu de quel che serviria per meter en paze n’atimim i conti de l’Italia senza meter su altre tasse o aumentar quele che ghè. Te vei entorno pu che rabia en magon. Perché ‘sti ladroni no i è zent che no ariva ala fim del mes e i gà bisogn de soldi per magnar…no a sti chi i soldi i ghe vegniva za for dale recie. Cosa faria mi? Entant ghe neto tuti i conti che i gà, ghe vendo fora case, condomini. E tut soto ciave soto el cul del capo dela polizia. Se ciava anca i interesi…quando ghe bisogn de en par de miliardi se i cava su da lì. Quei che ha robà? Pic e baila che de strae da netar en Italia ghe n’è. E no l’è vera che le porta tute a Roma…Ghe n’è de quele che finis proprio arent al depurator…

I MARZIANI

Avè mai vist en disco volante? E i marziani? Mi sì. E no som mat. L’altro dì, tei, smonto da la machina vizim al Poli de Riva. E uno con do robe nele recie, parlando come noi, nè, el dis “Si pperchè sta festa si fa o non si fa? …Mò io sto sciallo, sei tu quello che scleri…” No l’ho lasà finir: “Tei bocia – gò dit – varda che mi vago a laorar, miga a organizar feste. E no se dis sciallo ma sciarpa…questa l’è na sciarpa, hat capì?” Ma que l’altro l’era come se el parles per so cont. No ‘l m’ha gnanca vardà e l’è nà ‘n vanti per la so straa gosando: “No, percchè le bibbite chi le porta? E la play?”
Ma basete el cul valà, ti e to dischi volanti.

VIVER SU LE ARELE

Ah ve s’è scorti che basta poc per finir al piano de soto? En colpèt e tuti a tremar come le foie d’autun. N’altro colpèt e tuti a pensar che i soldi i serve sì ma quando te vei a mancar la tera soto i pei cosa ‘n fat? A cossa te servei? No te pensi de zerto a nar a torli fora en banca e a portartei drio, nevera? E de colpo stamatina anca quei che de solit sta su le sue, che te parla come zent senza religiom: se ciava tut. Meio godersela fin che se pol. Ma g’hat bisogn de ‘n teremot per capir che vivem come le ue del vim sant su le arèle? Che basta en pet ne l’universo e sen tuti del gat? E no stà tirarme fora la storia del maia. Perchè la fim del mondo la pol suzeder anca traversando la strada. Sol che en quel moment el mondo no l’è finì per tuti, ma sol per quel por laor che vei ciapà soto. E no stà dirme che le disgrazie le capita sol da altre bande, perchè no se sa mai quel che ghe passa per la testa a la natura. En sass che l’è empre stà lì de colpo el vei zò magari proprio quando passa na machina. En mucio de nef che saluda la montagna. PIover e piover e piover ancora che te combina disastri. Ma penseghe su en po. No l’è che sem i pu grandi e pu forti de tuti. Provè a pensar quando vardè le formighe che le laora svelte a portar via da magnar…ciapae dai so misteri. Voi le vardè e pensè: ma se mi ades ghe molo zò na brenta d’acqua le copo tute. Lo savrale? Eco, metè che sora de noi che sia un che ne varda co na brenta. O che ogni tant, così, perchè no ‘l sa cosa far, el gà dà en butom a sta balota dove ne dem da far. Magari begando per nos cont…

I TRENTINI E LA CULTURA

‘sa fente stasera? – Ghe saria en concerto a l’auditorium del Santa Chiara.  “Concerto de chie?” – El fiol del d’Andrè. “’sa cantel, robe de so pare zamai…” – Ma no, el gà anca canzom sue… “Sì, va bem, ma se no ghera so pare, i soldi de so pare ‘n dove saresselo adès?”

Vegnit anca ti domam al Muse? “Oscia ghè semper ‘na coa de ‘n bis che no finiss pu. E po’ a veder cossa, bestie tacae su col fil de fer?” – Ma dai che anca i boci i se svoltola… “Varda, e se fuss de far el giro al sass e magnar en gelatim? Te verai che anca i boci i vei da la mia…”

Ancoi al Castel del Bonconsili ghè ‘na mostra dei ori dei romani. “Li vendei anca? I dovria far anca el sconto me sa vist che i è sì veci…”.

Dai che ‘n piazza del Dom ghè na festa. I sona, i canta. “Ma se stasera dovevem nar zo al Fanum de Mori a far do salti…te set desmentegada?”

Oh, i fa veder quel cine che ha vinte l festival dela montagna. Con quela pora zent che en Siberia no la saveva che ghera le radiaziom… “Scolta, no ghe n’avente asà dele nosse miserie? Dai che nem ala Pedavena a magnar probusti valà—

Zò al Mart ghè la mostra de quel pitor che l’era ‘n manicomi…’sa se ciamelo…. “Vara che quel posto de Perzem i l’ha serà da ‘n pez.

el compiuter malà

Ani e ani e ani fa, quando i era en pochi quei che saveva cossa che l’era internet, el compiuter, la posta eletronica, el me fa um che se ‘n’entende: sat che ghè i virus nei compiuter? Som stà lì do minuti co la facia del cretino o de quel che ha vist la madona. Po’: scolta, no me par bel che te toghi en giro uno che el t’ha apena comprà sto rochel con su wuindos… E L’altro: no, l’è vera. I s’enfetta… Ma alora – gavevo dit – devo schizar i tasti coi guanti? Lavarme prima le mam? ‘Sa faga? Passa i ani e ades se no te gai l’antivirus agiornà vei fora en mesagio: Ocio, che no te sei proteto. Ensoma poderia vegnir denter uno e spacar su tut quel che te hai fat, scrit, fotografà—- Alora zo de nare a tor sto antivirus. No l’è che ‘l costa poch. Me vei en dubi: ma no l’è che sti chi che vende sti “vazini” l’è anca quei che en qualche modo i manda i virus en giro? Perché se i sa semper come proteggerte vol dir che i sa anca come farte del mal no?

DIAOLPORCO NUMERO UNOdiaolporco1x

 

VIDEO

 

DIAOLPORCO NUMERO DUEdiaolporco22

 

VIDEO

 

DIAOLPORCO NUMERO TREDIAOLPORCO33

 

VIDEO

 

DIAOLPORCO NUMERO QUATTROdiaol4

 

VIDEO

 

DIAOLPORCO NUMERO CINQUEdiaol55

 

video

Lascia un commento