di Cornelio Galas
Terlàch, 2067
-Ciao Bepi, come vàla col zervèl nòf?
“Bèm per quel, no sento pù quei fìsci nele recie che me déva fastidi subit dopo l’operazióm. Però, a dirla tuta, no l’è pù come prima. Sì, ensóma, meio de l’Alzaimer de sicur, ma dover semper meterghe mam a quei agegi, quei tuti d’en color, sì dai, el blutut, per cambiar le conesióm, ala fim el ruga dai”.
-Ma per el rest?
“Sì, dai, la và bèm meio per quel … ogni tant parlo inglés anca se volerìa parlar dialèt ma … vedo che i neòi almem i me capìs”
-Avréssit mai pensà che la siènza la sarìa arivada a sti livèi? Varda che i l’ha propri enventade tute neh. No se more pu de càncher e se propri te dovéssi morir per qualcòs i te cambia quel che s’è rot en quatro e quatròto… ah?
“L’è davèra robe da no creder … come quela che ho vist stamatìna nela televisionzìna che ho ‘pena mès en tra mèz ai òci…”.
-Cossa hat vist po’ de sì strano?
“Ma l’è ‘n vecio documentàri, me digo de a òcio e cròs zamài mèz sècol endrìo, sat quando – ma per ricordarte te devi dropar el blutut e i so agegi neh – sat quando en Trentim gh’era i orsi em giro per i boschi?”
-Sì, devo averghe qualcos su na vecia ciavéta …
“Beh, tut mal era vegnù fòra ‘n casim. Sui giornai no gh’era alter che sta storia, pensa tì”.
-Dalbòm?
“Sì te digo, ah i ne parléva tuti, anca en quela vecia gabia de mati che l’era Fèsbuch…”.
-Ah, è passà tanti ani, no so se trovo quei fàils.
“Bem, tut mal, era vegnù fòr, en poche parole, che quei de la Provincia – quela che gh’era prima che se votès su ogni roba schizàndo en botóm vizim al nas – l’aveva comprà dei orsi en Slovenia per meterli nei boschi del Trentim dove de orsi zamai no ghe n’era pù. Sol che col temp sti orsi i è deventài tanti. Tèi, te riscèvi de trovart’ei anca al bar la matina a far colaziòm co le briòs al mèl neh”.
-Ma dai, sta chì l’è na barzelèta…
“Quela de la briòs sì, ma ‘l rest no caro. Oh, sti orsi i ghe saltèva adòs a quei che nèva nei boschi, soratut col cagn. Zent finida a l’ospedal, en casìm tra quei che voleva coparli e quei che envèze no i voleva che se ghe fès gnent …”.
-E come ela nàda a finir?
“Ah, le beghe l’è nade envanti per tre quatro ani. Prima che saltés fora n’altra questiom ancora … ancora pù grossa disente”.
-Eh, osc’ia, come pu grossa?
“Beh, te sai bem nò che quando se ragionéva ognum co la so testa l’era empossibil nar d’acordi. Miga come adès che ‘n de n’atimo se trova na soluziom che vaga bem a tuti”.
-Va bem, ma cossa erela sta storia pu grossa?
“Beh, a ‘n zerto punto, com’ela come no ela, oltra a sta questiom dei orsi salta fora anca quela dei lupi, po’ quela cinghiali, dei cagni selvadeghi, dei bìssi velenosi, dei osèi che magnèva le trote nei alevamenti, dei cavriòi che te traverseva la stràa dapertut. Ensoma, ‘n casìm che paréva no finir pu”.
-E alora?
“E alora quei lezùi e studiai i ha zercà de trovar en modo de star ensema a tute ste bestie senza però far gnent contro la natura, capìssit come?”.
-No, no capìsso, spiégheme …
“Te sai no che ‘l pés grant ‘l magna quel medio e quel medio ‘l magna quel de soto e quel de soto el magna quel picol…”.
-Sì, la famosa cadèna naturale se me ricordo quel che gh’è sui veci dischèti …
“Eco, brào. Alora i ha dìt ‘sti sienzati: fènte en modo che ste bestie le se rangia. Che ‘l pu grant el magna el medio e zó e zó … cioè che i se la fàga fora lori, per dir.”
-E àlo funzionà sto sistema nof?
“Sule prime ancora, ancora. Po’ però l’è stà ‘n disaster”.
-Perché?
“Ma perché è arivà el moment che en pratica vinzéva ala fim semper l’ors. E quei medi e picoi i néva a farse ciavàr”.
-Ensoma, è restà la questiom dei orsi, come prima.
“No, pezo. Perché a quel punto a qualchedum gh’è vegnù n’idea che … che se no la ghe fussa vegnùa sarìa stà meio”.
-Quala idea?
“Quela de meter nei boschi na bestia pu granda de l’ors”.
-I elefanti?
“De pù, de pù”.
-Eh osc’ia chìe po’?
“Robe da no creder. Sti chì de Trent i è nài al Muse, sat quel museo dove gh’era denter osèi empaiài, ma anca òsi de bestie pu grande …”.
-No, no sta dirme …
“Spèta, spèta. Gh’era anca n’òf gròss, de dinosauro. El parèva zamài nà de mal. Envéze, co la so encubatrize, dai e dai …tèi, no è miga vegnù fòra en sgorbio picol de na bestia che en do mesi l’era zà alta quatro metri?”
-E hai mès sta bestia nei boschi sti mati?
“Sì, cramento. E no i s’è fermai a quela. I ha mes soto l’encubatrize anca altri òvi. Sat come quel vecio film del dó, come se ciamével pò … Giura su l’às del pòrch? Ah, così su do pei, senza el blutùt … no ‘l me vèi. Tut mal nei boschi en poch temp de sti mostri gh’en sarà stà almen na desìna”.
-E dopo?
“Sti mostri i ha magnà tuti i orsi, e zo e zo anca tute le altre bestie. Pensa che i se netéva i denti co le vipere ancora vive che ‘l velem el fèva da dentifrìzi. Sol che netà tuti i boschi i ha scominzià a vegnir zo a val. I gireva per Trent propri come nel cine neh”.
-Com’èla finìa?
“Per fartela corta è arivà i aeroplani dei militari. I ha bombardà tut el Bondom, i boschi chi sora Terlach, la Paganela…paréva de esser en guera neh”.
–E dopo?
“Ah dopo no gh’era pu gnent. Nè orsi, nè lupi, nè cinghiali, ma gnanca condomìni, botéghe, monumenti, ciése … e soratut gnanca pù òmeni, dòne, matelòti … no è restà pù gnent”.
-Elamadòna … e alora?
“E alora i è nài coi barcóni fim en Libia a pregàr che vegnìs en Trentìm òmeni e done per ripopolar ‘sta regióm, osc’ia. Però stavolta i ha lassà ‘n do che le era le bestie, anca quele picoline, anca quele che zamai te le contéve sui dèi de na mam, se sa”.
