DA CHI A ZENT’ANI

di Cornelio Galas

Forsi l’è perché sto deventando vecio bacuco. Sat, come quei veci che se pìsa adòs, che deve girar col panolóm soto e che ghe vèi da piànzer per gnent. Però me capita, soratùt quando scominzia l’autùm, de far do pàssi, tra vigne zamài vendemàe, tra piante che tàca via a cambiar color, e vardar el rèst de sta Busa.

Che lì dove zughévem al balóm l’è tut rezintà. Che lazó, dove nevem a robar zirése gh’è na stràa nova, sfaltada. No co la gièra come quando se neva (e se caschéva) en bici vegnendo de volta a cà coi dinòci mondài.

Po’ i va tuti de corsa. I è semper ciapài. Anca i bòci. Che ghe vegnirà mal de col prima o dopo a forza de star lì, piegai, davanti a quei telefonini, a quei trabìcoi.

Te s’engrópa tut quant (e no serve gnanca ‘l màzacafè) a veder sti posti dove i contadini i néva e vegnìva da Vignole col sarlàt tacà (de drìo), dove da lontàm te vedi sti capanoni vòdi, entramèz a stropère che nesuni sa per cosa se le dropéva.

Te vèi en magóm a vardar vers el Castèl, vers Laghel e po’ vers el Lufàm, vers le Grazie, vers Santa Caterina, la piana de San Giorgio… ma lontàm demò da la stràa. Te vei da enmaginàr, per de pù, de come sarà sta Busa da chi a zent’ani. Perché se l’è così malmésa adès, figurete alora.

O magari me sbalio. Vot veder che chi ghe sarà sol tante bele rampe con su postà i ràzi. E i pù i monterà su per nar en pianeti lontani…come tòr la coriera. Chi resterà quei che adés i è zoveni e alora i sarà veci e bacuchi come mi. Che i ghe conterà ai boci come se no alter na volta, en la Busa, se podéva ancora nar a far en giro en campagna, e trovar caprioì (e anca orsi) su ‘n Vél.

Me sà però che pasà altri zento, dosento ani…anca quei che è finì sui pianeti i dirà la stessa roba. Perché anca lì i omeni i ha ‘mpienù tut quel che se podeva co le so costruziom…