Che casim per dese schèi de nef…

di Cornelio Galas

Osc’ia, basta zinque, forsi dése schèi de néf e l’Itaglia (sì col “gl”, perché sém tuti gnoranti) soratut en zò, dale bande de Roma, no la gh’en vèi fòra. Gnanca fussa ‘l teremot. O che dal zèl vegna zo pali de fer. Treni che no parte. O che parte ma ariva l’ora del mai e ‘l dì del miga. Scole seràe. Tuti che dìs de moverse sol se propri se deve.

Odìo, se sa che da noi, en montagna, i è pù atrezài. Che no se spèta che la nèf la deventa giàz per tirarla via co la pala o butando zo el sal. Però, no so, me par che se la fa pu gròssa de quel che la è. Dai che no l’è la prima volta che nevega anca en zò. E tut mal no me par che sia metri de nef che ghe vol le turbine. Ancòi ala televisiom drio a quei che parleva de zità stofegàe da la nef ghe fus n’aiola con zà l’erba verda. Per dir neh… Pò se sa, quando gh’è la nef l’è semper gazèri. Bisogna adatarse. De zerto no nar en giro en bici o co le scarpe che se dropa a nar a balar o co le zavate. En Trentim da temp da november – che fiòca o no fiòca – su le machine ghe se vol le gome da nef. E se no le cadene. Anca da noi è suzès robe strane. Come quel che i ha fermà en dì a Paso San Zoàn, a Nach. Che el neva en qua e ‘n la co la so machinota. “Le gome le è lisie – i ga dìt i vigili – gàlo almen le cadene drio?” – Zerto che gò le cadene, le è nel bagai de drio. “E alora perché no ‘l le mete?” -A mi i m’ha dit che basta averghele drio per no pagar la multa. Del rest no so miga come se mete le cadene…me darésselo na mam?

Eco, per dir, bisognerìa enzignarse su ste robe. Che dopo quei co le béne magari no i passa propri dapertut o i scominzia tardi l’è n’altra questiom. Ma co le previsiom che i fa en televisiom o anca ala radio che se scolta en machina, dai, te l’embrochi pu dela schedina del balòm no? Che po’ dir che d’inverno pol nevegar e far anca en frét bèco l’è come capir (prima) che se te meti i deòti ne l’aqua de la pasta che bòi te te scòti…

Ades però som curios de veder quel che suzéde domenega che vei. Gh’è le eleziom no? De solit se vota nele scòle. Alora, se gh’è la nef de sti dì, quela che ha portà a serarle le scole, sererài anca le sale dove se dovrìa nar a votar? Ensoma, spostèi a n’altro dì le eleziom, come la partia dela Juve?

El colmo? Che i ha tacà via anca a parlar de aumento dei prezi. Ma per cossa? Per la verdura? Perché la nef l’ha sfondà le sère?

Ah, la foto de sora l’ho fàta l’alter dì. La nèf fim squasi ai Gazi sora Bolignam. Me sa che Vel l’è isolada, e anca Ronzo e Bordala da l’altra banda. Ma no i ha dit gnent ala televisiom, strano… gnanca dei capùssi dela Val de Gresta.

Questa voce è stata pubblicata in Senza categoria. Contrassegna il permalink.

Lascia un commento