CANAPE’ DE SPECK E FORMAI

 

canape

 

SAORI, EL CANAPE’ DE SPECK E FORMAI

No stè dirme che me son dàt ai magnàri todeschi. El so zà da per mi. L’è che na volta che magnè sta roba chi lassè perder le bruschete e anca la piza a tochèti, provàr per creder. E po’ l’è fàzile da far. En vinti minùti podè zà scominziàr a zacàr.

Cossa ve serve stavolta?  Entànt sète fète de pam nero (quel dei todeschi, bravi, ma ‘l trovè anca da noi), po’ zentozinquanta grami de speck, altretanti de formài de quel che se còla, do cuciàri de grana gratà, en pàr de bicièri de sgnapa de pere (la uilliams…quela che i fa lassandoghe la pèra entrega nela botiglia), paprika (o peverenzìn), sal, buro, na confeziom de pàna da cosìna che trovè zamai dapertut, mèza zìgola e a oarte en padelòt con en po’ de brodo che avrè zà fat. Col dado? Va bem…per stavolta. Meio sarìa dropar quel per far el lèss che così gh’avè pronto anca el secondo, capì come?

Alora. En de na padelòta (va bem quela che dropè per far el ragù, se el ragù no ‘l comprè zà fat) butèghe ‘na nòss de buro. Lassè che el se cola. Nò che el fritèga…o che el se brusà demò. Denter anche la zigola che avrè taià a fete fine (prima). E adès fè come i pompieri col ‘brodo…do tre spruzadìne, no ocòr tant. E lassè che tut se sfredìsa n’atimin. En de na terìna a parte và enveze el speck, taià su come el ve vegn…taiarlo demò. Po’ el formai a dadòti. Eco adès ciapè la zigola (quela che avè cosinà con buro e la spruzadina de brodo e po’ avè lassà sfredìr…): denter nela terìna. E denter anca el formai gratà, la sgnapa de pera e la pana (ma oscia no l’hat gnancora averta la confeziom? Che spètit?). Miscè tut. Propri na presa de sala pena pena… N’altra misciadina. Tut sora (no soto) le fete de pan nero. Piam, come meter la marmelata sul pam…piam. Sòra la paprika o el peveronzin. E tute ste fete po’ su la griglia del forno. Dozento gradi de calt. Deghe n’ociàda…basta che el formài el còla no che se brùsa anca la griglia. Po’ tirè fòra e – se avè fat la carne o la lengua a lèss – podè anca pensàr zà al caffè. Se no… ma mi l’avevo dit neh…

Cossa beverghe drio? En Lagrein rosato l’è el massimo. El và zò che ‘l se copa (ensema al pam nero…). Oscia, desmenteghevo: no stè magnàr el canapè de speck e formai sul canapè nof o ‘pena lavà. Che magari ve scampa qualcos da la boca e…capì come no?

 

Questa voce è stata pubblicata in Senza categoria. Contrassegna il permalink.